ဂျက်မား အပါအဝင် စီးပွားရေးလုပ်ငန်းရှင်းများနှင့် ရှီ တွေ့ဆုံ

ပေကျင်းအနေဖြင့် စီးပွားရေးနှေးကွေးလားမှု၊ အမေရိကနှင့် တင်းမာမှုများ မြင့်တက်လာမှုတို့နှင့် ကြုံနေရသည့်အချိန်တွင် တရုတ်သမ္မတ ရှီကျင့်ဖျင်သည် ဖေဖော်ဝါရီ ၁၇ ရက်က အလီဘာဘာ ပူးတွဲတည်ထောင်သူ ဂျက်မာ အပါအဝင် စီးပွားရေးခေါင်းဆောင်များတက်ရောက်သော စာတမ်းဖတ်ပွဲတစ်ခုတွင် မိန့်ခွန်းပြောကြားခဲ့သည်။

စာတမ်းဖတ်ပွဲသို့ တက်ရောက်ခဲ့သည့် ပုဂ္ဂလိကလုပ်ငန်း ခေါင်းဆောင်များတွင် Huawei တည်ထောင်သူ Ren Zhengfei၊ Xiaomi တည်ထောင်သူ Lei Jun၊ BYD ၏ Wang Chuanfu၊ Unitree ၏ Wang Xingxing နှင့် CATL ၏ Robin Zeng တို့ပါဝင်သည်ကို စီစီတီဗီက ထုတ်လွှင့်ခဲ့သည့် ဗီဒီယိုတွင် တွေ့ရသည်။

ထို့အပြင် Meituan ၏ Wang Xing၊ China Feihe ၏ Leng Youbin နှင့် Will Semiconductor တည်ထောင်သူ Yu Renrong တို့လည်း တက်ရောက်ခဲ့သည်ကို တွေ့ရသည်။

Tencent ၏ Pony Ma သည်လည်း ထိုအစည်းအဝေးတွင် ရှိနေခဲ့သည်ဟု အဆိုပါအကြောင်းအရာနှင့် နီးစပ်သူတစ်ဦးက ပြောသည်။ အစည်းအဝေး အသေးစိတ်ကို လူသိရှင်ကြား ထုတ်ပြန်ခြင်းမရှိ၍ ၎င်းက အမည်ဖော်ခွင့် မပြုပေ။

ပုဂ္ဂလိက ကုမ္ပဏီများမှ ကိုယ်စားလှယ်များ၏ ဆွေးနွေးတင်ပြမှုများအပြီးတွင် မစ္စတာ ရှီက မိန့်ခွန်းပြောကြားခဲ့သည်ဟု နိုင်ငံပိုင် ရှင်းဟွာသတင်းက ဆိုသည်။ ပေကျင်းရှိ ပြည်သူ့ခန်းမတွင် ကျင်းပပြုလုပ်သော အဆိုပါ စားတမ်းဖတ်ပွဲ၏ အသေးစိတ်အကြောင်းအရာများကိုမူ သတင်းတွင် မဖော်ပြခဲ့ပေ။

ပုဂ္ဂလိကကဏ္ဍ သဘောထားအမြင်များကို အားပေးမြှင့်တင်ရန်အတွက် မစ္စတာ ရှီသည် အလီဘာဘာ ပူးတွဲတည်ထောင်သူ ဂျက်မာ အပါအဝင် နိုင်ငံ၏ စီးပွားရေးခေါင်းဆောင်များတက်ရောက်ကြမည့် အစည်းအဝေးတစ်ခုကို ဖေဖော်ဝါရီ ၁၇ ရက်တွင် ပြုလုပ်ရန် စီစဉ်နေသည်ဟု သတင်းရင်းမြစ်များကို ကိုးကား၍ ရိုက်တာက ဖေဖော်ဝါရီ ၁၄ ရက်တွင် ဖော်ပြခဲ့သည်။

အဆိုပါ အစည်းအဝေးသည် ပုဂ္ဂလိက ကဏ္ဍ သဘောထားအမြင်များကို အားပေးမြှင့်တင်ရန် ရည်ရွယ်ပြီး တရုတ်-အမေရိက နည်းပညာစစ်ပွဲအရှိန်မြင့်နေချိန်တွင် ကုမ္ပဏီအကြီးအကဲများအနေဖြင့် ၎င်းတို့၏ လုပ်ငန်းများအား ပြည်တွင်း၌ သာမက နိုင်ငံတကာတွင်ပါ တိုးချဲ့ရန် မစ္စတာရှီက တွန်းအားပေးသွားမည်ဟု မျှော်လင့်ရကြောင်း သတင်းရင်းမြစ်များက ပြောဆိုထားသည်။

Ref: သည်စထရိတ်တိုင်းမ်စ်