“အောင်ပွဲနေ့”အခမ်းအနားတွင် ထရမ့်တက်ရောက်မည်ဆိုပါက ပူတင်က ဝမ်းမြောက်စွာကြိုဆိုမည်

အမေရိကန်သမ္မတ ဒေါ်နယ်ထရမ့်အပါအဝင် ကမ္ဘာ့ခေါင်းဆောင်များအား မော်စကိုတွင် ကျင်းပမည့် ဂရိတ်ပက်ထရီယော့တစ်စစ်ပွဲ(Great Patriotic War) တွင် ဆိုဗီယက်ယူနီယံက အောင်ပွဲခံခဲ့သည့် နှစ် ၈၀ ပြည့် “အောင်ပွဲနေ့”အခမ်းအနားများသို့ တက်ရောက်ရန် ဆုံးဖြတ်ပါက ရုရှားသမ္မတ ဗလာဒီမာ ပူတင်က ဝမ်းမြောက်စွာ ကြိုဆိုမည်ဖြစ်ကြောင်း ရုရှားအစိုးရ၏ ပြောရေးဆိုခွင့်ရပုဂ္ဂိုလ် ဒ်မီထရီ ပက်စကော့ဗ် က ပြောကြားခဲ့သည်။

“ဤနေ့သည် နာဇီဝါဒ ရှုံးနိမ့်မှုကို ကိုယ်စားပြုသည်။ ထို့အပြင် ဤအကြောင်းအရာသည် လက်ရှိအချိန်တွင် ယခင်ကထက် ပို၍ အရေးကြီးနေသည်။ ထို့ကြောင့် တချို့နိုင်ငံများ၊ အထူးသဖြင့် အဓိက နိုင်ငံကြီးများက ဤအောင်ပွဲ၏ ဝမ်းမြောက်ဖွယ်ရာကို ကျွန်ုပ်တို့နှင့် မျှဝေရန် ဆုံးဖြတ်ပြီး ဤနေ့ကို ကျွန်ုပ်တို့နှင့်အတူ တက်ရောက်ကျင်းပလိုပါက၊ ကျွန်ုပ်တို့အနေဖြင့် – အထူးသဖြင့် သမ္မတ ပူတင်က – မော်စကိုတွင် ၎င်းတို့အား ခင်မင်စွာ ဝမ်းမြောက်ဝမ်းသာ ကြိုဆိုမည်” ဟု သူက ပြောကြားခဲ့သည်။ အမေရိကန်ခေါင်းဆောင်ကိုလည်း ထိုအခမ်းအနားများတွင် တွေ့မြင်ရန် သမ္မတက လက်ခံမည်လားဟု မေးမြန်းခံရသောအခါ ပက်စကော့ဗ်က “ဟုတ်ပါတယ်၊ သေချာပါတယ်” ဟု ပြောကြားခဲ့သည်။

လက်ရှိ တင်းမာနေသော ပထဝီနိုင်ငံရေး ရာသီဥတုနှင့် ဥရောပနှင့် တစ်ကမ္ဘာလုံးက ရင်ဆိုင်နေရသည့် စိန်ခေါ်မှုများကို ထောက်ရှုပါက ယင်းနေ့သည် အထူးအရေးပါကြောင်း ပက်စကော့ဗ်က ဆိုသည်။