ကာကွယ်ရေးဦးစီးချုပ်ရုံး (ကြည်း၊ ရေ၊ လေ) မိသားစုများ၏ ၂၀၂၅ ခုနှစ် မဟာဘုံကထိန်အလှူတော်မင်္ဂလာအား ယနေ့ အောက်တိုဘာ ၂၉ ရက်နံနက်ပိုင်းက နေပြည်တော်၌ကျင်းပရာ နိုင်ငံတော်သံဃမဟာနာယကအဖွဲ့ဥက္ကဋ္ဌ သန်လျင်မင်းကျောင်းဆရာတော်၊ နိုင်ငံတော်သံဃမဟာနာယကအဖွဲ့ အကျိုးတော်ဆောင် မန္တ လေးမြို့၊ မစိုးရိမ်တိုက်သစ်ဆရာတော်၊ ဥပ္ပါတသန္တိစေတီတော်ဂေါပကအဖွဲ့၏ ဩဝါဒါစရိယဆရာတော်ကြီးများအမှူးပြုသည့် ဆရာတော်(၂၇)ပါးကြွရောက်ချီးမြှင့်တော်မူခဲ့ကြကြောင်း သိရသည်။
မြန်မာနိုင်ငံတော် ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်နှင့် ဇနီးဒေါ်ကြူကြူလှတို့တက်ရောက်၍ ဘုန်းတော်ကြီးကျောင်းအသီးသီးသို့လှူဒါန်းရန်ခင်းကျင်းပြင်ဆင်ထားသည့် ကထိန်လျာသင်္ကန်း၊ လှူဖွယ်ပစ္စည်းများနှင့် ပဒေသာပင်များအားကြည့်ရှုခဲ့ကြကြောင်း သိရသည်။
ထို့နောက် သန်လျင်မင်းကျောင်းဆရာတော်ကြီးထံမှ ယာယီသမ္မတနှင့် ဇနီးတက်ရောက်လာကြသူများက ကိုးပါးသီလခံယူဆောက်တည်ပြီး ဆရာတော်ကြီးများက မေတ္တာသုတ်ပရိတ်တရားတော်များကို ရွတ်ပွားချီးမြှင့်တော်မူခဲ့ကြကြောင်း သိရသည်။
ထို့ပြင် ယာယီသမ္မတနှင့် ဇနီးတို့မှ ကထိန်ခံ နေပြည်တော်၊ ဇေယျာသီရိမြို့နယ်၊ ရေဆင်းကန်ဦးကျောင်း ဆရာတောထံ ကထိန်လျာသင်္ကန်း၊ နိုင်ငံတော်သံဃမဟာနာယကအဖွဲ့ဥက္ကဋ္ဌ သန်လျင်မင်းကျောင်းဆရာတော်ကြီးထံ ကထိန်သင်္ကန်းနှင့် လှူဖွယ်ပစ္စည်းများကိုဆက် ကပ်လှူဒါန်းခဲ့ကြကြောင်း သိရသည်။
ထို့အတူ နိုင်ငံတော်သံဃမဟာနာယကအဖွဲ့ အကျိုးတော်ဆောင် မန္တလေးမြို့၊ မစိုးရိမ်တိုက်သစ်ဆရာတော်ထံမှ ကထိန်အနုမောဒနာတရားနာယူကြပြီး လှူဒါန်းမှုအစုစုအတွက် ရေစက်သွန်းချအမျှပေးဝေခဲ့ကြကြောင်း သိရသည်။
ယနေ့ ကျင်းပသော ကာကွယ်ရေးဦးစီးချုပ်ရုံး(ကြည်း၊ ရေ၊ လေ)မိသားစုများ၏ ၂၀၂၅ ခုနှစ် မိသားစုမဟာဘုံ ကထိန်အလှူတော်မင်္ဂလာတွင် ရုံး၊ ဌာနအသီးသီးမှ ပဒေသာပင်ပေါင်း(၉၀)ပင်၊ ပစ္စည်းတန်ဖိုးငွေကျပ် (၁၇၀,၈၄၀,၈၁၀)နှင့် ငွေသားတန်ဖိုးငွေကျပ် (၁၂၅,၀၅၃,၄၅၀) စုစုပေါင်းတန်ဖိုးငွေကျပ် (၂၉၅,၈၉၄,၂၆၀)ကိုလှူဒါန်းခဲ့ကြပြီး သက်ဆိုင်ရာ ဘုန်းတော်ကြီးကျောင်းအသီးသီးသို့ ရုံး၊ ဌာနများအလိုက်ဆက်လက်ပို့ဆောင်လှူဒါန်းခဲ့ကြကြောင်း သိရသည်။