မြန်မာနိုင်ငံကအိမ်ရှင်အဖြစ်လက်ခံ၍ လာမည့် ဇွန် ၃ ရက်မှစတင်ကျင်းပမည့် AYA Tri-Nation Cup 2026 ပြိုင်ပွဲအား မြန်မာ့လက်ရွေးစင်အမျိုးသမီးအသင်း၏ အဓိကကစားသမား တိုက်စစ်မှူးဝင်းသိင်္ဂီထွန်းသည် ကျန်းမာရေးအခြေအနေကြောင့်လွဲချော်နိုင်ခြေရှိနေ သည်။
လက်ရှိအချိန်၌ ဝင်းသိင်္ဂီထွန်းသည် မြန်မာ့လက်ရွေးစင် အမျိုးသမီးအသင်း၏ ပဏာမလူစာရင်းတွင်ရွေးချယ်ခံထားရသော်လည်း ကျန်းမာရေးအခြေအနေကြောင့် အသင်းနှင့်အတူပူးပေါင်းနိုင်ခြင်းမရှိဘဲ အနားယူနေရသည်။
” ဝင်းသိင်္ဂီထွန်းက ဒဏ်ရာကြောင့်မဟုတ်ဘဲ ကျန်းမာ ရေးကိစ္စကြောင့် အသေးစားခွဲစိတ်မှုတစ်ခုခံယူထားရပါတယ်။ ခွဲစိတ်မှုအပြီး ပြန်လည်သက်သာလာဖို့အလတွက် တစ်လခွဲခန့်သီးသန့်အနားယူရမှာဖြစ်ပါတယ်”ဟု မြန်မာ့လက်ရွေးစင်အမျိုးသမီးအသင်းဆရာဝန် ပြောကြားထားသည်။
မြန်မာ့လက်ရွေးစင်အမျိုးသမီးအသင်းသည် AYA Tri- Nation Cup ပြိုင်ပွဲအဖြစ် ဇွန် ၃ ရက်တွင် ဥဇဘက်ကစ္စတန်အသင်း၊ ဇွန် ၉ ရက်တွင် ထိုင်းအသင်းတို့နှင့် ရန်ကုန်မြို့ရှိ သုဝဏ္ဏအားကစားကွင်း၌ယှဉ်ပြိုင်ကစားသွားရမည်ဖြစ်သည်။