ယူကရိန်းဟာ ရုရှားနဲ့ စစ်ပွဲကို အဆုံးသတ်မယ့် သဘောတူညီချက်ကို သဘောတူညီခဲ့ပြီး “အသေးအဖွဲ ကိစ္စလေးတွေ” လောက်ပဲ ထပ်ညှိဖို့ကျန်တော့တယ်လို့ အမေရိကန်အရာရှိတစ်ဦးက ပြောပါတယ်။
ဒီလိုသတင်း ထွက်ပေါ်လာတာက အမေရိကန် စစ်ဝန်ကြီးဖြစ်သူ ဒန် ဒရစ်စကောလ်က အာရပ်စော်ဘွားများ ပြည်ထောင်စု မှာ ရုရှားအရာရှိတွေနဲ့ စစ်ပွဲအဆုံးသတ်ရေး အဆိုပြုချက်နဲ့ပတ်သက်ပြီး တွေ့ဆုံဆွေးနွေးနေချိန်လည်း ဖြစ်ပါတယ်။
ယူကရိန်း အမျိုးသားလုံခြုံရေးအတွင်းရေးမှူး ရူစတမ် အူမဲရော့ဗ်ကတော့ “ဂျီနီဗာမှာ ဆွေးနွေးခဲ့တဲ့ သဘောတူညီချက်ရဲ့ အဓိကအချက်တွေကို နှစ်ဖက်စလုံးက နားလည်မှု ရရှိခဲ့ပြီ” လို့ X မှာရေးသားခဲ့ပါတယ်။ “ကျွန်တော်တို့ရဲ့ နောက်ထပ် အဆင့်တွေအတွက် ဥရောပ မိတ်ဆွေတွေရဲ့ ပံ့ပိုးကူညီမှုကို မျှော်လင့်ပါတယ်” လို့လည်း သူကဖြည့်စွက်ပြောကြားခဲ့ပါတယ်။ ဒါ့အပြင် သမ္မတ ထရမ့်နဲ့ သဘောတူညီချက်ကို “နောက်ဆုံးအဆင့်တွေ အပြီးသတ်ပြီး အတည်ပြုနိုင်ဖို့အတွက်” သမ္မတ ဇလန်းစကီး အမေရိကန်ကို လာရောက်နိုင်ဖို့ စီစဉ်နေတယ်လို့လည်း သူက ပြောပါတယ်။
ဇလန်းစကီးကလည်း X မှာ “ဂျီနီဗာမှာ တွေ့ဆုံမှုတွေအပြီးမှာ ငြိမ်းချမ်းရေးလမ်းကြောင်းကို အမှန်တကယ် ဖြစ်လာနိုင်တဲ့ အလားအလာကောင်းတွေ အများကြီးကို ကျွန်တော်တို့ တွေ့မြင်ရပါတယ်။ ခိုင်မာတဲ့ ရလဒ်တွေ ရရှိထားပြီးပါပြီ၊ ဒါပေမဲ့ လုပ်စရာ အလုပ်တွေ အများကြီး ကျန်နေသေးတယ်” လို့ ဒီနေ့မနက်စောစောပိုင်းက ပြောခဲ့ပါတယ်။
အမေရိကန် စစ်ဝန်ကြီးဒရစ်စကောလ်ရဲ့ ပြောရေးဆိုခွင့်ရှိသူ ဒုတိယဗိုလ်မှူးကြီး ဂျက်ဖ် တောလ်ဘတ်ကလည်း အဘူဒါဘီမှာ အမေရိကန်နဲ့ ရုရှား ကိုယ်စားလှယ်အဖွဲ့တွေရဲ့ ဆွေးနွေးပွဲတွေဟာ “အဆင်ပြေနေပြီ” လို့ ပြောခဲ့ပါတယ်။
ဒါပေမဲ့ ရုရှားနိုင်ငံခြားရေးဝန်ကြီး ဆာဂေး လက်ဗ်ရော့ဗ်ကတော့ အကယ်၍ ပြင်ဆင်ထားတဲ့ အမေရိကန်ရဲ့ ငြိမ်းချမ်းရေး အစီအစဉ်ဟာ အလာစကာမှာ ကျင်းပခဲ့တဲ့ အမေရိကန်-ရုရှား ထိပ်သီးအစည်းအဝေးမှာ ရရှိခဲ့တဲ့ သဘောတူညီချက်တွေနဲ့ “အခြေခံအားဖြင့် ကွဲပြား” နေရင် ရုရှားဖက်က လက်ခံမှာ မဟုတ်ဘူးလို့ ပြောပြန်ပါတယ်။
တစ်ချိန်တည်းမှာပဲ ရုရှားနဲ့ ယူကရိန်းတို့ဟာ တစ်ညတာအတွင်း ပြင်းထန်တဲ့ တိုက်ခိုက်မှုတွေ အပြန်အလှန် ပြုလုပ်ခဲ့ကြပြီး ယူကရိန်းဖက်က အနည်းဆုံး လူ ခုနစ်ဦး သေဆုံးခဲ့ပါတယ်။