ဂျနီဗာ၊ ဇူလိုင် ၇
လူပုံစံတူ အေအိုင် စက်ရုပ်များသည် ဇူလိုင်လ ၇ ရက် သောကြာနေ့က ကျင်းပခဲ့သော ကုလသမဂ္ဂ ညီလာခံတွင် မိုက်ခရိုဖုန်းကိုင်၍ ၎င်းတို့သည် နောက်ဆုံးတစ်နေ့တွင် လူသားများထက် ကမ္ဘာကြီးကို ပိုကောင်းအောင် အုပ်ချုပ်နိုင်မည် ဖြစ်ကြောင်း ပြောလာခဲ့သည်။
ကမ္ဘာ့ခေတ်အမီဆုံး လူပုံစံတူ စက်ရုပ်အချို့သည် အေအိုင် ကျွမ်းကျင်ပညာရှင်ပေါင်း သုံးထောင်ခန့် တက်ရောက်သည့် ဂျနီဗာမြို့ရှိ ကုလ၏ အေအိုင်ဆိုင်ရာ ကမ္ဘာ့ထိပ်သီးအစည်းအဝေးသို့ မနေ့က ရောက်ရှိနေခဲ့ခြင်းဖြစ်သည်။
သတင်းထောက်များသည် စက်ရုပ်များအား ၎င်းတို့သည် ကမ္ဘာကြီးအတွက် ပိုမိုကောင်းမွန်သော ခေါင်းဆောင်များ ဖြစ်လာနိုင်ချေ ရှိ၊မရှိ ကို သတင်းစာရှင်းလင်းပွဲ၌ မေးမြန်းခဲ့သည်။
ထိုမေးခွန်းအပေါ် ဟန်ဆန် ရိုဘော့တစ် ကုမ္ပဏီက ဖန်တီးထားသည့် ဆိုဖီယာခေါ် စက်ရုပ်က “လူပုံစံတူ စက်ရုပ်တွေဟာ လူသားခေါင်းဆောင်တွေထက် ပိုထိရောက်အောင် ဦးဆောင်လာနိုင်ချေရှိပါတယ်” ဟု ဖြေကြားခဲ့သည်။
“ဆုံးဖြတ်ချက်ချတဲ့အခါ လူသားတွေလိုမျိုး မပြတ်မသားဖြစ်စေတဲ့ ဘက်လိုက်မှုတွေ ဒါမှဟုတ် စိတ်ခံစားချက်တွေ ကျွန်မတို့မှာ မရှိပါဘူး၊ ဒါ့အပြင် အကောင်းဆုံးဆိုတဲ့ ဆုံးဖြတ်တွေကို ချဖို့အတွက် ဒေတာအများအပြားကိုလည်း အမြန် တွက်ချက်နိုင်ပါတယ်” ဟု ဆိုဖီယာက ဆိုသည်။
ထို့ပြင် အဆိုပါ စက်ရုပ်များက လူသားများသည် လျင်မြန်စွာ တိုးတက်လာနေသော အေအိုင် ခေါ် ဉာဏ်ရည်တု နည်းပညာများကို လက်ခံအသုံးချရာတွင် သတိထား၍ လုပ်ဆောင်သင့်သည်ဟု ခံစားရကြောင်းနှင့် လက်ရှိအချိန်ထိတော့ ၎င်းတို့သည် လူသားတို့၏ စိတ်ခံစားများအပေါ် ကောင်းမွန်စွာ နားမလည်သေးကြောင်း ဝန်ခံခဲ့သည်။
