ဧရာ၀တီတိုင်းဒေသကြီးသည် မြန်မာနိုင်ငံ၏ ဆန်စပါးအဓိကစိုက်ပျိုးထွက်ရှိရာဒေသဖြစ်ပြီး နွေစပါးစိုက်ဧက ၃၇ သိန်းကျော်၊ မိုးစပါးစိုက်ဧက ၁၅ သိန်းကျော် စိုက်ပျိုးလျက်ရှိကြောင်း သိရသည်။
လက်ရှိအချိန်တွင် ဧရာ၀တီတိုင်းဒေသကြီးအတွင်း ဆောင်းစပါးများ ရိတ်သိမ်းနေသည့်ကာလဖြစ်သည်။ စပါးဧကအများစုမှာ ရိတ်သိမ်းပြီးစီးနေပြီဖြစ်ကာ ကျန်ရှိနေသောစပါးစိုက်ဧကများ ဆက်လက်ရိတ်သိမ်းနေချိန်လည်း ဖြစ်သည်။
ယခင်ဝယ်ယူထားသော ဆီလက်ကျန်ဖြင့်သာ စက်မောင်းပြီး စပါးရိတ်သိမ်းနေရခြင်းဖြစ်ကြောင်းနှင့် လက်ကျန်ဆီမရှိတော့ပါက စပါးဆက်လက်ရိတ်သိမ်းရန် အခက်အခဲများစွာရှိကြောင်း တောင်သူများက ဆိုသည်။
‘’’’ထောက်ခံစာနဲ့ဝယ်ယူပေမယ့် ရှိတဲ့ဧကအတိုင်း မရောင်းပေးနိုင်ဘူးဖြစ်နေတယ်၊ အဲတော့ အပြင်ကနေ ဆီတစ်ချို့တစ်ဝက် ဝယ်မောင်းရတယ်၊ ဒီတိုင်းဆိုရင် လာမယ့်မိုးစပါးစိုက်မယ့်တောင်သူတွေအနေနဲ့ ဧကနည်းတဲ့တောင်သူတွေ လျော့သွားနိုင်ပါတယ်””ဟု တောင်သူကိုအောင်သူထက်က ပြောပြခဲ့သည်။
ဧရာ၀တီတိုင်းဒေသကြီးတွင် တိုင်းဒေသကြီးအစိုးရ၏အစီအစဥ်ဖြင့် ရတ်သိမ်းဆဲနှင့် ရိတ်သိမ်းရန် ကျန်ရှိသော လယ်များကို စာရင်းပြုစုပြီး ပေးပို့ထားပြီးဖြစ်ကြောင်း၊ လတ်တလောအနေဖြင့် တစ်ဧကလျှင် နှစ်ဂါလံနှုန်း ရောင်းချပေးနေသောကြောင့် အနည်းငယ်ခံသာမှုရှိသော်လည်း လိုအပ်သလောက် ရောင်းချပေးနိုင်ခြင်းမရှိသေးကြောင်း၊ အစိုးသစ်အနေဖြင့် တောင်သူများကို ဦးစားပေးပြီး ကြည့်ရှုပေးပါရန် ဧရာ၀တီတိုင်းဒေသကြီး၊ ပေါက်ကုန်းကျေးရွာအုပ်စု၊ အုပ်ချုပ်ရေးမှူး ဦးတင်သန်းက ပေါ်ပြူလာနယူးစ်သို့ ပြောသည်။
လတ်တလောကြုံတွေ့နေရသည့် စက်သုံးဆီအခက်အခဲကို အဆင်ပြေစေရန်
ဖြေရှင်းပေးစေလိုကြောင်း၊ ယင်းသို့မဟုတ်ဘဲ လက်ရှိအတိုင်း စက်သုံးဆီအခက်အခဲများ ဆက်ရှိနေပါက လာမည့်မိုးရာသီတွင် မိုးစပါးစိုက်ပျိုးမည့်တောင်သူများ စိုက်ဧကလျော့သွားနိုင်ကြောင်းသိရသည်။
“”တစ်ချို့လယ်တွေ မထွန်ယက်ပဲနဲ့တောင် ဒီအတိုင်းကြဲတာမျိုးတွေအထိ ရှိလာနိင်တယ်””ဟု လယ်ဧက ၇၀ကျော်လုပ်ကိုင်နေသည့် တောင်သူဦးအေးသောင်းက ပြောသည်။
လက်ရှိအစိုးရသစ်လက်ထက် ဧပြီလ၂၀ရက်တွင် ဧရာဝတီတိုင်းဝန်ကြီးချုပ်က မိုးရာသီကာလအတွင်း စိုက်ပျိုးရေးလုပ်ငန်းများ အချိန်မီဆောင်ရွက်နိုင်ရေး၊ စက်သုံးဆီအချိန်မီရရှိစေရေး၊ သွင်းအားစုများ အချိန်မီရရှိစေရေး မှာကြားထားကြောင်း သိရသည်။
ယင်းသို့မှာကြားထားချက်များအရ တောင်သူများ လက်ရှိကြုံတွေ့နေရသည့်စက်သုံးဆီအခက်အခဲကို စက်သုံးဆီမှအစ သွင်းအားစုများပါ သက်သာသောနှုန်းထားဖြင့် ရောင်းချပေးနိုင်ပါရန် တောင်သူများက တောင်းဆိုထားကြောင်း သိရသည်။