အိန္ဒိယ နိုင်ငံနှင့် တရုတ် နိုင်ငံတို့သည် ငါးနှစ်နီးပါးအကြာတွင် တိုက်ရိုက်လေကြောင်း ပြေးဆွဲမှုများကို ပြန်လည်စတင်ရန် သဘောတူညီခဲ့ကြသည်ဟု အိန္ဒိယနိုင်ငံခြားရေးဝန်ကြီးဌာနက တနင်္လာနေ့တွင် ပြောကြားခဲ့ပြီး ၂၀၂၂ ခုနှစ်က ၎င်းတို့၏ အငြင်းပွား ဟိမဝန္တာနယ်စပ်တွင် အေ-သအပျောက်ရှိ စစ်ရေးထိပ်တိုက်တွေ့မှုဖြစ်ခဲ့ပြီးနောက် အိမ်နီးချင်းနှစ်နိုင်ငံအကြားဆက်ဆံရေး ပြေလည်လာသည့် အရိပ်အယောင်ပြခဲ့သည်။
မကြာခင်ရက်ပိုင်းတွင် ကျင်းပမည့် အစည်းအဝေး၌ လေကြောင်းပျံသန်းမှုဆိုင်ရာ မူဘောင်နှင့် ပတ်သက်၍ နှစ်နိုင်ငံ ညှိနှိုင်းသွားမည်ဖြစ်ကြောင်း အိန္ဒိယထိပ်တန်းသံတမန်နှင့် တရုတ်နိုင်ငံခြားရေးဝန်ကြီး ဝမ်ယိတို့ တွေ့ဆုံဆွေးနွေးမှုအပြီးတွင် ဝန်ကြီးဌာနက ပြောကြားခဲ့သည်။
ယင်းကိစ္စအပေါ် တရုတ်နိုင်ငံခြားရေးဝန်ကြီးဌာနက အင်္ဂါနေ့(ဇန်နဝါရီ ၂၈) တွင် အတည်ပြုခဲ့ပြီး နှစ်နိုင်ငံအကြား သတင်းသမားများ ဖလှယ်ရာတွင် လွယ်ကူချောမွေ့စေရေးအတွက် ဒုတိယဝန်ကြီးအဆင့်အရာရှိများ ထပ်မံတွေ့ဆုံရန် သဘောတူညီခဲ့သည်ဟုလည်း ပြောဆိုခဲ့သည်။
၂၀၂၀ ပြည့်နှစ် နယ်စပ်တိုက်ခိုက်မှုပေါ်ပေါက်ခဲ့အပြီးတွင် နှစ်နိုင်ငံအကြား တင်းမာမှုများမြင့်တက်ခဲ့ပြီး အိန္ဒိယက တရုတ်ကုမ္ပဏီများ နိုင်ငံအတွင်း ရင်းနှီးမြုပ်နှံရာတွင် အခက်တွေ့အောင်လုပ်ခြင်း၊ နာမည်ကျော် အက်ပ်လီကေးရှင်း ရာနှင့်ချီ၍ ပိတ်ပင်ခြင်းနှင့် ခရီးသည်တင်လေယာဉ်များပျံသန်းမှုကို တင်းကြပ်ခဲ့သည်။ သို့ရာတွင် နှစ်နိုင်ငံအကြား တိုက်ရိုက်ကုန်တင်လေယာဉ်ပျံသန်းမှုများကိုမူ ဆက်လက်ခွင့်ပြုခဲ့သည်။
အောက်တိုဘာလအတွင်းက ရုရှားနိုင်ငံတွင် တရုတ်သမ္မတ ရှီကျင့်ဖျင်နှင့် အိန္ဒိယဝန်ကြီးချုပ် နာရင်ဒြာမိုဒီတို့ တွေ့ဆုံဆွေးနွေးမှု အပါအဝင် အဆင့်မြင့်အရာရှိအဆင့် အစည်းအဝေးများစွာ လုပ်ဆောင်ခဲ့ကြပြီးနောက် လွန်ခဲ့သည့် လေးလအတွင်း နှစ်နိုင်ငံ ဆက်ဆံရေး တိုးတက်လာခဲ့သည်။
Ref: ဘန်ကောက်ပို့စ်