ရန်ကုန်တိုင်း လွှတ်တော်အမတ်ဟောင်း ဦးကျော်ဇေယျ ဦးဆောင်ဖွဲ့စည်းထားသည့် ပြည်ထောင်စုငြိမ်းချမ်းရေးနှင့် ညီညွတ်ရေးပါတီ အနေဖြင့် တိုင်း (၅) တိုင်းတွင် ရွေးကောက်ပွဲ ဝင်ရောက်ယှဉ်ပြိုင်သွားရန် ပြင်ဆင်နေကြောင်း သိရသည်။
၎င်းတို့ ပါတီအနေဖြင့် ရန်ကုန်တိုင်း၊ မန္တလေးတိုင်း၊ ပဲခူးတိုင်း၊ မကွေးတိုင်း၊ ဧရာဝတီတိုင်းတို့တွင် ရွေးကောက်ပွဲ ဝင်ယှဉ်ပြိုင်သွားမည်ဟု ဦးကျော်ဇေယျက ပေါ်ပြူလာနယူး(စ်) ၏ မေးမြန်းမှုကို အတည်ပြု ပြောကြားခဲ့သည်။
” ဟုတ်တယ် ၊ တိုင်း (၅) တိုင်းကတော့ သေချာပြီ။ ပြည်ထောင်စုတစ်ဝန်းကြတော့ ကျွန်တော်တို့ ပြည်နယ်တွေကျတော့ သိပ်မသေချာဘူး။တိုင်း (၅) တိုင်းကတော့ ရန်ကုန် ၊ ပဲခူး၊ မန္တလေး ၊ ဧရာဝတီ ၊ မကွေး ။ အဲဒါတွေကတော့ ကျွန်တော်တို့ သေချာပေါက်ပြိုင်မှာ ။ ကျွန်တော်တို့ တာဝန်ခံတွေ ဖွဲ့ပြီးသွားပြီ” ဟု ဦးကျော်ဇေယျက ပြောသည်။
ယင်းကဲ့သို့ တိုင်း(၅) တိုင်းတွင်သာ ရွေးကောက်ပွဲဝင်ရန် ဆုံးဖြတ်ရခြင်းနှင့် ပတ်သက်၍ ပေါ်ပြူလာနယူး(စ်) ၏ မေးမြန်းမှုအပေါ် ရွေးကောက်ပွဲ အနိုင်ရနိုင်ခြေများသည့်နေရာများတွင်သာ ဝင်ရောက်ယှဉ်ပြိုင်ခြင်းဖြစ်ကြောင်း ၎င်းက ပြန်လည်ဖြေကြားခဲ့သည်။
” မှန်တယ်။ ကျွန်တော်တို့ရဲ့ ပါတီက အခြေခံအားဖြင့်တော့ ပြည်သူ့ရှေ့ဆောင်ပါတီ (PPP) က ထွက်လာတဲ့သူတွေနဲ့ အခြေခံပြီးဖွဲ့ထားတာ။ များသောအားဖြင့်က ရန်ကုန်တိုင်းတို့ တိုင်းဥက္ကဋ္ဌတွေ ကိုယ်တိုင်က (PPP) က ထွက်လိုက်တာ ၊ အရင်တုန်းက (PPP) ကပြိုင်ခဲ့တုန်းကလည်း ကိုယ်စားလှယ်အရေအတွက်ကလည်း အဲဒီ တိုင်း (၅) တိုင်းမှာပဲ များတာ။ အဲဒါကို အခြေခံပြီးတော့ သေချာတဲ့နေရာပဲလို့ ကျွန်တော်ပြောတာ” ဟု ဦးကျော်ဇေယျက ပြောသည်။
ပြည်ထောင်စု ငြိမ်းချမ်းရေးနှင့် စည်းလုံးညီညွတ်ရေးပါတီကို ဦးနေမျိုးဝေ ဦးဆောင်သည့် မတူကွဲပြားခြင်းနှင့် ငြိမ်းချမ်းရေးပါတီနှင့် ပူးပေါင်းကာ ရွေးကောက်ပွဲဝင်ရောက်ယှဉ်ပြိုင်ရန် ပြင်ဆင်နေခြင်း ဖြစ်သည်။
လက်ရှိတွင် ပါတီဦးဆောင်သူ (၁၅) ဦး၏ စာရင်းအား ပြည်ထောင်စု ရွေးကောက်ပွဲကော်မရှင်ထံ တင်ပြကာ ပါတီမှတ်ပုံတင် လျှောက်ထားပြီးဖြစ်ကြောင်းနှင့် ပါတီ ပထမခေါင်းဆောင်အဖြစ် ၎င်းက တာဝန်ယူမည်ဖြစ်ပြီး ဒုတိယ ခေါင်းဆောင်အနေဖြင့် မတူကွဲပြားခြင်းနှင့် စည်းလုံးညီညွတ်ရေးပါတီမှ ဒေါ်စန္ဒာဦးက တာဝန်ယူမည်ဖြစ်ကြောင်း ဦးကျော်ဇေယျ၏ ပြောကြားချက်အရ သိရသ ည်။
ပြီးခဲ့သည့် ၂၀၂၃ ခုနှစ် ဇန်နဝါရီ လကုန်ပိုင်းက အသစ်ပြဌာန်းလိုက်သည့် နိုင်ငံရေးပါတီများ မှတ်ပုံတင်ခြင်း ဥပဒေအရ ပြည်ထောင်စုအဆင့် ရပ်တည်မည့် ပါတီများ အနေဖြင့် ပါတီဝင် အင်အား (၁) သိန်း ရှိရမည်ဖြစ်ပြီး ပြည်ထောင်စုတဝန်းလုံးရှိ မဲဆန္ဒနယ် အားလုံး၏ ထက်ဝက်တွင် ရွေးကောက်ပွဲ ဝင်ရောက်ယှဉ်ပြိုင်ရမည်ဟု ပြဌာန်းထားခြင်း ဖြစ်သည်။
ထို့အပြင် ပါတီမှတ်ပုံတင် နည်းဥပဒေသစ်အရ နိုင်ငံရေးပါတီအဖြစ် ဆက်လက်ရပ်တည်လိုသည့် ပါတီများအနေ ဖြင့် (၂) လအတွင်း ပါတီမှတ်ပုံတင် ပြန်လည်လျှောက်ထားရမည်ဖြစ်ပြီး ပါတီ နှစ်ခု သို့မဟုတ် နှစ်ခုထက်ပိုသော ပါတီများအနေဖြင့် ပူးပေါင်းကာ ပါတီအသစ်တစ်ခုအနေဖြင့် သော်လည်းကောင်း ၊ ယခင်ရှိပြီးသား ပါတီတစ်ခု၏ အမည်ဖြင့်သော်လည်းကောင်း ပါတီမှတ်ပုံတင် လျှောက်ထားနိုင်ကြောင်း ပြဌာန်းထားသည်။