ဂျပန်မှာ ပထမဆုံး အမျိုသမီးဝန်ကြီးချုပ် တက်လာဖွယ်ရှိ

  ဂျပန်နိုင်ငံ၏ အာဏာရ လစ်ဘရယ်ဒီမိုကရက်တစ်ပါတီ(LDP) ခေါင်းဆောင်အဖြစ် ရွေးကောက်တင်မြှောက်ခံလိုက်ရသော ဆာနဲ တာကိုင်ချီသည် နိုင်ငံ့သမိုင်းတွင် နိုင်ငံတော်ကိုဦးဆောင်မည့် ပထမဆုံး အမျိုးသမီးဝန်ကြီးချုပ် ဖြစ်လာဖွယ်ရှိနေပြီဖြစ်သည်။

 ပထမအကျော့မဲပေးမှုတွင် ကိုယ်စားလှယ်လောင်း ငါးဦးစလုံး လုံလောက်သည့်မဲအရေအတွက် မရခဲ့ကြဘဲ စနေနေ့က အဆုံးအဖြတ်မဲပေးမှုတွင်မူ တာကိုင်ချီက ဝန်ကြီးချုပ်ဟောင်း ဂျူနီချီရို ကိုအိဇုမိ၏ သားဖြစ်သော ရှင်ဂျီရို ကိုအိဇုမိကို အနိုင်ရရှိခဲ့ခြင်းဖြစ်သည်။

  ကိုအိဇုမိသာ အနိုင်ရခဲ့ပါက ရာစုနှစ်တစ်ခုအကျော်အတွင်း အသက်အငယ်ဆုံး ဝန်ကြီးချုပ်ဖြစ်လာမည့် အခြေအနေရှိခဲ့သည်။

   အသက် ၆၄ နှစ်အရွယ်ရှိပြီဖြစ်သည့် စီးပွားဖူလုံ‌ေရးဝန်ကြီးဟောင်း တာကိုင်ချီသည် LDP ၏ လက်ယာစွန်းအစုဘက်ကို ယိမ်းသူဖြစ်သည်။

  ဂျပန်၏ နောက်တက်မည့် ဝန်ကြီးချုပ်ကို ရွေးချယ်မည့် လွှတ်တော်၌မဲပေးမှုကို အောက်တိုဘာလ ၁၅ ရက် နေ့တွင် ကျင်းပမည်ဟု မျှော်လင့်ထားသည်။

    LDP သည် လွှတ်တော်တွင် အကြီးဆုံးပါတီအဖြစ် ဆက်လက်တည်ရှိနေသောကြောင့် တာကိုင်ချီအနေဖြင့် ဝန်ကြီးချုပ် ရှီဂီရူ အီရှီဘာ၏ နေရာကို အစားထိုးနိုင်မည်ဟု မျှော်လင့်ထားသည်။ သို့သော်လည်း မကြာသေးမီက ရွေးကောက်ပွဲများအပြီးတွင် LDP ဦးဆောင်သော ညွန်ပေါင်းအဖွဲ့သည် လွှတ်တော်နှစ်ရပ်စလုံးတွင် အများစုနေရာယူထားနိုင်ခြင်းမရှိတော့သောကြောင့် ထိထိရောက်ရောက် လွှမ်းမိုးမှုယူနိုင်ရန်အတွက် အတိုက်အခံအမတ်များနှင့် ပူးပေါင်းဆောင်ရွက်ရန်လိုအပ်မည်ဖြစ်သည်။

  ဝန်ကြီးချုပ်အဖြစ် ရွေးချယ်ခံရပါက တာကိုင်ချီအနေဖြင့် သက်ကြီးရွယ်အိုဦးရေ မြင့်တက်နေမှု၊ ပထဝီနိုင်ငံရေး ကသောင်းကနင်းဖြစ်မှု၊ စီးပွားရေးကျဆင်းမှုနှင့် လူဝင်မှုကြီးကြပ်ရေးဆိုင်ရာ မတည်ငြိမ်မှုများ တိုးပွားလာမှုအပါအဝင် ရှုပ်ထွေးသော ပြဿနာများစွာကို ရင်ဆိုင်ဖြေရှင်းရမည်ဖြစ်သည်။

Ref: အယ်ဂျာဇီးယား