ပင်လယ်ငါးလုပ်ငန်းကဏ္ဍ ဖွံ့ဖြိုးတိုးတက်ရေးနှင့် နိုင်ငံတကာစံနှုန်းများနှင့် ကိုက်ညီစေရေးအတွက် ပင်လယ်ငါးလုပ်ငန်းဥပဒေ(မူကြမ်း)ကို ရေးဆွဲလျက်ရှိကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ သိရသည်။
“တည်ဆဲ ငါးလုပ်ငန်းဆိုင်ရာဥပဒေများသည် ပြောင်းလဲလာသော အခြေအနေများနှင့် ခေတ်ကာလအရ လျော်ညီမှုမရှိတော့ခြင်း၊ လက်တွေ့လုပ်ငန်းနယ်ပယ်နှင့် ကွာဟလာခြင်း၊ နိုင်ငံတကာတွင် ကျင့်သုံးနေသည့် ဥပဒေ၊ နည်းဥပဒေများနှင့် လိုက်လျောညီထွေမှု အားနည်းလာခြင်းတို့ကြောင့် ပင်လယ်ငါးလုပ်ငန်းဥပဒေ(မူကြမ်း)ကို ရေးဆွဲရခြင်းဖြစ်ကြောင်း” စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဒေါက်တာရဲထွန်းဝင်းက ပြောကြားခဲ့သည်။
ယင်းပြောကြားချက်ကို ယမန်နေ့က ကျင်းပသည့် ပင်လယ်ငါးလုပ်ငန်းဥပဒေ(မူကြမ်း)နှင့် စပ်လျဉ်းသော ညှိနှိုင်းအစည်းအဝေးတွင် ပြောကြားခဲ့ခြင်းဖြစ်ကြောင်း သိရသည်။
အဆိုပါအစည်းအဝေးသို့ ဥပဒေရေးရာဝန်ကြီးဌာန ပြည်ထောင်စုဝန်ကြီးနှင့် ပြည်ထောင်စုရှေ့နေချုပ် ဒေါက်တာသီတာဦး၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဒေါက်တာရဲထွန်းဝင်းတို့ တက်ရောက်ခဲ့ကြောင်း သိရသည်။
ဆွေးနွေးမှုများအတွင်း စိုက်ပျိုးရေးနှင့် မွေးမြူရေးကို အခြေခံသည့်နိုင်ငံဖြစ်သည့်အတွက် ဥပဒေ(မူကြမ်း)များသည် စိုက်ပျိုးမွေးမြူရေးလုပ်ငန်းများကို အားပေးမြှင့်တင်နိုင်ရန် လိုအပ်ကြောင်း၊ နိုင်ငံတော်အကြီးအကဲ၏ လမ်းညွှန်ချက်နှင့် ယခင်လွှတ်တော်တွင် ပြဋ္ဌာန်းရန်ကျန်ရှိနေသည့် ဥပဒေများအနက် အရေးကြီးပြီး သင့်တင့်သည့် ဥပဒေများကို လာမည့်လွှတ်တော်တွင် တင်ပြနိုင်ရေးအတွက် ဝန်ကြီးဌာနများက ကြိုတင်ပြင်ဆင်ထားရန် လိုအပ်ကြောင်း ဆွေးနွေးခဲ့ကြသည်။
ထို့ပြင် ပင်လယ်ငါးလုပ်ငန်းဥပဒေ(မူကြမ်း)ကို လက်ရှိကာလအခြေအနေနှင့် ကိုက်ညီစေရန် ပြင်ဆင်ညှိနှိုင်းပြီးနောက် ဥပဒေပြဋ္ဌာန်းနိုင်ရေး လုပ်ငန်းစဉ်များအတိုင်း ဆက်လက်ဆောင်ရွက်သွားမည်ဖြစ်ကြောင်း သိရသည်။