အာဆီယံ(၁၀)နိုင်ငံအပြင် တရုတ်၊ အိန္ဒိယ၊ ဂျပန်နှင့် ကိုရီးယားနိုင်ငံများရှိတက္ကသိုလ်အသီးသီးမှပညာရှင်များပါဝင်မည့် ပထမအကြိမ် မြစ်ကြီးနားနိုင်ငံတကာပညာရေးဖိုရမ်(၂၀၂၆)ကို လာမည့် နိုဝင်ဘာလအတွင်း၌ ကချင်ပြည်နယ်၊ မြစ်ကြီးနားမြို့ရှိ မြစ်ကြီးနားတက္ကသိုလ်တွင်ကျင်းပသွားမည်ဖြစ်ကြောင်း သိရသည်။
အဆိုပါ ဖိုရမ်ကျင်းပနိုင်ရေးအတွက် ပြည်နယ်ဝန်ကြီးချုပ်ဦးခက်ထိန်နန် ဦးဆောင်၍ လုပ်ငန်းညှိနှိုင်းအစည်းအဝေးကို ပြီးခဲ့သည့်ရက်ပိုင်းအတွင်းကကျင်းပရာ ပြည်နယ်ဝန်ကြီးချုပ်က ဖိုရမ်သည် မြစ်ကြီးနားမြို့၏ သမိုင်းတစ်လျှောက် ပထမဆုံးအကြိမ်အဖြစ်အကြီးကျယ်ဆုံးနှင့် အခမ်းအနားဆုံးကျင်းပမည့် နိုင်ငံတော်အဆင့်၊ နိုင်ငံတကာပညာရေးညီလာခံကြီးဖြစ်သည်ဟုပြောကြားခဲ့ကြောင်း သိရသည်။
ထို့ပြင် ပြည်နယ်၏ဂုဏ်ဒြပ်ကို ကမ္ဘာ့အလယ်၌မြှင့်တင်ပေးမည့် ပညာရေးဆိုင်ရာခြေလှမ်းသစ်ဖြစ်ကာ ဖိုရမ်သည် ပြည်နယ်၏ပညာအရည်အသွေးကိုမြှင့်တင်ပေးရုံသာမက ကမ္ဘာလုံးဆိုင်ရာအမြင်နှင့် ဒေသတွင်းအလားအလာများကို ဟန်ချက်ညီစုစည်းချိတ်ဆက်ပေးပြီး ပြည်နယ်ဖွံ့ဖြိုးတိုးတက်ရေးနှင့် ငြိမ်းချမ်းရေးကို အရှိန်အဟုန်ဖြင့်အထောက်အကူပေးမည်ဟုလည်းပြောကြားခဲ့ကြောင်း သိရသည်။
ထို့အတူ ပြည်နယ်ဝန်ကြီးချုပ်သည် ဇူလိုင် ၁၇ ရက်ကလည်း ဖိုရမ်ကျင်းပမည့် မြစ်ကြီးနားတက္ကသိုလ်၏ ဘွဲ့ နှင်းသဘင်ခန်းမဆောင်နှင့် သုတေသနဌာနအဆောင်တို့အားကြည့်ရှုစစ်ဆေးခဲ့ကြောင်း သိရသည်။
မြစ်ကြီးနားနိုင်ငံတကာပညာရေးဖိုရမ်(၂၀၂၆)ကို ပြည်နယ်ဖွံ့ဖြိုးရေးမှသည် နိုင်ငံ၏ငြိမ်းချမ်းရေးနှင့် လူမှုစီးပွားတိုးတက်မှုဆီသို့ဟူသော မဟာဗျူဟာမြောက်ရည် မှန်းချက်ဖြင့်ကျင်းပမည်ဖြစ်ကာ စာတမ်းဖတ်ပွဲများ၊ ပညာရှင်များ၏ အထူးဟောပြောပွဲကဏ္ဍများ၊ ငြိမ်းချမ်းရေး၊ ပညာရေးဆိုင်ရာအလုပ်ရုံဆွေးနွေးပွဲများနှင့် ဒေ သထွက်ကုန်နှင့် သုတေသနအခြေပြုတီထွင်ဆန်းသစ်မှုပြပွဲများပါဝင်မည်ဖြစ်ကြောင်း သိရသည်။