တစ်ချိန်ချိန်မှာ အမေရိကန်အနေနဲ့ အီရန်အပေါ် စစ်ဆင်ရေးတွေ ပြန်လုပ်ဖို့ အခြေအနေဖန်လာနိုင်ပြီး၊ အဲ့ဒီအခါကျရင် အီရန်နိုင်ငံဆိုတာ ဆက်ရှိနေတော့မှာ မဟုတ်ဘူးလို့ အမေရိကန်သမ္မတ ဒေါ်နယ်ထရမ့်က ပြောဆိုလိုက်ပါတယ်။
“သူတို့ (အီရန်ဘက်က) ဘယ်တော့မှ မှတ်လောက်သားလောက် ဖြစ်မှာမဟုတ်ဘူးဆိုတာ သိပ်ကိုသေချာနေပါတယ်။ ကျွန်တော်တို့အနေနဲ့ ဆင်ခြင်တုံတရားနဲ့ ဆက်ပြီး သည်းခံလို့မရတော့တဲ့ အချိန်တစ်ချိန် ရောက်လာနိုင်တယ်။ အဲ့ဒီအခါကျရင်တော့ ကျွန်တော်တို့ သိပ်ကိုအောင်အောင်မြင်မြင် စတင်ခဲ့တဲ့ကိစ္စကို စစ်ရေးနဲ့ အပြီးသတ်ဖို့ ဖြစ်လာပါလိမ့်မယ်။ အဲ့ဒီလိုသာ ဖြစ်လာခဲ့ရင်တော့ အီရန်နိုင်ငံဆိုတာ နောက်ထပ် ဆက်ရှိနေတော့မှာ မဟုတ်ဘူး” လို့ အမေရိကန်သမ္မတက Truth Social လူမှုကွန်ရက်ပေါ်မှာ ရေးသားခဲ့ပါတယ်။