ကမ္ဘာကြီးသည် နိုင်ငံများက ရင်ဆိုင်ရမည့် အန္တရာယ်များစွာနှင့် မရေရာမှုများ ဝန်ရံနေကြောင်း သောကြာနေ့က အာရှ၏ ထိပ်တန်းကာကွယ်ရေးဖိုရမ်ဖြစ်သော ရှန်ဂရီလာဆွေးနွေးပွဲ ဖွင့်ပွဲအခမ်းအနားတွင် ဗီယက်နမ် သမ္မတ တိုလမ်က ပြောကြားခဲ့သည်။
ကမ္ဘာကြီးရင်ဆိုင်နေရသော စိန်ခေါ်မှုများထဲတွင် နိုင်ငံတကာနည်းဥပဒေနှင့် ဥပဒေများ ယိုယွင်းပျ-က်စီးလာခြင်း၊ တိုးတက်မှု နှေးကွေးလာခြင်းနှင့် ရာသီဥတုပြောင်းလဲခြင်းကဲ့သို့သော ဖွံ့ဖြိုးတိုးတက်မှုပုံစံများ၏ အကျပ်အတည်းနှင့် နိုင်ငံများအကြား ယုံကြည်မှုဆိုင်ရာ အကျပ်အတည်းတို့ ပါဝင်သည်ဟု ၎င်း၏ အဓိကမိန့်ခွန်းတွင် သမ္မတ တူလမ်က ပြောကြားခဲ့သည်။
“ဒီနေ့ ကျွန်တော်တို့ ကမ္ဘာကြီးရင်ဆိုင်နေရတဲ့ အကျပ်အတည်းသုံးခုဟာ ကျွန်တော်တို့ လက်ကိုလက်ခံရမယ့် ရှောင်လွဲလို့မရတဲ့ ဖြစ်ရပ်တွေ တော့မဟုတ်ပါဘူး” ဟု တူလမ်က ပြောကြားခဲ့ပြီး နိုင်ငံတကာဥပဒေကို အားကောင်းခိုင်မာစေရန်၊ အများပါဝင်ပြီး ရေရှည်တည်တံသော တိုးတက်မှုမောင်းနှင်အားများကို ဖော်ဆောင်ရန်အပြင် ဆွေးနွေးပြောဆိုမှုနှင့် ပွင့်လင်းမြင်သာမှုတို့ကို စတင်ကြရန် တောင်းဆိုခဲ့သည်။
ကွန်မြူနစ်ပါတီအကြီးအကဲဖြစ်လည်းဖြစ်ပြီး ပြီးခဲ့သည့်လကမှ သမ္မတအဖြစ် ခန့်အပ်ခံရသော တူလမ်သည် ဆယ်စုနှစ်များစွာအတွင်း ဗီယက်နမ်၏ အာဏာအရှိဆုံးခေါင်းဆောင်ဖြစ်ပြီး သူ၏ ပါတီတာဝန်ကြောင့် ပိုမိုထင်ရှားသည့် သံတမန်ရေးအခန်းကဏ္ဍတွင် ပါဝင်ဆောင်ရွက်နိုင်မည်ဖြစ်သည်။
တနင်္ဂနွေနေ့အထိကျင်းပမည့် စင်ကာပူနိုင်ငံတွင် နှစ်စဉ်ပြုလုပ်နေကျ ရှန်ဂရီလာဆွေးနွေးပွဲတွင် ကာကွယ်ရေးဝန်ကြီးများ၊ ဗိုလ်ချုပ်ကြီးများ၊ ထောက်လှမ်းရေးအကြီးအကဲများ၊ သံတမန်များ၊ လေ့လာသုံးသပ်သူများနှင့် လက်နက်ထုတ်လုပ်သူများ ရောပြွန်းပါဝင်သည်။
အမေရိကန်ကာကွယ်ရေးဝန်ကြီး ပက်တီ ဟက်ဆက်နှင့် သြစတြေးလျ၊ ဗြိတိန်၊ ပြင်သစ်၊ ဂျပန်နှင့် အခြားနိုင်ငံများမှ ကာကွယ်ရေးဝန်ကြီးများ တက်ရောက်ခဲ့ကြသည်။ တရုတ်ကာကွယ်ရေးဝန်ကြီး တုံကျန်သည်မူ ဒုတိယအကြိမ်မြောက်အဖြစ် ဆွေးနွေးပွဲကို မတက်ရောက်ခဲ့ပေ။
Ref: စီအင်န်အေ