ဘားအံ၊ စက်တင်ဘာ ၁၅
ကရင်ပြည်နယ်၊ ဘားအံမြို့နယ်၊ ကော့သင်းဆူးကျေးရွာအုပ်စု၊ လှိုင်ကားကျေးရွာရှိ လှိုင်ကားရေတံခွန်အား ခရီးစဉ်ဒေသသစ်အဖြစ် ဖော်ဆောင်နိုင်ရန် ပြင်ဆင်နေသည်။
ထို့ကြောင့် ခရီးသွားဧည့်သည်များ စနစ်တကျ လာရောက်လည်ပတ်နိုင်ရေးအတွက် ဒေသဆိုင်ရာ ခရီးသွားလုပ်ငန်းကော်မတီ ဒုတိယဥက္ကဋ္ဌ၊ ပြည်နယ်စီးပွားရေးရာဝန်ကြီး ဦးညီညီဇော်နှင့် တာဝန်ရှိသူများသည် စက်တင်ဘာ ၁၄ ရက်က မြေပြင်ကွင်းဆင်း ကြည့်ရှုစစ်ဆေးခဲ့ကြောင်း လည်းသိရသည်။
ထိုသို့ ကွင်းဆင်းကြည့်ရှုရာတွင် ပြည်နယ်ဝန်ကြီးနှင့်အတူ ဟိုတယ်နှင့်ခရီးသွားညွှန်ကြားမှုဦးစီးဌာန (ကရင်ပြည်နယ်ရုံးခွဲ) ညွှန်ကြားရေးမှူး၊ ပြည်နယ်သစ်တောဦးစီးဌာန၊ မြို့နယ်အထွေထွေအုပ်ချုပ်ရေးဦးစီးဌာနတို့မှ တာဝန်ရှိသူများ၊ ကျေးရွာအုပ်ချုပ်ရေးမှူးနှင့် ရပ်မိရပ်ဖများ ပါဝင်ခဲ့ကြသည်။
ထို့နောက် ရေတံခွန်ဝန်းကျင် သာယာလှပရေး၊ ခရီးသွားများ ဘေးကင်းလုံခြုံစွာ လာရောက်လည်ပတ်နိုင်ရေးတို့အတွက် လိုအပ်သည်များ မှာကြားပေါင်းစပ်ညှိနှိုင်းပေးခဲ့ကြောင်း သိရသည်။