ရန်ကုန်၊ စက်တင်ဘာ ၁၅
ဂျပန်နိုင်ငံ၊ အိုင်ချီ-နာဂိုယာမြို့တို့တွင် အိမ်ရှင်အဖြစ် လက်ခံကျင်းပမည့် (၂၀) ကြိမ်မြောက် အာရှအားကစားပြိုင်ပွဲ (20th Asian Games 2026) သို့ ဝင်ရောက်ယှဉ်ပြိုင်မည့် မြန်မာနိုင်ငံ တက်ဂ်ဘော (Teqball) အားကစားအဖွဲ့သည် စက်တင်ဘာလ ၁၄ ရက်တွင် ဂျပန်နိုင်ငံသို့ လေကြောင်းခရီးဖြင့် ထွက်ခွာသွားပြီ ဖြစ်ကြောင်း သိရသည်။
ယခုနှစ် အာရှပြိုင်ပွဲတွင် တက်ဂ်ဘောအားကစားနည်းကို ပထမဆုံးအကြိမ် တရားဝင်ထည့်သွင်းကျင်းပခြင်းဖြစ်ပြီး မြန်မာ့လက်ရွေးစင်တက်ဂ်ဘောအဖွဲ့သည် ပြိုင်ပွဲတွင် ဆုတံဆိပ်ရရှိရန်အတွက် ထိုင်းနိုင်ငံသားနည်းပြချုပ်၏ ဦးဆောင်မှုဖြင့် ကာလရှည်ကြာ စနစ်တကျ စိစစ်လေ့ကျင့် ပြင်ဆင်ခဲ့ကြောင်း သိရသည်။
၂၀ ကြိမ်မြောက် အာရှပြိုင်ပွဲ၏ တက်ဂ်ဘောပြိုင်ပွဲများကို စက်တင်ဘာလ ၁၇ ရက်မှ ၂၀ ရက်နေ့အထိ Nagoya Arena ၌ ကျင်းပသွားမည်ဖြစ်ရာ မြန်မာအသင်းအနေဖြင့် ရာသီဥတုနှင့် ကွင်းအခြေအနေများ ကျင့်သားရစေရန်အတွက် ပြိုင်ပွဲမစတင်မီ ကြိုတင်ထွက်ခွာသွားခြင်း ဖြစ်သည်။
အဆိုပါ ဂျပန်အာရှပြိုင်ပွဲသို့ မြန်မာနိုင်ငံအနေဖြင့် တက်ဂ်ဘောအားကစားနည်းအပြင် ပိုက်ကျော်ခြင်း၊ အမျိုးသမီးဘောလုံး၊ အီးစပေါ့ (Esports) နှင့် ဂျွမ်းဘား စသည့် အားကစားနည်း (၅) မျိုးဖြင့် ဝင်ရောက်ယှဉ်ပြိုင်မည်ဖြစ်ကြောင်း သိရသည်။