ဂျပန်နိုင်ငံသို့ ကာလတိုနေထိုင်ခွင့်ဗီဇာလျှောက်ထားကာ အသက်မွေးဝမ်းကြောင်းပြုခြင်း၊ အလုပ်အကိုင်များ ပြုလုပ်ပါက ရာဇဝတ်ပြစ်မှုအဖြစ် အပြစ်ပေးခံရနိုင်ကြောင်း ဂျပန်သံရုံးက ထုတ်ပြန်ထားသည်။
ကာလတိုနေထိုင်ခြင်း ဗီဇာဆိုသည်မှာ ဂျပန်နိုင်ငံ၏ လူဝင်မှုကြီးကြပ်ရေးနှင့် ဒုက္ခသည်များအသိအမှတ်ပြုရေးဥပဒေအရ ဂျပန်နိုင်ငံတွင် ကာလတိုနေထိုင်၍ ဆောင်ရွက်ရသော Sightseeingအလည်အပတ်၊ ကျန်းမာရေးအတွက် အနားယူအပန်းဖြေခြင်း၊ အားကစား၊ ဆွေမျိုးသားချင်း/အသိမိတ်ဆွေထံ အလည်အပတ်သွားခြင်း၊ လေ့လာရေး၊ သင်တန်း သို့မဟုတ် ဆွေးနွေးပွဲတွင်ပါဝင်တက်ရောက်ခြင်း၊ လုပ်ငန်းပိုင်းဆိုင်ရာဆက်သွယ် ဆောင်ရွက်ခြင်း စသည်တို့သာ အကြုံးဝင်သည်ဟု ဂျပန်သံရုံးက ထုတ်ပြန်ချက်တွင် ပြောသည်။
ထို့အပြင် ဗီဇာလျှောက်ထားရာတွင် တင်ပြသည့်စာရွက်စာတမ်းများမှာ တိကျမှန်ကန်သောစာရွက်စာတမ်းများ ဖြစ်ရန်လိုအပ်ကာ ဂျပန်နိုင်ငံသို့ သွားရောက်မည့် ရည်ရွယ်ချက်ကို လိမ်လည်ဖော်ပြခြင်းနှင့် အတုပြုလုပ်ထားသောစာရွက်စာတမ်းများ တင်ပြသည်ကို တွေ့ရှိရပါက ဗီဇာထုတ်ပေးမည်မဟုတ်ကြောင်းလည်း ဂျပန်သံရုံးက ပြောသည်။
ထိုနည်းတူ ဗီဇာလိမ်လည်လျှောက်ထားသူနှင့် လျှောက်ထားမှုကိုကူညီပြုလုပ်ခဲ့သောကုမ္ပဏီ/အဖွဲ့အစည်းများမှ နောက်နောင်တွင်လျှောက်လာမည့် မည်သည့်ဗီဇာလျှောက်ထားမှုမျိုးတွင်မဆို ယခင်ကမလျော်ကန်သောလျှောက်ထားမှုကို ပြုလုပ်ခဲ့ကြောင်း မှတ်တမ်းဝင်ထားခြင်းသည် ကြီးမားသောအကျိုးသက်ရောက်မှုကို ဖြစ်ပေါ်စေမည်ဟုလည်း ဆိုသည်။
ထို့ကြောင့် အလုပ်လုပ်ခြင်း၊ ကျောင်းတက်ခြင်းစသည့် ရည်ရွယ်ချက်ဖြင့် ဂျပန်နိုင်ငံသို့ ကာလလတ်၊ ကာလရှည် သွားရောက်ရန်ဆန္ဒရှိသူများသည် ဂျပန်နိုင်ငံ လူဝင်မှုနေထိုင်ခွင့်ကြီးကြပ်ရေးဌာနတွင် ကြိုတင်၍ ကာလရှည်နေထိုင်ခွင့်လက်မှတ် (COE)ကို ရယူပြီးမှသာ ဗီဇာလျှောက်ထားရမည်ဖြစ်ကြောင်း ဂျပန်သံရုံးက ထုတ်ပြန်ထားသည်။