ရုရှားသမ္မတ ဗလာဒီမီယာ ပူတင်သည် နိုင်ငံတော်အဆင့် ခရီးစဉ် အဖြစ် ကာဇက်စတန်နိုင်ငံသို့ သွားရောက်မည် ဖြစ်သည်။
“ဒီခရီးစဉ်ဟာ (ပူတင်ရဲ့) ကာဇက်စတန်နိုင်ငံသို့ ဒုတိယအကြိမ်မြောက် နိုင်ငံတော်အဆင့် ခရီးစဉ်ဖြစ်ပါတယ်။ ကျွန်တော်တို့ ကာဇက်စတန် မိတ်ဆွေတွေရဲ့ အကြံပြုချက်အရ နှစ်နိုင်ငံကြားမှာ မကြုံစဖူး ထူးခြားကောင်းမွန်နေတဲ့ ဆက်ဆံရေးအဆင့်အတန်းကို ပေါ်လွင်စေဖို့ ရည်ရွယ်ပါတယ်”ဟု ရုရှားသမ္မတ၏ လက်ထောက်ဖြစ်သူ ယူရီ အူရှာကော့ဗ် (Yury Ushakov) က ပြောကြားသည်။
ပူတင်၏ ကာဇက်စတန် ခရီးစဉ်သည် မေလ ၂၇ ရက်မှ ၂၉ ရက်အထိ ၃ ရက်ကြာမြင့်မည်ဖြစ်သည်။ ၎င်းသည် မေလ ၂၈-၂၉ ရက်များတွင် အက်စတာနာမြို့၌ ကျင်းပမည့် ယူရေးရှား စီးပွားရေးသမဂ္ဂ (EAEU) ထိပ်သီးအစည်းအဝေး (သို့မဟုတ်) အမြင့်ဆုံး ယူရေးရှား စီးပွားရေးကောင်စီ (Supreme Eurasian Economic Council) အစည်းအဝေးများနှင့် တိုက်ဆိုင်နေသည်။
လွန်ခဲ့သည့် ၂၆ နှစ်တာကာလအတွင်း ပူတင်သည် ကာဇက်စတန်နိုင်ငံသို့ ၃၃ ကြိမ်တိုင်တိုင် သွားရောက်ခဲ့ဖူးသည်။ ကာဇက်စတန်နိုင်ငံသို့ သူ၏ ပထမဆုံးသော ခရီးစဉ်ကို သမ္မတအဖြစ် ပထမဆုံး တာဝန်ထမ်းဆောင်သည့် နှစ်ဖြစ်သော ၂၀၀၀ ပြည့်နှစ်၊ အောက်တိုဘာလတွင် သွားရောက်ခဲ့ခြင်းဖြစ်သည်။