မြန်မာအမျိုးသမီး ယူ-၂၀ အသင်းအနေဖြင့် အကောင်းဆုံးရလဒ်ကိုယူပြီး အောင်မြင်မှုရယူနိုင်မယ်ဟု ယုံကြည်ကြောင်း မြန်မာအမျိုးအသင်းနည်းပြချုပ် ဒေါ်သက်သက်ဝင်းက ပြောကြားသည်။
ယနေ့ ဩဂုတ်(၅)ရက်က ကျင်းပပြုလုပ်သည့် 2026 AFC U-20 Women’s Asian Cup ခြေစစ်ပွဲအုပ်စု (D)၏ပွဲကြိုသတင်း စာရှင်းလင်းပွဲအတွင်းပြောကြားခဲ့ခြင်းလည်းဖြစ်သည်။
“ကျွန်တော့်ကို အခွင့်အရေးထပ်ပေးတဲ့အတွက် ကျေးဇူးတင်ပါတယ်။ ဒါကြောင့်လည်း ကလေးတွေရော၊ ကျွန်တော်တို့ရော စိတ်ပိုင်းဆိုင်ရာ အကောင်းဆုံးပြု ပြင်တည်ဆောက်ပြီးတော့ ပြိုင်ပွဲဝင်သွားမှာပါ။ ယုံကြည်မှုလည်း ရှိပါတယ်။ ကျွန်တော်တို့အသင်းက အကောင်းဆုံးရလဒ်ကို ရယူပြီးတော့ အောင်မြင်မှုရယူနိုင်မယ်လို့ ယုံကြည်ပါတယ်။ ပရိသတ်တွေကိုလည်း တောင်းပန်ပါတယ်။ ဒီပွဲကိုလည်း လာရောက်အားပေးပါဦးလို့ ဖိတ်ခေါ်ပါတယ်။”ဟု ဆိုသည်။
ယနေ့ ပွဲကြိုသတင်းစားရှင်းလင်းပွဲအတွင်း အုပ်စု(D)တွင်ပါဝင်ယှဉ်ပြိုင်မည့် အိန္ဒိယအသင်း၊ အင်ဒိုနီးရှားအသင်းနီင့် တာ့ခ်မင့်နစ္စတန်အသင်းတို့၏ နည်းပြချုပ်များက ပွဲကြိုသတင်းစကားပြောကြားခဲ့ကြသည်။
အိန္ဒိယအမျိုးသမီး ယူ-၂၀ အသင်း နည်းပြချုပ် Mr. Joakim Alexandersson က” ကျွန်တော်တို့ အနေနဲ့ ဒီပွဲအတွက် နှစ်လလောက် အချိန်ယူပြင်ဆင်ခဲ့ပါတယ်။ ခြေစစ်ပွဲ အောင်မြင်မယ်လို့လည်း မျှော်လင့်ပါတယ်။ ခက်ခဲမယ်ဆိုတာတော့ သိပါတယ်။ အဲ့ဒီအတွက်လည်း အကောင်းဆုံး ကြိုးစားပြင်ဆင် ထားပါတယ်။”ဟုဆိုသည်။
ထို့အတူ အင်ဒိုနီးရှား အမျိုးသမီး ယူ-၂၀ အသင်းနည်းပြချုပ် Mr. Akira Higashiyama က “အသင်းတိုင်းက ခြေစစ်ပွဲအောင်ဖို့ အခွင့်အရေးရှိပါတယ်။ အိမ်ရှင်မြန်မာအသင်းနဲ့ ကျွန်တော်တို့ ပြီးခဲ့တဲ့ အာဆီယံပွဲမှာ ဆုံခဲ့ပြီးပြီဖြစ်လို့ မြန်မာအသင်းအကြောင်းလည်း သိထားပါတယ်။ ပြိုင်ဘက်တိုင်းကို အလေးထားယှဉ်ပြိုင်သွားမှာဖြစ်ပြီး လက်ရှိအချိန်မှာတော့ မနက်ဖြန်မှာ ရင်ဆိုင်ရမဲ့ အိန္ဒိယနဲ့ပွဲအတွက်ပဲ အာရုံစိုက်ထားပါတယ်။”ဟု ဆိုသည်။
ထို့အပြင် တက်ခ်မင်နစ္စတန် အမျိုးသမီး ယူ-၂၀ အသင်း နည်းပြချုပ် Mr. Boris Borovik က “ဒါက ကျွန်တော်တို့အတွက် ဒုတိယအကြိမ်အဖြစ် လာရောက်ယှဉ်ပြိုင်ရတာဖြစ်တဲ့အတွက် မြန်မာနိုင်ငံက ကျွန်တော်တို့နဲ့ မစိမ်းပါဘူး။ ကျွန်တော်တို့မှာ ပြီးခဲ့တဲ့ စီနီယာ လက်ရွေးစင်အသင်း ခြေစစ်ပွဲတုန်းက ကစားသမားအများစုက အခု ယူ-၂၀ အသင်းမှာ ပြန်လည်ပါဝင်နေပါတယ်။ မြန်မာ့လက်ရွေးစင် အသင်းကြီးနဲ့ လူငယ်အသင်းက ခြေစွမ်းတောင့်တင်းမှုပိုင်းနဲ့ ကစားပုံ သိပ်မကွာဘူးလို့ ယူဆပါတယ်။ ကျွန်တော်တို့အနေနဲ့ စီနီယာအသင်းနဲ့ ရင်ဆိုင်ဖူးတဲ့ အတွေ့အကြုံရှိတာကြောင့် ဒီပွဲမှာ ခံစစ်ပိုင်းကို သေချာပြင်ဆင်ပြီး အာရုံစိုက်ကစားရင် ရလဒ်ကောင်းရယူနိုင်လိမ့်မယ်လို့ မျှော်လင့်ပါတယ်။”ဟု ဆို သည်။
ပွဲကိုသတင်းစာရှင်းလင်းပွဲအပြီး ညနေ ၄ နာရီအချိန်၌ မြန်မာ့လက်ရွေးစင် အမျိုးသမီးအသင်း၊ တာ့ခ်မင်နစ္စတန်၊ အိန္ဒိယနှင့် အင်ဒိုနီးရှား အမျိုးသမီး ယူ-၂၀ အသင်းတို့ official training များ အသီးသီးပြုလုပ်ခဲ့ကြကြောင်း သိရသည်။