ဝန်ကြီးချုပ် နာရင်ဒြာမိုဒီ၏ စီးပွားရေးအမှုဆောင်များနှင့် ထောက်ခံသူများက အမေရိက၏ အခွန်းစည်းကြပ်မှုကို ကန့်ကွက်သည့်အနေဖြင့် အိန္ဒိယတွင် မက်ဒေါနယ်နှင့် ကိုကာကိုလာ မှအစပြု၍ အမေဇုန် နှင့် အက်ပယ်လ် အထိ တိုင် အမေရိကအခြေစိုက် နိုင်ငံပေါင်းစုံမှ ကုန်ပစ္စည်းများကို သပိတ်မှောက်ရန်တောင်းဆိုမှုများနှင့် ရင်ဆိုင်နေရသည်။
ကမ္ဘာ့လူဦးရေအများဆုံးနိုင်ငံဖြစ်သော အိန္ဒိယသည် ချမ်းသာကြွယ်ဝသော စားသုံးသူများ တိုးပွားလာရန် လျင်မြန်စွာချဲ့ထွင်လာသော အမေရိကန်ကုန်အမှတ်တံဆိပ်များအတွက် အဓိကဈေးကွက်တစ်ခုဖြစ်ပြီး ကြွယ်ဝသူအများစုသည် လူမှုဘဝမြင့်မားလာခြင်း၏ သင်္ကေတအဖြစ် နိုင်ငံတကာကုန်အမှတ်တံဆိပ်များကို ခုံမင်ကြဆဲဖြစ်သည်။
အရောင်းအဝယ်များအပေါ် ချက်ချင်းလက်ငင်း သက်ရောက်မှုရှိသည့် လက္ခဏာများမတွေ့ရသေးသော်လည်း ပို့ကုန်လုပ်ငန်းရှင်များကို တုန်လှုပ်စေခဲ့ကာ နူးဒေလီနှင့် ဝါရှင်တန်အကြား ဆက်ဆံရေးထိခိုက်စေခဲ့သည့် သမ္မတဒေါ်နယ်ထရမ့်ပ်က အိန္ဒိယကုန်ပစ္စည်းများအပေါ် အခွန် ၅၀ ရာခိုင်နှုန်းသတ်မှတ်ပြီးနောက်တွင် ပြည်တွင်းဖြစ်ကို ဝယ်ယူအားပေးရန်နှင့် အမေရိကုန်ထုတ်ကုန်များကို စွန့်လွှတ်ကြရန် ဆိုရှယ်မီဒီယာနှင့် ပြင်ပတွင်ပါ တိုက်တွန်းလျက်ရှိကြသည်။
ယင်းကိစ္စနှင့်ပတ်သက်၍ ရိုက်တာသတင်းဌာန၏ မေးမြန်းမှုကို မက်ဒေါ်နယ်၊ ကိုကာကိုလာ၊ အမေဇုန် နှင့် အက်ပယ်လ်တို့က လတ်တလောတွင် တုန့်ပြန်ဖြေကြားခြင်း မရှိခဲ့ပေ။
စိုက်ပျိုးရေးသမားများနှင့် စွန့်ဦးတီထွင်သူများအနေဖြင့် အင်ဒီးယားထုတ်ကုန်ကို ကမ္ဘာတစ်ဝန်း နှစ်သက်အောင်စွမ်းဆောင်ရန်နှင့် ကမ္ဘာတစ်ဝန်းနာမည်ကြီးသည့် အစားအစာနှင့် အလှအပဆိုင်ရာ ထုတ်ကုန်များဖြင့် ထိုးဖောက်ခဲ့သည့် တောင်ကိုရီးယားထံမှ သင်ခန်းစာယူကြရန် ပြည်တွင်း အမှတ်တံဆိပ်တစ်ခုဖြစ်သည့် Wow Skin Science ပူးတွဲတည်ထောင်သူ မာနစ်ရှ်ချောင်ဒရီက လင့်က်အင်တွင် ဗီဒီယိုမက်ဆေ့ချ် တင်ခဲ့သည်။
“မိုင်ထောင်ချီဝေးတဲ့ ထုတ်ကုန်တွေအတွက် ကျွန်တော်တို့တွေ တန်းစီခဲ့ပါတယ်။ ကိုယ့်နိုင်ငံမှာ ကိုယ့်နိုင်ငံသားထုတ်လုပ်သူတွေက အာရုံစိုက်ခံရဖို့ ရုန်းကန်နေချိန်မှာ ကိုယ်ပိုင်မဟုတ်တဲ့ အမှတ်တံဆိပ်တွေကို ကျွန်တော်တို့ ဂုဏ်ယူစွာ အသုံးပြုခဲ့ကြတယ်” ဟု သူက ပြောဆိုခဲ့သည်။
ဖုန်းခေါ်ဆိုမှု ဝန်ဆောင်မှုပေးသည့် Driveu စီအီးအို ရမ်ရှက်ထရီက အိန္ဒိယတွင် တရုတ်နိုင်ငံကဲ့သို့ ကိုယ်ပိုင် ပြည်တွင်းသုံး Twitter၊ Google၊ YouTube၊ WhatsApp၊ Fb တို့ ရှိသင့်သည်ဟု ထောက်ပြခဲ့သည်။
တနင်္ဂနွေနေ့က Bengaluru တွင် ကျင်းပသော စုဝေးပွဲတစ်ခုတွင် ကိုယ့်ကိုယ်ကိုယ်အမှီပြုရသောနိုင်ငံဖြစ်လာရန် မိုဒီက အထူးပန်ကြားချက်လုပ်ခဲ့ပြီး အိန္ဒိယနည်းပညာကုမ္ပဏီများသည် ကမ္ဘာအတွက် ထုတ်ကုန်များ ဖန်တီးပေးခဲ့နေသည်ဖြစ်သော်လည်း ယခုအခါတွင် အိန္ဒိယ၏ လိုအပ်ချက်များကို ပိုမိုဦးစားပေးရမည့် အချိန်ဖြစ်သည်ဟု ပြောကြားခဲ့သည်။
Ref: ဘန်ကောက်ပို့စ်