၂၀၂၄ ခုနှစ်တွင် ဒေသတွင်း ဘက်စုံစီးပွားရေး ပူးပေါင်းဆောင်ရွက်မှု(RCEP) အဖွဲ့ဝင်နိုင်ငံများနှင့် ကမ္ဘောဒီးယားနိုင်ငံ၏ ကုန်သွယ်မှုသည် အမေရိကန် ဒေါ်လာ ၃၄ ဒဿမ ၅၂ ဘီလျံအထိရောက်ရှိခဲ့ကာ ၂၀၂၃ ခုနှစ်က ကုန်သွယ်မှုတန်ဖိုး ဒေါ်လာ ၂၉ ဒဿမ ၃၂ ဘီလျံထက် ၁၇ ဒဿမ ၇ ရာခိုင်နှုန်း ပိုခဲ့သည်ဟု တနင်္လာနေ့က တရားဝင်သတင်းထုတ်ပြန်ချက်တွင် ပြောကြားခဲ့သည်။
ပြီးခဲ့သည့်နှစ်တွင် ကမ္ဘောဒီးယားက အဖွဲ့ဝင် RCEP နိုင်ငံများသို့ ပို့ကုန်တင်ပို့ခဲ့မှု တန်ဖိုးသည် ၉ ဒဿမ ၀၆ ဘီလျံရှိခဲ့ကာ ယင်းမတိုင်ခင်နှစ်က ပို့ကုန်တန်ဖိုး ၈ ဒဿမ ၀၄ ဘီလျံထက် ၁၃ ရာခိုင်နှုန်းနီးပါး တိုးလာခဲ့သည်ဟု အကောက်ခွန်နှင့် စည်းကြပ်ခွန်ဦးစီးဌာန၏ သတင်းထုတ်ပြန်ချက်တွင် ဖေါ်ပြထားသည်။
တစ်ချိန်တည်းမှာပင် RCEP နိုင်ငံများထံမှ နိုင်ငံ၏ သွင်းကုန်စုစုပေါင်းသည် ဒေါ်လာ ၂၅ ဒဿမ ၄၆ ဘီလျံရှိပြီး ယခင် ဒေါ်လာ ၂၁ ဒဿမ ၂၈ ဘီလျံရှိခဲ့ရာမှ ၁၉ ဒဿမ ၆ ရာခိုင်နှုန်း တိုးမြှင့်တင်သွင်းခဲ့သည်ဟုလည်း ထုတ်ပြန်ချက်တွင် ဖော်ပြခဲ့သည်။
RCEP အောက်တွင် ကမ္ဘောဒီးယားနိုင်ငံ၏ ထိပ်တန်းကုန်သွယ်ဖက် ငါးနိုင်ငံသည် တရုတ်၊ ဗီယက်နမ်၊ ထိုင်း၊ ဂျပန်နှင့် စင်ကာပူတို့ဖြစ်ကြသည်။
၂၀၂၂ ခုနှစ်တွင် စတင်အသက်ဝင်ခဲ့သော RCEP တွင် အာဆီယံအဖွဲ့ဝင် ၁၀ နိုင်ငံနှင့် ၎င်းတို့၏ ကုန်သွယ်ဖက်ငါးနိုင်ငံဖြစ်သော တရုတ်၊ ဂျပန်၊ တောင်ကိုရီးယား၊ သြစတြေးလျနှင့် နူးဇီလန်နိုင်ငံတို့ ပါဝင်သည်။
Ref: ရှင်းဟွာ