ဝါရှင်တန်၊ဧပြီ ၁၂
အမေရိက၌ နာရေးအိမ်အနီး ပစ်ခတ်မှုကြောင့် တစ်ဦးသေဆုံးကာ သုံးဦးဒဏ်ရာရခဲ့ကြောင်းသိရသည်။ရဲတပ်ဖွဲ့၏ပြောကြားမှုအရ အဆိုပါနာရေးသည် ပြီးခဲ့သည့်လကဖြစ်ခဲ့သည့် ပစ်ခတ်မှု၌သေဆုံးသွားသူ၏နာရေးဟုသိရသည်။
အဆိုပါနာရေးအပြီး မိနစ် ၂၀ ခန့့်အကြာ၌ ယခုပစ်ခတ်မှုထပ်မံဖြစ်ပေါ်ခဲ့ခြင်းဖြစ်ကြောင်းလည်းဆိုသည်။ပစ်ခတ်မှုအား မည်သည့်အတွက်ပြုလုပ်သည်ကိုမူ မသိရှိရသေးကြောင်းလည်းတာဝန်ရှိသူတစ်ဦးကပြောကြားခဲ့သည်။
အင်္ဂါနေ့ကဖြစ်ပွားခဲ့သော အဆိုပါပစ်ခတ်မှု၌ သေဆုံးသူသည် အမျိုးသားတစ်ဦးဖြစ်ပြီး အခြားအမျိုးသားနှစ်ဦးနှင့် အမျိုးသမီးတစ်ဦးတို့လည်း စိုးရိမ်ရအခြေအနေဖြင့် ဆေးရုံသို့ပို့ဆောင်ပေးထားကြောင်းသိရသည်။
ယခုဖြစ်စဉ်အတွက် တရားခံအားဖမ်းဆီးရမိခြင်းမရှိသေးသကဲ့သို့ အသေးစိတ်အချက်အလက်များကိုလည်းသိရှိရခြင်းမရှိသေးဟု တာဝန်ရှိသူများကပြောကြားခဲ့သည်။
ယခုပစ်ခတ်မှုသည် ကန်တက်ကီပြည်နယ်မှ ဘဏ်ဝန်ထမ်းဟောင်းတစ်ဦးက ၎င်း၏လုပ်ဖော်ကိုင်ဖက်များနှင့် အနီးပတ်ဝန်းကျင်မှလူများအား ပစ်ခတ်မှုပြုလုပ်ပြီးမကြာမီ ထပ်မံဖြစ်ပေါ်လာခြင်းလည်းဖြစ်သည်။
အဆိုပါပစ်ခတ်မှုအား အွန်လိုင်းမှ live လွှင့်ကာပြုလုပ်ခဲ့ခြင်းဖြစ်ပြီး ဘဏ်ဝန်ထမ်းငါးဦးသေဆုံးကာ ရဲအရာရှိနှစ်ဦးအပါအဝင် ကိုးဦးဒဏ်ရာရခဲ့သည်ဟုသိရသည်။တရားခံကိုလည်း သက်ဆိုင်ရာမှ အသေပစ်ခတ်ဖမ်းဆီးခဲ့ရသည်ဟုဆိုသည်။
Source : WION