ဘန်ကောက်၊ဇန်နဝါရီ ၁၅
ထိုင်းအစိုးရက နိုင်ငံသို့လာကြသည့် ဧည့်သည်များ၏ ယုံကြည်မှုပြန်လည်ရရှိစေရန် နည်းအမျိုးမျိုးဖြင့်ဆောင်ရွက်သွားမည်ဖြစ်ပြီး လက်ရှိအချိန်တွင်လည်း ထိုင်းအာဏာပိုင်များဘက်မှ အစီအစဉ်များကို ဆက်တိုက်ချမှတ်နေကြောင်းသိရသည်။
ထိုင်းဝန်ကြီးချုပ်ပေတုန်တန်က တနင်္လာနေ့ကပြုလုပ်သည့် အစိုးရအဖွဲ့အစည်းအဝေး၌ သက်ဆိုင်ရာအာဏာပိုင်အဖွဲ့အစည်းများအနေဖြင့် နိုင်ငံ၏ ခရီးသွားလုပ်ငန်းပုံရိပ်ကို ထိခိုက်စေနိုင်သည့်ပြဿနာများကို အမြန်ဆုံးနှင့်အထိရောက်ဆုံးဖြေရှင်းရန် ညွှန်ကြားခဲ့ကြောင်းသိရသည်။
အဆိုပါအစည်းအဝေး၌ ခရီးသွားများဘေးကင်းရေးနှင့် ခရီးသွားလာရေးဘေးကင်းမှုအစီအမံများ မြှင့်တင်နိုင်ရန်အတွက် ရဲတပ်ဖွဲ့ဝင်များ အလုံအလောက်ချထားရေးတို့ကိုလည်း ညွှန်ကြားခဲ့ကြောင်းသိရသည်။
နိုင်ငံဖြတ်ကျော်ရာဇဝတ်မှုများနှင့်ပတ်သက်၍ စိုးရိမ်စရာကိစ္စများလျော့ပါးစေရန်အတွက် ရဲတပ်ဖွဲ့တာဝန်ရှိသူများကို ခေါ်ယူကာ အန္တရာယ်ရှိနိုင်သူများကို ကြိုတင်ကာကွယ်ပေးပြီး ကျူးလွန်သူများကိုလည်း ထိထိရောက်ရောက်အရေးယူရန် ညွှန်ကြားထားသည်ဟု ထိုင်းရဲတပ်ဖွဲ့၏အကြီးတန်းအရာရှိတစ်ဦးကပြောကြားခဲ့သည်။
ဆက်လက်၍ထိုင်းနိုင်ငံအနေဖြင့် လူကုန်ကူးမှုတိုက်ဖျက်ရေးအတွက် နိုင်ငံတကာအေဂျင်စီများနှင့် အနီးကပ်ပူးပေါင်းဆောင်ရွက်သွားမည်ဖြစ်ပြီး နယ်စပ်ဖြတ်ကျော်ဂိတ်များတွင်လည်း အထူးစစ်ဆေးရေးဂိတ်များ ဖွင့်လှစ်သွားရန်ရည်မှန်းထားကြောင်းသိရသည်။
ထို့နောက် ခရီးသွားဧည့်သည်များဘေးကင်းရေးအတွက် နိုင်ငံတစ်ဝန်းရှိ ရဲတပ်ဖွဲ့ဝင်များအားပေါင်းစပ်ကာ အကာအကွယ်ပေးရေးစနစ်တစ်ခုတည်ဆောက်ရန်အတွက် ဧည့်သည်များဘေးအန္တရာယ်ကင်းရှင်းရေးစင်တာလည်း ထူထောင်ကြောင်းကြေငြာခဲ့သည်။
ယင်းနောက် ခရီးသွားများအနေဖြင့် အခက်အခဲရှိပါက ရဲတပ်ဖွဲ့ထံ မက်ဆေ့ချ်၊ဓါတ်ပုံနှင့် မိမိတို့၏တည်နေရာများကို တိကျစွာပေးပို့နိုင်မည့် မိုဘိုင်းလ်အပ်ပလီကေးရှင်းများကိုပါ ဒေါင်းလုဒ်ဆွဲထားရန်လည်းသတိပေးထားသည်။
Source : ရှင်းဟွာ