ဥရောပ၌နျူကလီးယားဟန့်တား‌ရေးဆွေးနွေးရန်အသင့်–မက်ခရွန်

ဥရောပဒေသ၌ နျူကလီးယားကို ဟန့်တားရေးနှင့်ပတ်သက်၍ ဆွေးနွေးမှုများ စတင်ရန် အသင့်ရှိသည်ဟု ပြင်သစ် သမ္မတ အီမန်နျူလ် မက်ခရွန်က ပြောဆိုလိုက်ပြီး အခြား ဥရောပနိုင်ငံများအပေါ် ရုရှား၏ လုံခြုံရေးဆိုင်ရာ ခြိမ်းခြောက်မှုများမှ ကာကွယ်ရာတွင် ပြင်သစ်က အကူအညီပေးနိုင်ကြောင်းကို အရိပ်အမြွက် ဖော်ပြခဲ့သည်။

ဥရောပခေါင်းဆောင်များသည် ယူကရိန်းငြိမ်းချမ်းရေး အစီအစဉ်ကို ဆွေးနွေးရန် မတ် ၂ ရက်တွင် လန်ဒန်၌ တွေ့ဆုံမည်ဖြစ်ပြီး မတ်လ ၆ ရက်‌နေ့တွင် ၎င်းတို့သည် ဥရောပသမဂ္ဂ ထိပ်သီးအစည်းအဝေးကို တက်ရောက်ကြမည်ဖြစ်သည်။

ဥရောပသမဂ္ဂသည် ရုရှားနှင့် သံတမန်ဆက်ဆံရေးကို ဖော်ဆောင်လိုသော အမေရိကန်သမ္မတ ဒေါ်နယ်ထရမ့်ပ်၏ လိုလားချက်များ၊ ဖေဖော်ဝါရီ ၂၈ ရက်က အိမ်ဖြူတော်တွင် ယူကရိန်းသမ္မတ ဇလန်းစကီးနှင့် မစ္စတာ ထရမ့်ပ်တို့အကြား ကတောက်ကဆဖြစ်ခဲ့မှု၏ ဂယက်ရိုက်ခတ်မှုများကို ကိုင်တွယ်ဖြေရှင်းနေရသည်။

ဥရောပသည် ကာကွယ်ရေးနှင့် နျူကလီးယားတားဆီးရေးဆိုင်ရာ ကိစ္စရပ်များတွင် ပိုမိုကောင်းမွန်သော ကိုယ်ပိုင်စီမံပိုင်ခွင့်ကို ဖြစ်လိုပါက ၎င်း၏ ခေါင်းဆောင်များသည် ယင်းကိစ္စနှင့် ပတ်သက်၍ စတင်ဆွေးနွေးသင့်သည်ဟု မတ် ၁ ရက်က သူ X ပေါ်တင်ခဲ့သော ပေါ်တူဂီ ရုပ်သံ RTP နှင့် အင်တာဗျူးတွင် မစ္စတာ မက်ခရွန်က ပြောကြားခဲ့သည်။

“ဥရောပအင်အားကို တည်ဆောက်ခွင့်ပြုမယ်ဆိုရင် ဒီဆွေးနွေးပွဲကို စတင်ဖို့ ကျွန်တော်အသင့်ရှိပါတယ်” ဟု သူက ပြောကြားခဲ့သည်။

၎င်း၏ နျူကလီးယားဆိုင်ရာ မူဝါဒတွင် ပြင်သစ်နိုင်ငံ၏ အရေးကြီးသော အကျိုးစီးပွားများတွင် ဥရောပ ကဏ္ဍသည် အမြဲပါဝင်သည်ဟု သူက ဆိုခဲ့သည်။

ပြင်သစ် လက်ယာစွန်းခေါင်းဆောင် မာရင်းလီပင်းကမူ မစ္စတာ မက်ခရွန်၏ ယင်းမှတ်ချက်များကို အလျင်အမြန်ပင် တုန့်ပြန်မှုလုပ်ခဲ့သည်။

ပြင်သစ် နျူကလီးယား အဟန့်အတားသည် ပြင်သစ်အတွက် အဟန့်အတားအဖြစ်သာ ဆက်ရှိနေရမည်ဟု မတ် ၁ ရက်က ပါရီမြို့ Farm Show တစ်ခုသို့ သွားရောက်ခဲ့စဉ်အတွင်း သူက ပြောဆိုခဲ့သည်။

Ref: သည်စထရိတ်တိုင်းမ်စ်