ရှမ်းပြည်နယ် (မြောက်ပိုင်း)၊ ကျောက်မဲမြို့နယ်တွင် မြို့နယ်ပြည်သူ့ကျန်းမာရေးဦးစီးဌာနနှင့်ကျေးလက်ကျန်းမာရေးဌာနများ ပြန်လည်ဖွင့်လှစ်ထားရှိပြီး ပဏာမကျန်းမာရေးစောင့်ရှောက်ခြင်းလုပ်ငန်းများကို အားဖြည့် တိုးမြှင့်ဆောင်ရွက်လျက်ရှိနေသည်ဟု သိရသည်။
လက်ရှိတွင် ကျောက်မဲမြို့နယ်ပြည်သူ့ကျန်းမာရေးဦးစီးဌာနမှ အခြေခံကျန်းမာရေးဝန်ထမ်းများသည် ကျောက်မဲမြို့ပေါ်နှင့် အနီးတစ်ဝိုက်ရှိကျေးရွာများမှ ဒေသခံတိုင်းရင်းသားပြည်သူများအား ကျန်းမာရေးစောင့်ရှောက်မှုပေးခြင်း၊ ကူးစက်ရောဂါကာကွယ်နှိမ်နင်းရေးလုပ်ငန်း၊ ကိုယ်ဝန်ဆောင်မိခင်နှင့် ကလေးရှောက်ရေးလုပ်ငန်း၊ ကျောင်းကျန်းမာရေးလုပ်ငန်းများဆောင်ရွက်ပေးခြင်းနှင့် ကာကွယ်ဆေးထိုးနှံတိုက်ကျွေးခြင်းလုပ်ငန်းများကို ဆောင်ရွက်နေသည်။
ထိုနည်းတူ အသက် (၁၅) နှစ် အောက်ကလေးများအား အထူးအစီအစဉ် (Special Immunization Activities)ဖြင့် ကာကွယ်ဆေးထိုးနှံတိုက်ကျွေးပေးခြင်းစသည်ဖြင့် ကာကွယ်ဆေးထိုးနှံတိုက်ကျွေးခြင်းလုပ်ငန်းများကို ကလေးတိုင်းဆီသို့ရောက်ရှိအောင် နည်းလမ်းမျိုးစုံဖြင့်ဆောင်ရွက်လျက်ရှိသည်ဟုလည်း သိရသည်။
ထို့ကြောင့် ကျောက်မဲမြို့နယ် ပြည်သူ့ကျန်းမာရေးဦးစီးဌာနမှ အခြေခံ ကျန်းမာရေးဝန်ထမ်းများသည် အောက်တိုဘာ (၁၀) ရက်နေ့မှ (၁၄) ရက်နေ့အထိ အသက် (၁၅) နှစ်အောက် စုစုပေါင်း (၁၃၁၈) ဦးကို လိုအပ်သော ကာကွယ်ဆေးများထိုးနှံတိုက်ကျွေးပေးခဲ့ပြီး ဖြစ်ကာ ဒေသခံတိုင်းရင်းသားပြည်သူများ အောက်တိုဘာ (၅) ရက်နေ့မှ (၁၄) ရက်နေ့အထိ လူနာ(၁၃၂၄)ဦးအား လိုအပ်သောကုသမှုများ ဆောင်ရွက်ပေးခဲ့ပြီးဖြစ်ကြောင်း သိရသည်။