အာဆီယံဆက်သွယ်ရေးအလုပ်ရုံဆွေးနွေးပွဲကိုအိမ်ရှင်အဖြစ် လက်ခံကျင်းပ

ရန်ကုန်၊ ဖေဖော်ဝါရီ ၂၇

မြန်မာနိုင်ငံသည် “အစိုးရဆက်သွယ်မှုကို ကျွမ်းကျင်ပိုင်နိုင်စွာ ထိန်းချုပ်ခြင်း” အလုပ်ရုံဆွေးနွေးပွဲကို နေပြည်တော်တွင် ဗုဒ္ဓဟူးနေ့ကအိမ်ရှင်အဖြစ်လက်ခံကျင်းပ ပြုလုပ်ခဲ့ကြောင်း ကြေးမုံသတင်းစာတွင် ဖော်ပြထားသည်။

ပထမနေ့ ဆွေးနွေးမှုတွင် အစိုးရပြောရေးဆိုခွင့်ရှိသူများ၏ ကျွမ်းကျင်မှုနှင့် စိန်ခေါ်မှုများ၊ သက်ဆိုင်ရာနိုင်ငံများတွင် ၎င်းတို့၏ အခန်းကဏ္ဍ၊ မီဒီယာအခင်းအကျင်းနှင့် သတင်းအတုများကို ကိုင်တွယ်ဖြေရှင်းနည်းများ ချပြဆွေးနွေးခဲ့ကြသည်။

ပါဝင်ဆွေးနွေးသူများသည် လူထုဆက်သွယ်ရေးနှင့် သုတေသနပြုခြင်း၊ အသံတည်းဖြတ်ခြင်း၊ မီဒီယာဆက်ဆံရေး၊ တွေ့ဆုံမေးမြန်းခြင်း၊ လျှို့ဝှက်ထားသော အချက်အလက်များကို ကိုင်တွယ်ဆောင်ရွက်ခြင်းနှင့် လက်တွေ့လေ့ကျင့်ခန်းများမှတဆင့် ရှုပ်ထွေးသောပြဿနာများကို ထိထိရောက်ရောက်ဆက်သွယ်ပြောဆိုခြင်းစသည့် အကြောင်းအရာများကို ဆွေးနွေးခဲ့ကြောင်း သတင်းတွင်ဖော်ပြထားသည်။

အဆိုပါ အလုပ်ရုံ ဆွေးနွေးပွဲကို မြန်မာနိုင်ငံ ပြန်ကြားရေး ဝန်ကြီးဌာန လက်အောက်ရှိ မီဒီယာ ဖွံ့ဖြိုးတိုးတက်ရေး ဦးစီးဌာနမှ အာဆီယံ ယဉ်ကျေးမှု ရန်ပုံငွေ အဖွဲ့၏ ပံ့ပိုးကူညီမှုဖြင့် အာဆီယံ သတင်းအချက်အလက် ဗဟိုကော်မတီ စီမံချက်၏ တစ်စိတ်တစ်ပိုင်း အဖြစ် ကျင်းပခဲ့ခြင်း ဖြစ်သည်။

အဆိုပါအခမ်းအနားသည် အာဆီယံဒေသတွင်း အစိုးရပြောရေးဆိုခွင့်ရှိသူများ၏ စွမ်းဆောင်ရည်ကို မြှင့်တင်ရန် ရည်ရွယ်ပြီး မီဒီယာများနှင့် အစိုးရအရာရှိများထံသို့ ထိရောက်စွာ ဆက်သွယ်နိုင်ရန်၊ အဓိကသတင်းစကားများ ဖြန့်ဝေခြင်း၊ အစိုးရနှင့် ပြည်သူလူထုကြား ယုံကြည်မှုတည်ဆောက်ရန်နှင့် အကျပ်အတည်းများကို ရင်ဆိုင်ဖြေရှင်းရန် ကျွမ်းကျင်မှုနှင့် အသိပညာများ ဖလှယ်ရန် ရည်ရွယ်ထားသည်။

အလုပ်ရုံပွဲ အခမ်းအနားသို့ မြန်မာနိုင်ငံ စာနယ်ဇင်းကောင်စီမှ တာဝန်ရှိသူများ၊ သင်တန်းဆရာများ၊ ကမ္ဘောဒီးယား၊ ထိုင်း၊ ဖိလစ်ပိုင်၊ မလေးရှား၊ မြန်မာ၊ လာအို၊ အင်ဒိုနီးရှား၊ အာဆီယံ နိုင်ငံများမှ ကိုယ်စားလှယ်များအပါအဝင် အာဆီယံ အထွေထွေအတွင်းရေးမှူးချုပ်ရုံးမှ ကိုယ်စားလှယ်များ တက်ရောက်ခဲ့ကြသည်။ လေ့လာသူများအဖြစ် ဂျပန်နိုင်ငံမှ ကိုယ်စားလှယ်များ တက်ရောက်ကြပြီး မြန်မာနိုင်ငံရှိ ဝန်ကြီးဌာနများမှ တာဝန်ရှိသူများလည်း တက်ရောက်ခဲ့ကြောင်း သိရသည်။

သုံးရက်ကြာ အလုပ်ရုံဆွေးနွေးပွဲကို သောကြာနေ့ထိပြုလုပ်သွားမည်ဖြစ်သည်။

Ref: ရှင်းဟွာ