ကိုရီးယားနိုင်ငံသို့ ရောက်ရှိနေသည့် မြန်မာနိုင်ငံသားများ၏ အကျိုးကိစ္စရပ်များနှင့် ပတ်သက်၍ ဆွေးနွေး

ကိုရီးယားနိုင်ငံသို့ ရောက်ရှိနေသည့် မြန်မာနိုင်ငံသားများ၏ အကျိုးကိစ္စရပ်များနှင့် ပတ်သက်၍ မြန်မာသံအမတ်ကြီး ဦးသန့်စင်က ကိုရီးယားသမ္မတနိုင်ငံ၊ နိုင်ငံခြားရေးဝန်ကြီး ဌာန၊ ဒုတိယဝန်ကြီး (ပထမ)နှင့် တွေ့ဆုံစဉ် ဆွေးနွေးခဲ့ကြောင်း နိုင်ငံခြားရေးဝန်ကြီးဌာန၏ ထုတ်ပြန်ချက်အရ သိရသည်။

ကိုရီးယားသမ္မတနိုင်ငံ၊ နိုင်ငံခြားရေးဝန်ကြီးဌာန၊ ဒုတိယဝန်ကြီး (ပထမ) (First Vice Minister) H.E. Mr. Kim Hong Kyun မှ ၂၀၂၅ ခုနှစ်၊ ဖေဖော်ဝါရီ (၅) ရက်က ဆိုးလ်မြို့ရှိ Lotte Hotel ၌ ပြုလုပ်သည့် အလုပ်သဘောနေ့လယ်စာစားပွဲသို့ ဆိုးလ်မြို့အခြေစိုက်၊ အာဆီယံသံရုံးများမှ သံအမတ်ကြီးများနှင့် သံရုံးအကြီးအကဲများနှင့်အတူ မြန်မာသံအမတ်ကြီး ဦးသန့်စင်မှ ပါဝင်တက်ရောက်ခဲ့ကြောင်း သိရသည်။

ထိုသို့ တက်ရောက်ခဲ့ပြီး အာဆီယံသံအမတ်ကြီးများက ပါဝင်ဆွေးနွေးမှုများတွင် မြန်မာသံအမတ်ကြီး ဦးသန့်စင်က အာဆီယံနိုင်ငံများအနေဖြင့် KASI အောက်မှ အဓိကလိုအပ်လျက်ရှိသည့် ပူးပေါင်းဆောင်ရွက်မှုများ၊ နှစ်နိုင်ငံ သံတမန်ဆက်ဆံရေးကိစ္စရပ်များနှင့် ကိုရီးယားနိုင်ငံသို့ ရောက်ရှိနေသည့် မြန်မာနိုင်ငံသားများ၏ အကျိုးကိစ္စရပ်များကို ထည့်သွင်းဆွေးနွေးခဲ့ကြောင်း သိရသည်။

အလုပ်သဘောနေ့လယ်စာစားပွဲတွင် ဒုတိယဝန်ကြီး(ပထမ) က ကိုရီးယားသမ္မတနိုင်ငံ၏ ပြည်တွင်းနိုင်ငံရေး အခြေအနေ၊ အာဆီယံနှင့် ကိုရီးယားသမ္မတနိုင်ငံတို့အကြား ဘက်စုံမဟာဗျူဟာမြောက် မိတ်ဖက် ဆက်ဆံရေးသို့ မြှင့်တင်နိုင်ခဲ့ပြီဖြစ်၍ Korea-ASEAN Solidarity Initiative – KASI အောက်မှ ပူးပေါင်းဆောင်ရွက်မှုများ မြှင့်တင်သွားမည့်ကိစ္စနှင့် အာဆီယံတစ်နိုင်ငံချင်းစီနှင့် ဆက်ဆံရေး တိုးမြှင့်သွားနိုင်ရေးကိစ္စရပ်များကို ထည့်သွင်းဆွေးနွေးခဲ့ကြကြောင်း သိရသည်။