အိန္ဒိယနိုင်ငံ မဟာရပ်ရှ်ထရာပြည်နယ်တွင် ထုံကျင်ခြင်း၊ အားနည်းခြင်းနှင့် နာကျင်ကိုက်ခဲခြင်းတို့ဖြစ်စေသော အာရုံကြောရောဂါတစ်မျိုးဖြစ်သည့် Guillain-Barre syndrome(GBS) ရောဂါဖြစ်ပွားနေပြီး လူတစ်ဦးေ-သဆုံးခဲ့ကြောင်းနှင့် ရောဂါဖြစ်ပွားသူများနေကြောင်း ကျန်းမာရေးအရာရှိများက တနင်္လာနေ့တွင် ပြောကြားခဲ့သည်။
လက်ရှိအချိန်အထိ ရောဂါဖြစ်ပွားသူလူနာ စုစုပေါင်း ၁၀၁ ဦးနေပြီး အများစုသည် ပြည်နယ်မြို့တော် မွမ်ဘိုင်းမှ မိုင် ၁၁၀ အကွာရှိ ပူနေးမြို့နှင့် ဝန်းကျင်ဒေသများမှဖြစ်သည်။
ဆိုလပူရ်မြို့တွင် လူတစ်ဦးေ-သဆုံးခဲ့ပြီး လက်ရှိတွင် လူနာ ၁၆ ဦးကို အောက်ဆီဂျင်ပေးထားရသည်ဟု ပြည်နယ်ကျန်းမာရေးဌာနက ထုတ်ပြန်ပြောဆိုခဲ့သည်။
ပြည်သူများအနေဖြင့် အထိတ်တလန့်ဖြစ်စရာမလိုကြောင်း၊ ပြည်နယ်ကျန်းမာရေးဌာနက ကြိုတင်ကာကွယ်ရေးနှင့် ထိန်းချုပ်ရေးအစီအမံများကို အကောင်အထည်ဖော်ရန်ပြင်ဆင်ထားပြီးဖြစ်ကြောင်း သတင်းထုတ်ပြန်ချက်တွင် ဖေါ်ပြထားသည်။
ရောဂါဖြစ်ပွားပြီးနောက် အခြေအနေကို အကဲဖြတ်ရန်အတွက် အစိုးရက အဖွဲ့ဝင် ခုနစ်ဦးပါ အဖွဲ့တစ်ဖွဲ့ကို စေလွှတ်ထားသည်ဟု ပြည်ထောင်စုကျန်းမာရေးဝန်ကြီးဌာန ပြောရေးဆိုခွင့်ရှိသူက ပြောဆိုသည်။
ခန္ဓာကိုယ်၏ ခုခံအားစနစ်က အာရုံကြောများကို တိုက်ခိုက်သည့် ရောဂါအခြေအနေဖြစ်ကာ လေဖြတ်ပြီး အသက်ဆုံးရှုံးသည်အထိ ဖြစ်နိုင်သည်ဟု ဆိုသည်။
ကမ္ဘာ့ကျန်းမာရေးအဖွဲ့၏ အဆိုအရ ရောဂါလက္ခဏာအများစုသည် ဗိုင်းရပ်စ် သို့မဟုတ် ဘက်တီးရီးယားကူးစက်ခံရပြီး ရက်ပိုင်း သို့မဟုတ် ရက်သတ္တပတ်အနည်းငယ်အတွင်း ပေါ်လေ့ရှိပြီး ပုံမှန်အားဖြင့် ရက်သတ္တပတ်အနည်းငယ်ကြာတတ်သည်ဟု ဆိုသည်။
GBS ရောဂါဖြစ်ပွားမှုများ ရုတ်တရက်များပြားလာရခြင်း၏ နောက်ကွယ်မှအကြောင်းရင်းကို အတိအကျမသိရသေးဟု အိန္ဒိယဆရာဝန်များအသင်း ဥက္ကဌဟောင်း Avinash Bhondwe က ပြောဆိုပြီး ကူးစက်ပြီးနောက် ကိုယ်ခံအားအလိုအလျောက်ကျသည့် ရောဂါဖြစ်သည်ဟု ဆက်လက် ပြောဆိုခဲ့သည်။
“အလိုအလျောက်ခုခံအားကျတဲ့ ရောဂါတွေက မကူးစက်နိုင်ပါဘူး၊ လူနာတစ်ယောက်ကနေ အခြားတစ်ယောက်ကို မကူးနိုင်ပါဘူး၊ ဒါပေမဲ့ အများအားဖြင့်တော့ ရောဂါပိုးက ပြန့်ပွားပါတယ်” သူက ဆိုသည်။
ရောဂါဖြစ်ပွားနေသည့် ပူနေးမြို့၏ အချို့နေရာများတွင် ရေနုတ်မြောင်းများနှင့် ရေပိုက်လိုင်းများ ဘေးချင်းကပ်သွယ်တန်းထားသောကြောင့် သောက်သုံးနိုင်သောရေနှင့် ရေနုတ်မြောင်းရေဆိုးတို့ ရောနှောမှုဖြစ်ခြင်းသည် GBS ရောဂါဖြစ်ပွားရခြင်း၏ အကြောင်းရင်းများထဲမှ တစ်ခုဖြစ်သည်ဟု Bhondwe က ပြောကြားခဲ့သည်။
Ref: ယူအက်စ်နူးစ်