ရခိုင်ပြည်နယ် မဲဆန္ဒနယ်အမှတ် (၁၀) အမျိုးသားလွှတ်တော်ကိုယ်စားလှယ် ဒေါက်တာခိုင်ခိုင်ဆုက အာဆီယံအနေဖြင့် တန်းတူညီမျှမှုနှင့် ဆွေးနွေးညှိနှိုင်းမှုကို အခြေခံ၍ ဆုံးဖြတ်ချက်များချမှတ်သည့် အစဉ်အလာကို ဆက်လက်ထိန်းသိမ်းသင့်ကြောင်းနှင့် အာဆီယံ၏ တူညီဆန္ဒ (၅) ချက်သည် မြန်မာနိုင်ငံအတွက် ဥပဒေအရ စည်းနှောင်မှုမရှိကြောင်း ယနေ့ ဇူလိုင် ၂ ရက်တွင် ကျင်းပသည့် တတိယအကြိမ် ပြည်ထောင်စုလွှတ်တော် ဒုတိယပုံမှန်အစည်းအဝေး (ပဉ္စမနေ့) တွင် ဆွေးနွေးပြောကြားခဲ့သည်။
ယင်းဆွေးနွေးချက်မှာ ကလောမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဒေါက်တာနန္ဒာလှမြင့် တင်သွင်းသည့် “အာဆီယံ၏ တူညီဆန္ဒ (၅) ချက်သည် အာဆီယံ၏ အခြေခံမူများနှင့် ကွဲလွဲနေသည့်အပြင် မြန်မာနိုင်ငံ၏ ပကတိအခြေအနေနှင့်လည်း ကိုက်ညီမှုမရှိသဖြင့် ပြန်လည်သုံးသပ်ဆောင်ရွက်ပေးရန် ပြည်ထောင်စုအစိုးရအား တိုက်တွန်းကြောင်း” အဆိုကို ထောက်ခံဆွေးနွေးခဲ့ခြင်းဖြစ်သည်။
ဒေါက်တာခိုင်ခိုင်ဆုက ယနေ့ကမ္ဘာ့ပထဝီဝင်နိုင်ငံရေး အားပြိုင်မှုများ ပြင်းထန်လာသည့် အခြေအနေတွင် အာဆီယံအနေဖြင့် တန်းတူညီမျှမှုနှင့် အပြန်အလှန်ဆွေးနွေးညှိနှိုင်းမှုကို အခြေခံသည့် ဆုံးဖြတ်ချက်ချမှတ်ရေး အစဉ်အလာကို ဆက်လက်ထိန်းသိမ်းသင့်ကြောင်း ပြောကြားခဲ့သည်။
ထို့ပြင် ၂၀၂၁ ခုနှစ် ဧပြီ ၂၄ ရက်က အင်ဒိုနီးရှားနိုင်ငံ ဂျကာတာမြို့၌ ကျင်းပခဲ့သည့် အာဆီယံနိုင်ငံ့ခေါင်းဆောင်များ အစည်းအဝေးမှာ အာဆီယံ၏ ပုံမှန်ထိပ်သီးအစည်းအဝေး မဟုတ်ဘဲ အလွတ်သဘောအစည်းအဝေးသာဖြစ်ကြောင်း၊ တူညီဆန္ဒ (၅) ချက်ကိုလည်း အဖွဲ့ဝင်နိုင်ငံများအား ကြိုတင်သဘောတူညီချက်ရယူထားခြင်းမရှိဘဲ အစည်းအဝေးအပြီး ဥက္ကဋ္ဌ၏ ထုတ်ပြန်ချက်နောက်ဆက်တွဲအဖြစ်သာ ဖော်ပြခဲ့ခြင်းဖြစ်ကြောင်း ဆွေးနွေးခဲ့သည်။
ထို့ကြောင့် တူညီဆန္ဒ (၅) ချက်သည် အဖွဲ့ဝင်နိုင်ငံအားလုံး၏ သဘောတူညီချက်ဖြင့် ချမှတ်ထားခြင်းမဟုတ်သဖြင့် မြန်မာနိုင်ငံအတွက် ဥပဒေအရ စည်းနှောင်မှုမရှိကြောင်း ၎င်းက ပြောကြားခဲ့သည်။
ထို့အပြင် အာဆီယံအဖွဲ့ဝင်နိုင်ငံအချို့၏ မြန်မာနိုင်ငံအပေါ် ခွဲခြားဆက်ဆံသည့် လုပ်ဆောင်မှုများသည် အာဆီယံပဋိညာဉ်စာတမ်းပါ အခြေခံမူများနှင့် မကိုက်ညီကြောင်း၊ အာဆီယံထိပ်သီးအစည်းအဝေးများနှင့် နိုင်ငံခြားရေးဝန်ကြီးများအစည်းအဝေးများတွင် နိုင်ငံရေးအရ ကိုယ်စားပြုသူမဟုတ်သူသာ တက်ရောက်ရမည်ဟူသည့် အစဉ်အလာမရှိဘဲ တစ်ဖက်သတ်ဆုံးဖြတ်ချက်များ ချမှတ်ခဲ့ခြင်းကို အာဆီယံအတွင်း လက်မခံလိုသည့် အဖွဲ့ဝင်နိုင်ငံများလည်း ရှိနေကြောင်း ဒေါက်တာခိုင်ခိုင်ဆုက ဆွေးနွေးပြောကြားခဲ့သည်။