နေပြည်တော်၊ စက်တင်ဘာ ၅
ရန်ကုန်-နေပြည်တော် ရထားလမ်းပိုင်းတွင် ပြေးဆွဲပေးနေသည့် အမှတ် (၈) အစုန် နေပြည်တော်-ရန်ကုန် DEMU လူစီးအမြန်ရထားတွဲအား ခဲဖြင့်ပစ်ပေါက်ခံရသဖြင့် ရထားတွဲ၏ လေကာမှန် ပျ-က်စီးသွားခဲ့ကြောင်း မြန်မာ့မီးရထားထံမှ သိရသည်။
အဆိုပါဖြစ်စဉ်မှာ စက်တင်ဘာ ၄ ရက် ညနေပိုင်းတွင် ဖြစ်ပွားခဲ့ခြင်းဖြစ်ပြီး အမှတ် (၈) အစုန် DEMU ရထားသည် ရန်ကုန်ဘူတာကြီးသို့ ခရီးဆုံးရောက်ရှိပြီးနောက် ရထားတွဲဆိုင်းအား သိမ်းဆည်းရန် စက်ခေါင်းစက်ရုံ (အင်းစိန်) သို့ ထွက်ခွာမောင်းနှင်စဉ် လမ်းညာဘက်ခြမ်းမှ ခဲဖြင့် ပစ်ပေါက်ခံခဲ့ရခြင်း ဖြစ်သည်။
ခဲဖြင့်ပစ်ပေါက်ခံရမှုကြောင့် ရထားတွဲဆိုင်း၏ ဒုတိယတွဲဖြစ်သည့် ပထမတန်း DEMU F-4030 တွဲ၊ ခုံအမှတ် 3A၊ 3B နှင့် 4A၊ 4B အကြားရှိ ပြတင်းပေါက်ဘေး လေကာမှန်မှာ ၂ လက်မခန့် ပေါက်ထွက်သွားပြီး မှန်များ ကြေမွကွဲအက်ခဲ့ကြောင်း သိရသည်။
ထိုသို့ဖြစ်ပွားချိန်တွင် အမှတ် (၈) အစုန်ရထားမှာ ခရီးဆုံးဘူတာသို့ ရောက်ရှိပြီး ရထားသိမ်းဆည်းရန် မိခင်စက်ရုံသို့ ဆက်လက်ထွက်ခွာနေခြင်းဖြစ်သဖြင့် ရထားပေါ်တွင် စက်ခေါင်းမောင်းနှင့် စက်မှုစက်ပြင်အဖွဲ့သာ ပါရှိခဲ့ကြောင်း သိရသည်။
ထို့ကြောင့် ခဲဖြင့်ပ-စ်ပေါက်ခံရသည့် ဖြစ်စဉ်ကို စက်ခေါင်းစက်ရုံ (အင်းစိန်) သို့ ရောက်ရှိချိန်မှသာ သိရှိခဲ့ခြင်းဖြစ်ပြီး ကျူးလွန်သူ ဖမ်းဆီးရမိရေးနှင့် ဥပဒေအရ အရေးယူနိုင်ရေးအတွက် အင်းစိန်နယ်မြေရဲစခန်းတွင် အမှုဖွင့်၍ ဆောင်ရွက်နေကြောင်း မြန်မာ့မီးရထားက သိရသည်။
ရထားပို့ဆောင်ရေးလုပ်ငန်းဥပဒေအရ ရထားကို တစ်စုံတစ်ရာဖြင့် ပ-စ်ပေါက်ခြင်း သို့မဟုတ် ရထားပို့ဆောင်ရေးလုပ်ငန်းကို ထိခိုက်စေနိုင်သည့် လုပ်ရပ်များ ပြုလုပ်ခြင်းအတွက် ထောင်ဒ-ဏ်နှင့် ငွေဒ-ဏ်များ ချမှတ်နိုင်ကြောင်း သိရသည်။
မြန်မာ့မီးရထားအနေဖြင့် ခရီးသွားပြည်သူများ ပိုမိုလုံခြုံစိတ်ချစွာ သွားလာနိုင်ရေးအတွက် လေအေးပေးစက်ပါ DEMU တွဲဆိုင်းသစ်များဖြင့် လူစီးအမြန်ရထားများ ပြေးဆွဲပေးနေခြင်းဖြစ်ပြီး ရထားနှင့် ရထားပို့ဆောင်ရေးဆိုင်ရာ အဆောက်အအုံ၊ ပစ္စည်းများကို ထိန်းသိမ်းစောင့်ရှောက်ရန် ပြည်သူများအနေဖြင့် ပူးပေါင်းပါဝင်ရန် လိုအပ်ကြောင်း သိရသည်။