အရင်း/အတိုး ပေးဆပ်ရန်ပျက်ကွက်သောချေးငွေများ လျော့နည်းကျဆင်းလာ

မြန်မာနိုင်ငံ ဘဏ်လုပ်ငန်းကဏ္ဍ၏ ၂၀၂၁ ခုနှစ်မှ ၂၀၂၃ ခုနှစ် သုံးနှစ်တာအတွင်းတိုးတက်လာမှုနှင့်ပတ်သက်၍ ဗဟိုဘဏ် ဥက္ကဋ္ဌဒေါ်သန်းသန်းဆွေက ပြောကြားခဲ့ခြင်းဖြစ်သည်။

မတ် ၃၁ ရက်နံနက် ၁၁ နာရီကကျင်းပသည့် ၂၀၂၂-၂၀၂၃ ဘဏ္ဍာနှစ်ကုန်တွင် မြန်မာနိုင်ငံဘဏ်လုပ်ငန်းကဏ္ဍရှိ ငွေကြေးဆိုင်ရာဖြစ်ပေါ်တိုးတက်မှုများ၊နိုင်ငံခြားဘဏ်များနှင့်ငွေပေးချေမှုကိစ္စရပ်များ၊ငွေကြေးခဝါချမှုဆိုင်ရာ သတ်မှတ်စည်းမျဉ်းစည်းကမ်းများ လိုက်နာဆောင်ရွက်မှုများကို ဗဟိုဘဏ်နှင့်ပုဂ္ဂလိကဘဏ်များကြား သုံးသပ်ဆွေးနွေးပွဲတွင် ပြောကြားခဲ့ခြင်းဖြစ်သည်။

ပုဂ္ဂလိကဘဏ်များ၏ အပ်ငွေသည် ယခင်ဘဏ္ဍာနှစ်နှင့်နှိုင်းယှဉ်ပါက ၁၄ ဒသမ ၄၂ ရာခိုင်နှုန်း၊ချေးငွေသည် ၇ ဒသမ ၈၁ ရာခိုင်နှုန်းတိုးတက်ခဲ့ပြီး Credit to GDP Ratio သည် ၂၈ ရာခိုင်နှုန်းရှိကာ ယခင်နှစ်နှင့်နှိုင်းယှဉ်ပါကဘဏ်များ၏ ဗဟိုဘဏ်ရှိအပ်နှံငွေသည် ၃၅ ရာခိုင်နှုန်းနှင့်ဘဏ်များ၏လက်ဝယ်ရှိ ငွေသားလက်ကျန်ပမာဏသည် ၃၆ ရာခိုင်နှုန်း တိုးတက်လာသည်ဟု ပြောသည်။

Interbank Market ရှိ ငွေကြေးလွယ်ကူမှု Turnover သည် ငွေကျပ် ၁၁၆၆ ဘီလီယံ ယခင်နှစ်နှင့်နှိုင်းယှဉ်ပါက ၉၈ ရာခိုင်နှုန်းခန့်တိုးတက်ခဲ့ပြီး နိုင်ငံခြားဘဏ်များနှင့်ပုဂ္ဂလိကဘဏ်များကြားတွင် ကျပ်ငွေလွယ်ကူမှုပိုမိုမြင့်မားလာကာ ကုန်သွယ်မှုကဏ္ဍအတွက်လိုအပ်သည့် ကာလတိုငွေကြေးဖြည့်ဆည်းမှုများလည်း အားကောင်းလာ၍ စီးပွားရေးဖွံ့ဖြိုးလာမှုနှင့်လုပ်ငန်းလည်ပတ်မှုများအားကောင်းလာသဖြင့် ဘဏ်များအနေဖြင့် ချေးငွေများပိုမိုကောက်ခံရရှိလာပြီး ချေးငွေများအပေါ် (Restructuring and Rescheduling)များ ဆောင်ရွက်ပေးခြင်းကြောင့် ပိုမိုလုပ်သာကိုင်သာရှိလာ၍ အရင်း/အတိုး ပေးဆပ်ရန်ပျက်ကွက်သောချေးငွေများ လျော့နည်းကျဆင်းလာသည်ဟု ပြောသည်။

