ကမ္ဘောဒီးယားတော်ဝင် မင်းသမီး ကေပေါ့ပ်ဘက်ကူးမည်မဟုတ်

ကမ္ဘောဒီးယားတော်ဝင်မင်းသမီး ဂျန်နာသည် သာမန် ၁၂ နှစ်အရွယ် မိန်းကလေးမျိုးတော့ မဟုတ်ပေ။

ရုပ်ရည်ချောမောလှပမှု၊ ဘာသာစကားမျိုးစုံ တတ်ကျွမ်းမှု၊ ဖျော်ဖြေတင်ဆက်မှုစွမ်းရည်များကြောင့် လူသိများသော သူသည် အသက်ခြောက်နှစ်အရွယ်ကတည်းက showbiz တွင် ပါဝင်ခဲ့ပြီး တွစ်တာတွင် ဖော်လိုဝါ ၃ သန်းနှင့် ယူကျူ့တွင် ဖော်လိုဝါ ၁ သန်း ရှိလာခဲ့သူဖြစ်သည်။

မွေးရပ်မြေတွင် လူချစ်လူခင်များရုံသာမက ဂျန်နာသည် ၂၀၂၃ ခုနှစ်ကုန်ပိုင်းက တရုတ်နိုင်ငံပိုင် စီစီတီဗီရုပ်သံတွင် တရုတ်သီချင်းများကို ပြန်လည်သီဆိုပြခဲ့အပြီးတွင် တရုတ်၌လည်း ကျော်ကြားသူတစ်ဦးဖြစ်လာခဲ့သည်။ စက်တင်ဘာလတွင်မှ စအသုံးပြုခဲ့သော သူ၏ Weibo အကောင့်တွင် ပရိသတ် ၂ သောင်းကျော် ရှိနေခဲ့ပြီဖြစ်သည်။

ထိုင်ဝမ်သတင်းဌာနတစ်ခုဖြစ်သည့် SET News က သူ၏ နောက်ခြေလှမ်းမှာ ကေပေါ့ပ်အိုင်ဒဲလ် သင်တန်းသူတစ်ဦးဖြစ်မည်ဟု အောက်တိုဘာ ၁၄ ရက်တွင် သတင်းဖော်ပြခဲ့ပြီးနောက် ဂျန်နာနှင့်ပတ်သက်သော အကြောင်းအရာများသည် သတင်းခေါင်းစီးများ ထပ်ဖြစ်လာခဲ့သည်။ ထိုသတင်းကို တောင်ကိုရီးယားရှိ ဖျော်ဖြေရေးဝက်ဘ်ဆိုက်များက ကျယ်ကျယ်ပြန့်ပြန့်ပြန်လည် ဖော်ပြခဲ့ကြပြီး အရှေ့တောင်အာရှမှ ထူးချွန်သော တော်ဝင်တစ်ဦးသည် Blackpink အဖွဲ့၏ ထိုင်းနိုင်ငံဖွားလီဆာကဲ့သို့ ဒုတိယလီဆာ ထပ်ဖြစ်လာနိုင်သည်ဟု အချို့က ထင်ကြေးပေးခဲ့ကြသည်။

သို့သော်လည်း ဂျန်နာ၏ စီမံခန့်ခွဲရေးအဖွဲ့ကမူ သူသည် ကေပေါ့ပ်ကျော်ကြားမှုနောက်လိုက်တော့မည်ဆိုသော သတင်းများကို ငြင်းပယ်ခဲ့သည်။ အောက်တိုဘာ ၁၅ ရက်က ပြန်ဖျက်သွားသော Weibo ပို့စ်တစ်ခုတွင် ဂျန်နာသည် ၂၀၂၃ ခုနှစ်တွင် ကိုရီးယားဖျော်ဖြေရေးအေဂျင်စီတစ်ခု၏ ဖိတ်ခေါ်မှုကို လက်ခံရရှိခဲ့သော်လည်း ကမ်းလှမ်းမှုကို ငြင်းပယ်ခဲ့သည်ဟု သူ၏ အဖွဲ့က ပြောဆိုထားသည်။

သူကိုယ်တိုင်ကလည်း သူသည် ဂီတကို နှစ်သက်ပြီး ပထမဆုံး မန်ဒရင်းအယ်ဘမ်တစ်ခုထွက်နိုင်အောင် ကြိုးစားနေကြောင်း ဂျန်နာက အသိပေးခဲ့သည်။ သီချင်းဆိုခြင်းအပြင် သူသည် ပညာသင်ကြားရေးအတွက်လည်း အာရုံစိုက်လိုကြောင်းနှင့် ကိုရီးယားတွင် ကေပေါ့ပ်သင်တန်းသူဖြစ်လာရန် အစီအစဉ်မရှိကြောင်း သူက ပြောဆိုခဲ့သည်။

၂၀၁၂ ခုနှစ်တွင် မွေးဖွားခဲ့သော ဂျန်နာသည် တရုတ်နိုင်ငံတွင် နေထိုင်ခဲ့သည့် ကွယ်လွန်သူ ကမ္ဘောဒီးယားဘုရင်ဟောင်း နိုရိုဒွန် သီဟာနု၏ မြေးတော်ဖြစ်သည်။ သူ၏ မိဘများမှာ မင်းသမီး နိုရိုဒွန် ဘော့ဖရေးနှင့် ပြင်သစ်နိုင်ငံသား စီးပွားရေးလုပ်ငန်းရှင်တို့ဖြစ်သည်။

ဂျန်နာသည် ဖနွမ်ပင်ရှိ ဂီတပညာကျောင်းတွင် အော်ပရာကို လေ့လာသင်ကြားခဲ့ပြီး ပြင်သစ်၊ ခမာ၊ ထိုင်း၊ တရုတ်၊ အင်္ဂလိပ်ဘာသာစကားများကို ပြောဆိုနိုင်သည်ဟု ဆောက်ချိုင်းနားမောနင်းပို့စ်က ဖော်ပြသည်။

အသက် ခြောက်နှစ်အရွယ်တွင် ကမ္ဘောဒီးယား၏ showbiz သို့ဝင်ရောက်ခဲ့ကာ ခမာရုပ်သံဇာတ်လမ်းများစွာတွင် ပါဝင်သရုပ်ဆောင်ခဲ့သည်။

သူသည် ဒုတိယအကြိမ်မြောက် ကမ္ဘောဒီးယား-အာရှ ရုပ်ရှင်ပွဲတော်တွင် ကမ္ဘောဒီးယား သဲထိတ်ရင်ဖိုရုပ်ရှင် The Night Curse Of Reatrei(2024) ဇာတ်ကားဖြင့် အကောင်းဆုံး တက်သစ်စ မင်းသမီးဆု ရရှိခဲ့သည်။

Ref: သည်စထရိတ်တိုင်းမ်