ဟာဗားနားမြို့၊မြန်မာသံရုံးယာယီတာဝန်ခံ ဦးဇော်နိုင်ဝင်းသည် ကျူးဘားသံတမန်ကျောင်း (ISRI)၏ ဖိတ်ကြားချက်အရ ကျောင်းသား၊ကျောင်းသူများအား မတ် ၉ ရက်က ဆွေးနွေးပို့ချမှုများပြုလုပ်ခဲ့သည်။
အာဆီယံနှင့်ပတ်သက်၍ သိရှိသင့်သည့်နောက်ခံ သမိုင်းဆိုင်ရာအချက်အလက်များ၊အာဆီယံမှလက်ရှိဆောင်ရွက်နေသည်များ၊ ၂၀၁၄ ခုနှစ် အာဆီယံအလှည့်ကျ ဥက္ကဋ္ဌအဖြစ် မြန်မာနိုင်ငံက တာဝန်ယူစဉ် စိုက်ထူနိုင်ခဲ့သည့် သမိုင်းမှတ်တိုင်များ၊ အာဆီယံအဖွဲ့အတွင်း မြန်မာနိုင်ငံ၏ တက်ကြွစွာ ပူးပေါင်းဆောင်ရွက်မှုများအား ပြောကြားဆွေးနွေးခဲ့သည်။
၂၀၀၅ ခုနှစ်၌စတင်ရေးဆွဲ၍ ၂၀၀၈ ခုနှစ်တွင် အသက်ဝင်ခဲ့သည့် အာဆီယံပဋိညာဉ်စာတမ်း ရေးဆွဲရေးလုပ်ငန်းများ၌ ကြုံတွေ့ခဲ့ရသည့် အတွေ့အကြုံကောင်းများနှင့်အာဆီယံနှင့်ကမ္ဘာလုံးဆိုင်ရာ မျက်မှောက်အခြေအနေများကြား အာဆီယံ၏ စည်းလုံးညီညွတ်မှုကို ဆက်လက်ထိန်းသိမ်းရေးတို့ကိုလည်း ဆွေးနွေးပို့ချခဲ့သည်။
ISRI ၏ကျောင်းအုပ်ကြီး သံအမတ်ကြီး Rogelio Sierra Díaz၊ ကျူးဘားနိုင်ငံခြားရေးဝန်ကြီးဌာန၊ နိုင်ငံရေးရာဦးစီးဌာနတာဝန်ခံ ညွှန်ကြားရေးမှူး သံအမတ်ကြီး Alberto Jesús Blanco Silva၊ နိုင်ငံခြားရေးဝန်ကြီးဌာနမှအရာရှိများ၊အာဆီယံသံရုံးများမှသံတမန်များနှင့် ISRI ၏ ကျောင်း သား၊ကျောင်းသူများ တက်ရောက်ခဲ့ကြသည်။
