ရှမ်းပြည်နယ် တောင်ပိုင်း ၊ နမ့်စန် ခရိုင် ၊ ခိုလမ်မြို့၌ရှိသည့် ခိုလမ်ရေပြာအိုင်သို့ ယခုကာလအတွင်း ပြည်တွင်းခရီးသွား အများပြား အပန်းဖြေသွားရောက် လည်ပတ်လျက်ရှိ ကြောင်း သိရသည်။
သဘာဝ ရေထွက်ပေါက်မှ ဖြစ်တည်လာသည့် အဆိုပါ ရေပြာအိုင်သည် ခိုလမ်မြို့၏ အထင်ကရ လည်ပတ်စရာတစ်ခု ဖြစ်လာပြီး ပြည်တွင်း ခရီးသွားများအကြား ရေပန်းစားလာခြင်း ဖြစ်သည်။
“ရှမ်းပြည်ရောက်ရင် သွားကိုသွားလည်သင့်တဲ့နေရာလေး
သူငယ်ချင်းတွေနဲ့ဖြစ်ဖြစ် မိသားစုနဲ့ဖြစ်ဖြစ် အပန်းဖြေလို့ကောင်းတာ” ဟု သွားရောက်လည်ပတ်ခဲ့သူတစ်ဦးက သူ၏ လူမှုကွန်ရက်တွင် မျှဝေထားသည်။
ယင်းရေပြာအိုင်သည် နမ့်စမ်မြို့နှင့် ခိုလမ်မြို့ကြားတည်ရှိပြီး တောင်ကြီးမှဆိုလျှင် ကားဖြင့် အချိန် (၅)နာရီ ကြာလာရောက်ရမည် ဖြစ်ကြောင်း သိရသည်။
လွန်ခဲ့သည့် ဆယ်နှစ်ခန့်က စတင်က မြို့အဆင့်ဖြစ်လာသည့် ခိုလမ်မြို့ကို ဆုံမှတ်ထားကာ ကမ္ဘာကျော် ဟိုက်ပါရေတံခွန်၊ ကျိုင်းတောင်းရေတံခွန်၊ နောင်ဖာကန်စသည်တို့ကိုလည်း တဆင့်သွားရောက်လည်ပတ်နိုင်မည် ဖြစ်သည်။
