ကချင်ပြည်နယ်အစိုးရအဖွဲ့က တင်ပြထားသည့် ယူရီးယားဓာတ်မြေဩဇာ တန်ချိန် ၅,၀၀၀ လိုအပ်ချက်ကို ဖြည့်ဆည်းပေးနိုင်ရေးအတွက် သက်ဆိုင်ရာအဖွဲ့အစည်းများနှင့် ပူးပေါင်းညှိနှိုင်းကာ စီစဉ်ဆောင်ရွက်လျက်ရှိကြောင်း သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန ဒုတိယဝန်ကြီး ဦးသိုက်စိုးက ပြောကြားသည်။
တတိယအကြိမ် အမျိုးသားလွှတ်တော် ဒုတိယပုံမှန်အစည်းအဝေး (၁၂) ရက်မြောက်နေ့တွင် ကချင်ပြည်နယ် အမျိုးသားလွှတ်တော်ကိုယ်စားလှယ် ဦးစိန်လွင်ဦး၏ မေးခွန်းကို ဖြေကြားရာတွင် ဒုတိယဝန်ကြီးက ယင်းသို့ ပြောကြားခဲ့ခြင်းဖြစ်သည်။
ဒုတိယဝန်ကြီးက ယူရီးယားမြေဩဇာဝယ်ယူဖြန့်ဖြူးရောင်းချရေး ဦးဆောင်ကော်မတီသည် သက်ဆိုင်ရာအဖွဲ့အစည်းများနှင့် ပူးပေါင်းညှိနှိုင်း၍ မြန်မာနိုင်ငံ ဓာတ်မြေဩဇာ၊ မျိုးစေ့နှင့် စိုက်ပျိုးရေးဆေးလုပ်ငန်းရှင်များအသင်းဝင် ကုမ္ပဏီများအတွက် အစိုးရစီစဉ်ပေးသည့် မော်တော်ယာဉ်အစီး (၁၀၀) ဖြင့် ဓာတ်မြေဩဇာ တန်ချိန် ၄၅၀ ကို သယ်ယူပို့ဆောင်စရိတ် သက်သာစေရန် စီစဉ်ပေးထားပြီး ကျန်လိုအပ်သည့် ပမာဏကိုလည်း ပြည်နယ်အစိုးရ၏ လိုအပ်ချက်အရ ဆက်လက်ပို့ဆောင်ပေးသွားမည်ဖြစ်ကြောင်း ပြောကြားခဲ့သည်။
ထို့ပြင် တောင်သူလယ်သမားများ ဓာတ်မြေဩဇာကို ဈေးနှုန်းသက်သာစွာ ရရှိနိုင်ရေးအတွက် သမဝါယမစနစ် Consortium ပုံစံဖြင့် စုပေါင်းဝယ်ယူ၊ စုပေါင်းဖြန့်ဖြူးသည့် အစီအစဉ်ကို ဆောင်ရွက်လျက်ရှိပြီး အမြတ်မယူဘဲ ရန်ကုန်အထိုင် ရည်ညွှန်းဈေးအပေါ် အခြေခံကာ သယ်ယူပို့ဆောင်ခနှင့် တင်ချခသာ ပေါင်းထည့်တွက်ချက်၍ ဒေသအရောက် ဖြန့်ဖြူးရောင်းချပေးလျက်ရှိကြောင်း သိရသည်။
ထို့အတူ ဓာတ်မြေဩဇာများ၏ အရည်အသွေးမှန်ကန်ရေးနှင့် သိုလှောင်ဈေးကစားမှုများ မဖြစ်ပေါ်စေရေးကိုလည်း ကြီးကြပ်ဆောင်ရွက်လျက်ရှိကြောင်း ဒုတိယဝန်ကြီးက ပြောကြားခဲ့သည်။