ပေကျင်း၊ဧပြီ ၁၄
တိဗက်နှင့်ဆက်နွယ်သည့်ကိစ္စများ၌ ဆိုးရွားစွာပြုမူခဲ့သည့် အမေရိကန်ဝန်ထမ်းအချို့ကို ပြည်ဝင်ခွင့် ဗီဇာ ကိုကန့်သတ်လိုက်ကြောင်း တရုတ်နိုင်ငံခြားရေးဝန်ကြီးဌာနက သတင်းထုတ်ပြန်ကြေငြာခဲ့သည်။
တိဗက်ဒေသသို့နိုင်ငံခြားသားများဝင်ရောက်ခွင့်ကို ထိန်းချုပ်သည့်မူဝါဒများတွင် ပါဝင်သည့်တရုတ်အရာရှိများကို လွန်ခဲ့သည့်နှစ်ပတ်က ဝါရှင်တန်ဘက်မှ ဗီဇာကန့်သတ်ချက်ထပ်မံချမှတ်လိုက်သည့်အပေါ် တရုတ်နိုင်ငံက ယခုကဲ့သို့တုန့်ပြန်လိုက်ခြင်းဖြစ်သည်။
အမေရိကကမူ တရုတ်ကွန်မြူနစ်ပါတီအနေဖြင့် အမေရိကန်သံတမန်များ၊ဂျာနယ်လစ်များနှင့် အခြားနိုင်ငံတကာစောင့်ကြည့်လေ့လာသူများကို တိဗက်နှင့်အခြားတိဗက်နှင့်ဆိုင်သည့်ဒေသများသို့ ဝင်ရောက်ခွင့်မပေးဟုစွပ်စွဲပြောကြားခဲ့ပြီး အမေရိကန်သံတမန်များနှင့်အခြားပုဂ္ဂိုလ်များအား အကန့်အသတ်မရှိဝင်ရောက်ခွင့်ပြုရန်လည်းတောင်းဆိုခဲ့သည်။
တရုတ်နိုင်ငံခြားရေးဝန်ကြီးဌာနပြောရေးဆိုခွင့်ရှိသူကမူ တိဗက်နှင့်သက်ဆိုင်သည့်ကိစ္စများသည် တရုတ်နိုင်ငံ၏ ပြည်တွင်းရေးကိစ္စသာဖြစ်ပြီး အဆိုပါကိစ္စကိုအကြောင်းပြပြီး အမေရိကဘက်က ဗီဇာကို အလွဲသုံးစားလုပ်ခြင်းသည် နိုင်ငံတကာဆက်ဆံရေးစံနှုန်းများကို ပြင်းထန်စွာချိုးဖောက်ခြင်းသာဖြစ်ကြောင်းပြောကြားခဲ့သည်။
“တိဗက်ကိုဖွင့်ထားပေးပါတယ်၊တခြားနိုင်ငံက လာရောက်လည်ပတ်သူတွေ၊ စီးပွားရေးလာလုပ်မဲ့သူတွေအတွက်ပေါ့၊ဒါပေမယ့် လူ့အခွင့်အရေး၊ဘာသာရေးနဲ့ယဉ်ကျေးမှုစတာတွေကိုအကြောင်းပြုပြီး တိဗက်အရေးဝင်စွက်ဖက်တာမျိုးကိုတော့ ကန့်ကွက်ထားပါတယ်” ဟုလည်း နိုင်ငံခြားရေးဝန်ကြီးဌာနပြောရေးဆိုခွင့်ရှိသူကပြောကြားခဲ့သည်။
Source : ရိုက်တာ