အမေရိက-အာဆီယံ ကုန်သွယ်ရေးအဆင့်သစ်တက်ရန်အဆင်သင့်ဖြစ်နေ

အမေရိကနှင့် အာဆီယံတို့သည် ကုန်သွယ်မှု ဆက်ဆံရေး ခိုင်မာစေရန် ၎င်းတို့၏ ဘက်စုံ မဟာဗျူဟာ မိတ်ဖက်ဆက်ဆံရေးကို မြှင့်တင်ရာတွင် သိသာထင်ရှားသော တိုးတက်မှုများ ရရှိခဲ့သည်။

ဧပြီလ ၂၁ ရက်မှ ၂၂ ရက်အထိ ဆီယမ်ရိမြို့ ၌ ကျင်းပသည့် ၃၇ ကြိမ်မြောက် အမေရိက-အာဆီယံ ဆွေးနွေးပွဲတွင် နှစ်ဖက်စလုံးက ၎င်းတို့၏ ရပ်တည်ချက် သဘောထားများကို ပြောကြားခဲ့ကြကြောင်း အမေရိကန် နိုင်ငံခြားရေး ဝန်ကြီးဌာန၏ သတင်း ထုတ်ပြန်ချက်အရ သိရသည်။

“အမေရိကန်ပြည်ထောင်စုသည် အာဆီယံဒေသအတွက် နိုင်ငံခြားတိုက်ရိုက်ရင်းနှီးမြှုပ်နှံမှု၏ ထိပ်တန်းရင်းမြစ်အဖြစ် ဆက်လက်တည်ရှိနေပါသည်။ သမ္မတဒေါ်နယ်ထရမ့်၏ ရည်မှန်းချက်မှာ ကျွန်ုပ်တို့၏ကုန်သွယ်မှုဆက်ဆံရေးများတွင် တန်းတူညီမျှ မှု၊ ပိုမိုတရားမျှတမှုနှင့် အပြန်အလှန် အကျိုးရှိမှုကို ဖော်ဆောင်ရန်ဖြစ်သည်။ ထို့အပြင် အားလုံးပါဝင်နိုင်သော ဒစ်ဂျစ်တယ် စီးပွားရေးစနစ်အတွက် အမေရိက က ထောက်ပံ့အားပေးကူညီမှုများလည်းပါဝင်ပါသည် ဟု အရှေ့အာရှနှင့် ပစိဖိတ်ရေးရာဆိုင်ရာ အမေရိကန်အကြီးတန်းဗျူရိုအရာရှိ ရှောင် အိုးနီလ် က ဆွေးနွေးပွဲတွင် ပြောကြားခဲ့သည်။

အရှေ့တောင်အာရှဒေသတွင်း ငြိမ်းချမ်းရေးနှင့် လုံခြုံရေးကို ထိန်းသိမ်းရေး၊ ဆိုက်ဘာလုံခြုံရေး၊ မူးယစ်ဆေးဝါး ရောင်းဝယ်ဖောက်ကားမှု တိုက်ဖျက်ရေး၊ အွန်လိုင်း လိ-မ်လှည့်ဖျားမှုများကို ကာကွယ်ရေး စသည့် နိုင်ငံဖြတ်ကျော် ရာဇဝတ်မှုများ နှင့် ပြည်တွင်းအကြမ်းဖက်မှု တိုက်ဖျက်ရေးကဏ္ဍများတွင် ပူးပေါင်းဆောင်ရွက်မှု တိုးမြှင့်ရန် အာဆီယံနှင့် အမေရိက တို့က ကတိပြုခဲ့ကြသည်။

တချိန်တည်းမှာပင် အမေရိက သည် မြန်မာနိုင်ငံကို ဒီမိုကရေစီလမ်းကြောင်းပေါ် လျှောက်လှမ်းဖို့နှင့် လိုအပ်နေသော လူသားချင်းစာနာထောက်ထားမှု အကူအညီများကို အတားအဆီးမဲ့ ခွင့်ပြုပေးဖို့ မြန်မာနိုင်ငံကို တိုက်တွန်းခဲ့ပါသည်။

အာဆီယံ သဘောတူညီချက် ငါးရပ် နှင့်အညီ မြန်မာနိုင်ငံ၏ အမှန်တကယ် ဒီမိုကရေစီလမ်းကြောင်းသို့ လွယ်ကူချောမွေ့စွာရောက်ရှိစေရန် အတွက် အာဆီယံနှင့် အနီးကပ် ပူးပေါင်းဆောင်ရွက်သွားမည် ဖြစ်ကြောင်း အမေရိက က အာမခံခဲ့သည်။

မတ်လ ၂၈ ရက် နေ့ က ငလျင်လှုပ်ခတ်ပြီးနောက် မြန်မာနိုင်ငံနှင့် ထိုင်းနိုင်ငံတို့တွင် အသက်ဆုံးရှုံးခဲ့ရသည့်အတွက် ဝမ်းနည်းကြောင်း အိုးနီလ်က ထပ်လောင်းပြောကြားခဲ့သည်။

ပြန်လည်ထူထောင်ရေးကာလရှည်ကြာနေချိန်တွင် အမေရိကန်ပြည်ထောင်စုအနေဖြင့် လူသားချင်းစာနာ ထောက်ထားမှုဆိုင်ရာ ကြိုးပမ်းမှုများကို ဆက်လက်ပံ့ပိုးပေးနေ‌ကြောင်း သူက ပြောကြားခဲ့သည်။

အိုးနီလ် သည် ကမ္ဘောဒီးယား နိုင်ငံခြားရေးဝန်ကြီးနှင့် အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီး ခွန်းပုဗ် တို့နှင့်တွေ့ဆုံဆွေးနွေးမှုတွင် ပူးတွဲသဘာပတိအဖြစ် ဆောင်ရွက်ခဲ့သည်။

Ref: ဘာနားမား