ကဘော်ချိုင့်ဝှမ်းဒေသသည် သမိုင်းနှင့်ယှဉ်ပြီး မြန်မာနိုင်ငံပိုင်ဖြစ်သကဲ့သို့ လက်ရှိတွင်လည်း နှစ်နိုင်ငံအစိုးရများက လက်ခံအတည်ပြုထားသော မြန်မာနိုင်ငံပိုင်နက်နယ်မြေများဖြစ်သည်ဟု အိန္ဒိယနိုင်ငံ မီဇိုရမ်အမတ်၏ ချင်းပြည်နယ်အား မီဇိုရမ်နှင့်ပေါင်းစည်းရန် CNF နဲ့ ဆွေးနွေးခဲ့ခြင်း၊ မဏိပူရ်လွှတ်တော်အမတ်မှ ကဘော်ချိုင့်ဝှမ်း(တမူး-က လေး-မင်းကင်း)အား မဏိပူရ်ပြည်နယ်နှင့် ပြန်လည်ပေါင်းစည်းရန် ဆွေးနွေးတောင်းဆိုခြင်းများနှင့်ပတ်သက်၍ မြန်မာနိုင်ငံအစိုးရကပြန်လည်တုန့်ပြန်ပြောဆိုခဲ့ခြင်းဖြစ်သည်။
ထို့ပြင် နိုင်ငံတော်အဆင့်ကိစ္စများကို မဏိပူရပြည်နယ်မှ အချို့ နိုင်ငံရေးပါတီများနှင့် လွှတ်တော်အမတ်များက ၎င်းတို့၏ နိုင်ငံရေးမဲဆွယ်ရန် စကားလုံးတစ်ခုအဖြစ် မကြာခဏပြောဆိုနေသည်ကို အိန္ဒိယအစိုးရက လိုအပ်သလိုထိန်းကြောင်းတည့်မတ်ပေးရန်လိုအပ်ပြီး အိမ်နီးချင်းကောင်း မိတ်ဆွေကောင်းဆက်ဆံရေးများကို မြန်မာနိုင်ငံဘက်မှ အမြဲရပ်တည်ထိန်းသိမ်းဆောင်ရွက်လျက်ရှိသည်ဟု ပြောသည်။
အိန္ဒိယနိုင်ငံအနေဖြင့်လည်း ရှိရင်းစွဲချစ်ကြည်ရင်းနှီးသည့် နှစ်နိုင်ငံဆက်ဆံရေးကို တန်ဖိုးထားပြီး မြန်မာနိုင်ငံ ၏ အချုပ်အခြာ အာဏာနယ်မြေပိုင်ဆိုင်မှုကို လေးစားသင့်၍ နှစ်နိုင်ငံဆက်ဆံရေးကို ထိခိုက်ပျက်ပြားစေမည့်ပြုမူပြောဆိုမှုများကို နိုင်ငံတော်အစိုးရအနေဖြင့် လိုအပ်သလိုထိန်းသိမ်းဆောင်ရွက်သင့်သည်ဟု ပြောကြားခဲ့သည်။
၂၀၁၁ ခုနှစ်အတွင်း မဏိပူရပြည်နယ် BJP ပါတီခေါင်းဆောင် ရှန်တီကူးမားမှ ကဘော်ချိုင့်ဝှမ်းအား မဏိပူရမှပိုင်သင့်ကြောင်းပြောခဲ့ပြီး၊ ၂၀၁၃ ခုနှစ် မဲဆွယ်မှုတွင်လည်း ယင်း ပါတီကပင် ၎င်းတို့ ပါတီကိုမဲပေးပါက ကဘော်ချိုင့်ဝှမ်းကို ပြန်တောင်းပေးမည်ဟု မဲဆွယ်ခဲ့ကာ ယခုတွင်လည်း BJP ပါတီ၏ မဏိပူရပြည်နယ် ပါလီမန်လွှတ်တော်အမတ်က ကဘော်ချိုင့်ဝှမ်းဒေသကို အိန္ဒိယကပိုင်သည်ဆိုသည့်သ ဘောများပြောဆိုခဲ့ကြခြင်းဖြစ်သည်။