ကမ္ဘာ့ဖလားယှဉ်ပြိုင်ရေးဖီဖာနှင့်အီရန် ဘောလုံးအဖွဲ့ချုပ် ဆွေးနွေးမည်

ဖီဖာအတွင်းရေးမှူးချုပ် မတ်တီယက်စ် ဂရက်ဖ်စတွမ်သည် စနေနေ့တွင် အစ္စတန်ဘူလ်၌ အီရန်ဘောလုံးအဖွဲ့ချုပ် တာဝန်ရှိသူများနှင့် တွေ့ဆုံမည်ဖြစ်ပြီး ကမ္ဘာ့ဖလားတွင် အီရန်ပါဝင်ရေးကို အာမခံပေးမည်ဖြစ်ကြောင်း ဆွေးနွေးမှုများကို သိရှိသော သတင်းရင်းမြစ်တစ်ခုက ရိုက်တာသတင်းဌာနကို ပြောကြားခဲ့သည်။
         
အီရန်သည် ကမ္ဘာ့ဖလား အုပ်စုပွဲ သုံးပွဲလုံးကို အမေရိကန်ပြည်ထောင်စုတွင် ယှဉ်ပြိုင်ရမည်ဖြစ်သော်လည်း အမေရိကနှင့် အစ္စရေးတို့က ဖေဖော်ဝါရီလအနှောင်းပိုင်းတွင် အီရန်ကို တို-က်ခိုက်ခဲ့ပြီးနောက် ဇွန်လ ၁၁ ရက် နေ့ မှ ဇူလိုင်လ ၁၉ ရက် နေ့အထိ ကျင်းပမည့် ပြိုင်ပွဲတွင် အီရန်အသင်းပါဝင်ရေးမှာ ပြဿနာဖြစ်နေခဲ့သည်။
      
အစ္စလာမ်မစ်တော်လှန်ရေးအစောင့်တပ် (အိုင်အာရ်ဂျီစီ) နှင့် ဆက်နွယ်မှုကြောင့်ဆိုကာ အီရန်ဘောလုံးအဖွဲ့ချုပ် ဥက္ကဌ မာဒီတာ့ဂျ်ကို အယခုလအစောပိုင်းတွင် ဗန်ကူးဗား၌ ကျင်းပသည့် ဖီဖာကွန်ဂရက်အတွက် ကနေဒါသို့ ဝင်ခွင့်ငြင်းပယ်ခံရပြီးနောက် မေးခွန်းများထပ်မံပေါ်ပေါက်စေခဲ့သည်။
       
မက္ကဆီကိုနှင့်အတူ ကမ္ဘာ့ဖလားကို ပူးတွဲအိမ်ရှင်အဖြစ် လက်ခံကျင်းပမည့် အမေရိကနှင့် ကနေဒါ နှစ်နိုင်ငံစလုံးသည် အိုင်အာရ်ဂျီစီကို အကြမ်းဖက်အဖွဲ့အစည်းအဖြစ် သတ်မှတ်ထားပြီး ထိပ်တန်းစစ်ဘက်အင်အားစုနှင့် ပတ်သက်ဆက်နွယ်သူများကို ဝင်ခွင့်မပြုကြောင်း ရှင်းလင်းစွာ ပြောကြားခဲ့သည်။
       
အသင်းအားလုံးနှင့် ၎င်းတို့၏ ကိုယ်စားလှယ်အဖွဲ့များ အိမ်ရှင်နိုင်ငံများသို့ ဝင်ရောက်နိုင်ရေးသည် ဖီဖာတွင် တာဝန်ရှိကြောင်း အီရန်၏ ဥပဒေနှင့် နိုင်ငံတကာရေးရာ ဒုတိယဝန်ကြီး ကာဇမ် ဂါရီဘာဘာဒီက ယခုသီတင်းပတ် ဆိုရှယ်မီဒီယာပို့စ်တစ်ခုတွင် ပြောကြားခဲ့သည်။
      
အီရန်နိုင်ငံလက်ရွေးစင်ဘောလုံးအသင်းသည် ဖီဖာစည်းမျဉ်းများနှင့်အညီ ကွင်းထဲတွင် ပါဝင်ယှဉ်ပြိုင်ခွင့်ရရှိထားပြီးဖြစ်ကြောင်း ၎င်းက ရေးသားခဲ့သည်။
       
ဖီဖာသည် ကမ္ဘာ့ဖလားတွင် ပါဝင်ယှဉ်ပြိုင်သည့် အသင်းအားလုံး ဘေးကင်းလုံခြုံသော ပတ်ဝန်းကျင်တွင် ယှဉ်ပြိုင်နိုင်စေရန် သက်ဆိုင်ရာ အာဏာပိုင်များနှင့် နီးကပ်စွာပူးပေါင်းဆောင်ရွက်လျက်ရှိကြောင်း သတင်းရင်းမြစ်က ပြောကြားခဲ့သည်။
     
အီရန်က ၎င်းတို့အသင်း၏ ကမ္ဘာ့ဖလားပွဲစဉ်များကို မက္ကဆီကိုသို့ ပြောင်းလဲပေးရန် တောင်းဆိုခဲ့သော်လည်း ပွဲစဉ်အားလုံးကို မူလစီစဉ်ထားသည့် ကွင်းတွင်သာ ကစားရမည်ဟု ဖီဖာဥက္ကဌ ဂျီယန်နီ အင်ဖန်တီနိုက အခိုင်အမာ ပြောကြားခဲ့သည်။
     
အီရန်သည် ကမ္ဘာ့ဖလားပြိုင်ပွဲကို ဇွန်လ ၁၅ ရက်နေ့တွင် လော့ဆန်းဂျလိစ်၌ နူးဇီလန်အသင်းနှင့် စတင်ယှဉ်ပြိုင်ကစားရမည်ဖြစ်သည်။

Ref: သယ်စထရိတ်တိုင်းမ်စ်