ကာတာနိုင်ငံမှ ကုမ္ပဏီများ မြန်မာနိုင်ငံရေနံသဘာဝ ဓာတ်ငွေ့ ရှာဖွေတူးဖော်ခြင်းလုပ်ငန်းများတွင် လာရောက် ရင်းနှီးမြှုပ်နှံရန်ဆွေးနွေး

မြန်မာနိုင်ငံရှိ ကုန်းပိုင်းနှင့် ကမ်းလွန်ရေနံသဘာဝဓာတ်ငွေ့ ရှာဖွေတူးဖော်ခြင်းလုပ်ငန်းများတွင် ကာတာနိုင်ငံမှ ကုမ္ပဏီများ လာရောက်ရင်းနှီးမြှုပ်နှံရန် စွမ်းအင်ဝန်ကြီးဌာန ပြည်‌ထောင်စုဝန်ကြီး ဦးကိုကိုလွင်နှင့် ကာတာနိုင်ငံ ဒုတိယဝန်ကြီးချုပ်နှင့် ကာကွယ်ရေးဝန်ကြီးဟောင်း Dr. Khalid Bin Mohammed Al Attiyah တို့ နေပြည်တော်၌ တွေ့ဆုံဆွေးနွေးခဲ့ကြောင်း သိရသည်။

မြန်မာနိုင်ငံသည် ပထဝီအနေအထားအရ အရှေ့တောင်အာရှဒေသတွင် အချက်အချာကျသည့် နိုင်ငံတစ်နိုင်ငံဖြစ်ပြီး စွမ်းအင်သယံဇာတများ ပေါကြွယ်ဝသော နိုင်ငံတစ်နိုင်ငံဖြစ်၍ စွမ်းအင်ကဏ္ဍ၌ ရင်းနှီးမြှုပ်နှံနိုင်မည့် အခွင့်အလမ်းများစွာရှိကြောင်း မြန်မာနိုင်ငံတွင် အလားအလာကောင်း သောကုန်းပိုင်းနှင့် ကမ်းလွန်လစ်လပ် လုပ်ကွက်များတွင် ရေနံနှင့်သဘာဝဓာတ်ငွေ့ ရှာဖွေ၊ တူးဖော်၊ ထုတ်လုပ်ခြင်းလုပ်ငန်းများနှင့် သဘာဝဓာတ်ငွေ့ ပိုက်လိုင်းများအဆင့်မြှင့်တင် တည်ဆောက်ခြင်းလုပ်ငန်းများတွင် ကာတာနိုင်ငံမှ ကုမ္ပဏီများအနေနဲ့ ရင်းနှီးမြှုပ်နှံ ဆောင်ရွက်ရန် ဖိတ်ခေါ်လိုကြောင်း ပြည်ထောင်စုဝန်ကြီးက ဆိုသည်။

ကာတာနိုင်ငံသည် ရေနံနှင့်သဘာဝဓာတ်ငွေ့ ပေါကြွယ်ဝပြီး ကမ္ဘာ့အဓိက LNG ထုတ်လုပ်သူနှင့် တင်ပို့သူဖြစ်သဖြင့် LN G ကဏ္ဍတွင် ပူးပေါင်းဆောင်ရွက်လိုကြောင်း၊ မြန်မာနိုင်ငံကို LNG Trading Hub အဖြစ် ဆောင်ရွက်၍ တရုတ်နိုင်ငံနှင့် အရှေ့တောင်အာရှရှိနိုင်ငံများသို့ လိုအပ်သည့် သဘာဝ ဓာတ်ငွေ့များကို ပေးပို့ဖြန့်ဖြူးပေးနိုင်မည့် အခွင့်အလမ်းများရှိကြောင်း ဆွေးနွေးပြောကြားခဲ့သည်။

မြန်မာ၏ ရေနံမြေများကနေ နှစ်စဉ်ရေနံထွက်ကုန်ပစ္စည်းမျိုးစုံကို အစိုးရထုတ်လုပ်မှုအပြင် ပုဂ္ဂလိက၊ နိုင်ငံခြားရင်းနှီးမြုပ်နှံ သူများနှင့်ပါ ပူးပေါင်းထုတ်လုပ်လျှက်ရှိရာ ရုရှ သည်လည်း စွမ်းအင်ကဏ္ဍတွင် လာရောက်ရင်းနှီးမြှုပ်နှံလျှက်ရှိသည်။