နိုင်ငံခြားငွေနှင့်ပတ်သက်၍ ဗဟိုဘဏ်ကသတ်မှတ်ပေးသည့် စည်းမျဉ်းများကိုဘဏ်များ၊ Exporter များ၊ Importer များလိုက်နာရန်၊ Export Earnings ပြန်မဝင်ခြင်းများကို စောင့်ကြည့်စစ်ဆေးရန်၊လိုအပ်သည့်အထောက်အထားများ ရယူစစ်ဆေးရန်၊ KYC/CDD နှင့်အမေရိကန်ဒေါ်လာ ၁၀၀၀၀ နှင့်အထက် ငွေလွှဲဝင်ရောက်ခြင်းများကို ဗဟိုဘဏ်သို့သတင်းပို့ရန်၊သတင်းပို့ရန်ပျက်ကွက်ပေါ့လျော့မှုများကြောင့် ဆုံးရှုံးမှုများဖြစ် လာပါက စီမံခန့်ခွဲရေးဆိုင်ရာ နည်းလမ်းဖြင့် အရေးယူသွားမည်ဖြစ်ကာ ငွေကြေးဆိုင်ရာစုံစမ်းထောက်လှမ်းရေးအဖွဲ့ (FIU)သို့ သတင်းပေးပို့ရမည့် စာရင်းများအားစနစ်တကျပေးပို့ရန်လည်း မှာကြားခဲ့သည်။  

နယ်စပ်ဒေသတွင် ဖွင့်လှစ်ထားသည့်ဘဏ်ခွဲများ၌ တရားမဝင်ငွေလွှဲမှုများမဖြစ်ပွားစေရန် အထူးဂရုပြု၍ ငွေကြေးခဝါချမှုနှင့်အကြမ်းဖက်မှုကိုငွေကြေးထောက်ပံ့မှုများသည် မိုဘိုင်းဖုန်းအသုံးပြု၍ ငွေလွှဲဆောင်ရွက်မှုများမှတစ်ဆင့် အဖြစ်များသောကြောင့် Monitoring အလေးထားဆောင်ရွက်ရန်လိုသည်ဟု ပြောသည်။

ယွမ်/ဘတ်အပြင် ရူပီးနှင့်ကျပ်ကိုပါ သုံးစွဲနိုင်ရန် အိန္ဒိယဗဟိုဘဏ်နှင့်အတည်ပြုချက်ရယူပြီးဖြစ်၍ မကြာခင်ကုန်သွယ်မှုကဏ္ဍသို့ ဆောင်ရွက်မည့် အစီအမံများချပြပေးမည်ဟုလည်း ပြောကြားခဲ့သည်။

ကောင်းမွန်သည့် ဘဏ်စနစ်ဖြစ်ပေါ်ပြီး တည်ငြိမ်စွာဖွံ့ဖြိုးတိုးတက်ရန် ဘဏ်များအားလုံးစည်းလုံးညီညွတ်စွာ ဝိုင်းဝန်းပူးပေါင်းကြိုးပမ်းရန်၊ ဘဏ်လုပ်ငန်းရေရှည်ဖွံ့ဖြိုးစေရန် တိုးတက်ကောင်းမွန်သည့် ဘဏ်လုပ်ငန်းဝန်ဆောင်မှုများဖြင့် ပြည်သူ လူထုကို အလုပ်အကျွေးပြုရန်၊ Risk Management ကိုတိုးမြှင့်ဆောင်ရွက်ရန်နှင့်လုပ်ငန်းလုံခြုံမှုနှင့်အောင်မြင်မှုတို့ကို ဟန်ချက်ညီပေါင်းစပ်၍ ပြဋ္ဌာန်းထားသည့် ဥပဒေ၊စည်းမျဉ်း စည်းကမ်းများနှင့်အညီဆောင်ရွက်ရန်တို့ကိုလည်း ဗဟိုဘဏ် ဥက္ကဋ္ဌကမှာကြားခဲ့သည်။