လက်မှတ်ရေးထိုးထားသည့် ပူးပေါင်းဆောင်ရွက်မှုစာချွန်လွှာအား အကောင်အထည်ဖော်ဆောင်ရွက်ခြင်းမှတစ်ဆင့် ဥရောပ-အာရှ စီးပွားရေးသမဂ္ဂ (EAEU)၏ လေ့လာသူနိုင်ငံအဆင့်အထိတက်လှမ်းနိုင်မည်ကိုယုံကြည်မျှော်လင့်ထားသည်ဟု နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်က ပြောသည်။
၎င်းမှ ယနေ့ ဇွန် ၂၆ ရက်နံနက်ပိုင်းက ဥရောပ-အာရှစီးပွားရေးကော်မရှင်(EEC)ဘုတ်အဖွဲ့ ဥက္ကဋ္ဌ Mr.Bakytzhan Abdirovich Sagintayev နှင့်တွေ့ ဆုံစဥ် ဆွေးနွေးပြောကြားခဲ့ခြင်းဖြစ်သည်။
ယခုတွေ့ဆုံဆွေးနွေးမှုမှတဆင့် မိမိတို့မြန်မာနိုင်ငံနှင့် ဥရောပ-အာရှ စီးပွားရေးသမဂ္ဂ(EAEU)အဖွဲ့ဝင်နိုင်ငံများကြား ပူးပေါင်းဆောင်ရွက်မှုများကို လက်တွေ့အကောင်အထည်ဖော်ဆောင်ရွက်နိုင်ရန် တွန်း အားဖြစ်စေမည်ကိုယုံကြည်ပြီး မြန်မာနိုင်ငံနှင့် ဥရောပ-အာရှ စီးပွားရေးသမဂ္ဂ(EAEU)တို့ကြား ၂၀၂၃ ခုနှစ်တွင် ပူးပေါင်းဆောင်ရွက်မှုစာချွန်လွှာကိုလက်မှတ်ရေးထိုးခဲ့ပြီးဖြစ်သည်ဟု ပြောသည်။
ထို့ပြင် ၂၀၂၃ ခုနှစ်၊ ဇွန်လတွင် ရုရှားနိုင်ငံ၊ စိန့်ပီတာစဘတ်မြို့၌ မြန်မာနိုင်ငံတော်အစိုးရနှင့် ဥရောပ-အာရှစီးပွားရေးကော်မရှင်(EEC)တို့ကြား ပူးပေါင်းဆောင်ရွက်မှုစာချွန်လွှာ(MOC)အား လက် မှတ်ရေးထိုးနိုင်ခဲ့ကာ မြန်မာနိုင်ငံနှင့်(EAEU)အဖွဲ့ဝင်နိုင်ငံများကြား ပူးပေါင်းဆောင်ရွက်နိုင်မည့်အ ခွင့်အလမ်းများစွာကိုလည်း လေ့လာတွေ့ရှိရသည်ဟု ဆွေးနွေးပြောကြားသည်။
ထို့အတူ လက်မှတ်ရေးထိုးထားသည့် ပူးပေါင်းဆောင်ရွက်မှုစာချွန်လွှာအား အကောင်အထည်ဖော် ဆောင်ရွက်ခြင်းမှတစ်ဆင့် ဥရောပ-အာရှ စီးပွားရေးသမဂ္ဂ(EAEU)၏ လေ့လာသူနိုင်ငံအဆင့်အထိ တက်လှမ်းနိုင်မည်ကိုလည်း ယုံကြည်မျှော်လင့်ထားကာ မြန်မာနိုင်ငံအနေဖြင့် လက်တွေ့အကောင်အထည်ဖော်ဆောင်ရွက်မှုများဖြင့် ပူးပေါင်းဆောင် ရွက်မှုကို ပိုမိုခိုင်မာကျယ်ပြန့်စေရေးဆောင်ရွက်သွားမည်ဟုလည်း နစက ဥက္ကဋ္ဌက ဆွေးနွေးပြောကြားခဲ့သည်။
ထို့ပြင် ဥရောပ-အာရှ စီးပွားရေးကော်မရှင်ဘုတ် အဖွဲ့ဥက္ကဋ္ဌမှ နစက ဥက္ကဋ္ဌနှင့်အဖွဲ့ဝင်များအား လှိုက်လှဲစွာကြိုဆိုပြီး ယခုကဲ့သို့ စတုတ္ထအကြိမ် ဥရောပ-အာရှ စီးပွားရေးဖိုရမ်(EEF 2025)သို့ နစက ဥက္ကဋ္ဌကိုယ်တိုင်တက်ရောက်သဖြင့် ပူးပေါင်းဆောင်ရွက်မှုများ ပိုမိုဖြစ်ပေါ်စေနိုင်မည်ဟု ပြောသည်။
ထို့နောက် နစက ဥက္ကဋ္ဌနှင့် ဥရောပ-အာရှ စီးပွား ရေးကော်မရှင်ဘုတ်အဖွဲ့ဥက္ကဋ္ဌတို့သည် မြန်မာနိုင်ငံနှင့် (EAEU)အဖွဲ့ဝင်နိုင်ငံများကြား စီးပွားရေးဆိုင် ရာပူးပေါင်းဆောင်ရွက်မှုများကို မြှင့်တင်ဆောင်ရွက်သွားနိုင်မည့်ကိစ္စများ၊ မြန်မာနိုင်ငံ၏ စိုက်ပျိုး ရေးကဏ္ဍမြှင့်တင်ရေး၊ သယ်ယူပို့ဆောင်ရေးကဏ္ဍမြှင့်တင်ရေး၊ သတ္တုတူးဖော်မှုဆိုင်ရာနည်းပညာမြှင့်တင်ရေးနှင့် စွမ်းအင်ကဏ္ဍမြှင့်တင်ရေးတို့တွင် နည်းပညာပိုင်းဆိုင်ရာ၊ ပူးပေါင်းဆောင်ရွက်မှုဆိုင်ရာ လုပ်ဆောင်သွားနိုင်မည့်ကိစ္စများကို ဆွေးနွေးခဲ့ကြသည်။
ထို့ပြင် မြန်မာနိုင်ငံနှင့် (EAEU)အဖွဲ့ဝင်နိုင်ငံများကြား တိုက်ရိုက်ကုန်သွယ်မှုနှင့်ရင်းနှီးမြှုပ်နှံမှုများ ပြုလုပ်ခြင်း၊ ကုန်စည်ပြပွဲများ၊ ဖိုရမ်များကျင်းပခြင်းတို့ဖြင့် စီးပွားရေးကုန်သွယ်မှုအခွင့်အလမ်းကို ပိုမိုအရှိန်အဟုန်မြှင့်တင်ဆောင်ရွက်နိုင်မည့်ကိစ္စများ၊ မြန်မာနိုင်ငံအနေဖြင့် ဥရောပ-အာရှ စီးပွားရေးသမဂ္ဂ(EAEU)၏ လေ့လာသူနိုင်ငံအဆင့်အထိ တက်လှမ်းနိုင်ရေး ကူညီဆောင်ရွက်ပေးသွားမည်ဖြစ်ပြီး စီးပွားရေးဆိုင်ရာပူးပေါင်းဆောင်ရွက်မှု အလားအလာကောင်းများစွာကိုဖော်ဆောင်ပေးနိုင်မည့်ကိစ္စများကိုလည်း ဆွေးနွေးခဲ့ကြသည်။