အမေရိကန်နိုင်ငံခြားရေးဝန်ကြီး မာကို ရူဘီယိုက ဗီယက်နမ်နိုင်ငံခြားရေးဝန်ကြီး Bui Thanh Son နှင့် ဖုန်းခေါ်ပြောဆိုရာတွင် ဗီယက်နမ်အနေဖြင့် အမေရိကနှင့် ကုန်သွယ်ရေးမညီမျှမှုများကို ဖြေရှင်းဆောင်ရွက်ရန် တိုက်တွန်းခဲ့သည်။
ရူဘီယိုနှင့် ဒုတိယဝန်ကြီးချုပ်လည်းဖြစ်သော Son တို့သည် တောင်တရုတ်ပင်လယ်တွင် တရုတ်နိုင်ငံ၏ ရန်လိုသည့် အပြုအမူများအပါအဝင် ဒေသတွင်း အရေးကိစ္စများကို ဆွေးနွေးခဲ့ကြသည်ဟု အမေရိကန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ တမ်မီဘရုစ်က သောကြာနေ့က ပြောကြားခဲ့သည်။
“ကျွန်တော်တို့ရဲ့ စီးပွားရေးပူးပေါင်းဆောင်ရွက်မှုတွေကို ချီးကျူးခဲ့သလို ကုန်သွယ်ရေး မညီမျှမှုကို ဖြေရှင်းဖို့ရာလည်း ဝန်ကြီးက ဗီယက်နမ်ကို တိုက်တွန်းခဲ့ပါတယ်” ဟု သူက ပြောသည်။
နိုင်ငံသည် အမေရိကနှင့် ကုန်သွယ်ရာတွင် ကုန်သွယ်ရေးပိုငွေပြမှုကို ပြန်လည်ဟန်ချက်ညီစေရန် ဖြေရှင်းမှုများလုပ်ဆောင်နေသည်ဟု အင်္ဂါနေ့က ဒါဗိုတွင် ပြုလုပ်သည့် ကမ္ဘာ့စီးပွားရေးဖိုရမ်တွင် ဗီယက်နမ်ဝန်ကြီးချုပ် Pham Minh Chinh က ပြောကြားခဲ့သည်။ ယင်းသို့လုပ်ဆောင်ရာတွင် ဘိုရင်းကုမ္ပဏီထုတ် လေယာဉ်များ ဝယ်ယူရန် ကတိပြုထားကြောင်းနှင့် အခြား အမေရိကန်နည်းပညာမြင့်ပစ္စည်းများကို ဝယ်ယူရန် စိတ်ဝင်စားကြောင်း ဖော်ပြခဲ့သည်။
ဗီယက်နမ်သည် ကမ္ဘာတွင် ကုန်သွယ်မှုကို မှီခိုအားထားပြုရဆုံးနိုင်ငံများတွင် ပါဝင်ပြီး ပို့ကုန်တင်ပို့မှုသည် နိုင်ငံစီးပွားရေးတစ်ခုလုံး၏ ၈၅ ရာခိုင်နှုန်းခန့်ကို ကိုယ်စားပြုသည်။ နိုင်ငံသည် ၂၀၂၃ ခုနှစ်တွင် အမေရိကနှင့် ကုန်သွယ်မှု၌ ဒေါ်လာ ၁၀၀ ဘီလျံခန့် ပိုငွေပြခဲ့ပြီး ယင်းသည် သမ္မတဒေါ်နယ်ထရမ့်ပ်၏ မူဝါဒများအတွက် ဖြစ်နိုင်ခြေရှိသော ပစ်မှတ်ဖြစ်လာစေခဲ့သည်။
အမေရိက-ဗီယက်နမ် ဆက်ဆံရေးနှစ် ၃၀ ပြည့် အထိမ်းအမှတ်နှင့် ဘက်စုံ မဟာဗျူဟာ မိတ်ဖက်ဆက်ဆံရေးအောက်တွင် တိုးတက်ခဲ့မှုများကို နှစ်နိုင်ငံတာဝန်ရှိသူများက ဂုဏ်ပြုခဲ့ကြသည်ဟု ဘရုစ်က ပြောကြားခဲ့သည်။
Ref: ယဟျူးနူးစ်