နေပြည်တော်၊ ဇူလိုင် ၂၁
နေပြည်တော်၊ ဥတ္တရသီရိမြို့နယ်ရှိ ၃၃ ကေဗွီ ဓာတ်အားခွဲရုံအမှတ် (၂) တွင် တပ်ဆင်ထားသည့် ၃၃/၁၁ ကေဗွီ၊ ၁၀ အမ်ဗွီအေ ထရန်စဖော်မာအမှတ် (၁) သည် ဇူလိုင် ၂၁ ရက် မွန်းလွဲ ၃ နာရီ ၄၀ မိနစ်ခန့်က လောင်ကျွမ်းမှု ဖြစ်ပွားခဲ့ကြောင်း သိရသည်။
ဖြစ်စဉ်ဖြစ်ပွားပြီးနောက် လျှပ်စစ်ကျွမ်းကျင်ဝန်ထမ်းများက ၁၀ အမ်ဗွီအေ ထရန်စဖော်မာ ဖြင့် အစားထိုးလဲလှယ်နိုင်ရန် တန် ၇၀ ကရိန်းယာဉ်နှင့် အခြားယန္တရားများကို အသုံးပြု၍ ညနေ ၄ နာရီကျော်မှ စတင်ဆောင်ရွက်ခဲ့ကြောင်း သိရသည်။
ထရန်စဖော်မာ ရွှေ့ပြောင်းခြင်း၊ တပ်ဆင်ခြင်းနှင့် စမ်းသပ်စစ်ဆေးခြင်းလုပ်ငန်းများကို ဇူလိုင် ၂၂ ရက် မွန်းလွဲပိုင်း တွင် အပြီးသတ်နိုင်မည်ဟု ခန့်မှန်းထားသည်။
ထရန်စဖော်မာ လောင်ကျွမ်းမှုကြောင့် ဥတ္တရသီရိမြို့နယ်အတွင်း လျှပ်စစ်ဓာတ်အား ဖြန့်ဖြူးမှု လျော့ကျခဲ့သော်လည်း ယင်းထရန်စဖော်မာမှ ဓာတ်အားရယူအသုံးပြုနေသည့် အစိုးရဌာနရုံးများနှင့် အများပြည်သူဆိုင်ရာ နေရာအချို့ကို ကျန်ရှိသည့် ထရန်စဖော်မာအမှတ် (၂) မှ ဝန်အားမျှ၍ ယာယီလျှပ်စစ်ဓာတ်အား ပြန်လည်ဖြန့်ဖြူးပေးထားကြောင်း သိရသည်။
ထရန်စဖော်မာ အစားထိုးလဲလှယ်ရေးလုပ်ငန်းများ ပြီးစီးပြီးနောက် ပုံမှန်အတိုင်း လျှပ်စစ်ဓာတ်အား ပြန်လည်ဖြန့်ဖြူးပေးသွားမည်ဖြစ်ကြောင်း သိရသည်။