အခွန်ကိစ္စ အာဆီယံ စီးပွားရေးဝန်ကြီးများ ဆွေးနွေး

မြင့်မားသော အခွန်စည်းကြပ်မှုများအတွက် အမေရိကန်ပြည်ထောင်စုအပေါ် လက်တုန့်ပြန် အခွန်ကောက်မှုများ လုပ်ဆောင်မည်မဟုတ်ကြောင်း အာဆီယံ စီးပွားရေးဝန်ကြီးများက ယနေ့(ဧပြီလ ၁၀ရက်နေ့) တွင် ကတိပြုလိုက်ပြီး ၎င်းတို့အနေဖြင့် ဆွေးနွေးရန် အသင့်ရှိနေကြောင်း ပြောကြားခဲ့သည်။

အမေရိကန်ပြည်ထောင်စုသည် အာဆီယံ၏ နိုင်ငံခြားတိုက်ရိုက်ရင်းနှီးမြှုပ်နှံမှု အတွက် အကြီးဆုံး အရင်းမြစ်ဖြစ်ကာ ၂၀၂၄ ခုနှစ်တွင် ဒုတိယအကြီးဆုံး ကုန်သွယ်ဖက်နိုင်ငံဖြစ်သောကြောင့် လက်တုန့်ပြန်ခြင်းသည် အကျိုးရှိလိမ့်မည်မဟုတ်ဟု ဝန်ကြီးများက ပြောဆိုခဲ့သည်။

ကမ္ဘာ့ပဉ္စမမြောက်အကြီးဆုံး စီးပွားရေးအစုအဖွဲ့ဖြစ်သည့် အာဆီယံအနေဖြင့် ၂၀၂၅ ခုနှစ် ဧပြီလ ၂ ရက်တွင် ကြေညာခဲ့ပြီး ယင်းနောက်မကြာမီ ဧပြီ ၉ ရက်တွင် ဆိုင်းငံ့ထားလိုက်သော ထပ်တိုးအခွန်စည်းကြပ်မှုများအပါအဝင် အမေရိက၏ တစ်ဖက်သတ်အခွန်စည်းကြပ်မှုများနှင့် ပတ်သက်၍ လွန်စွာစိုးရိမ်မိကြောင်း အွန်လိုင်းအစည်းအပြီး ထုတ်ပြန်လိုက်သော ထုတ်ပြန်ချက်တွင် ဝန်ကြီးများက ပြောကြားထားသည်။

သို့သော်လည်း ကုန်သွယ်မှုဆိုင်ရာ စိုးရိမ်မှုများကို ဖြေရှင်းရန်အတွက် အမေရိကနှင့် ပွင့်လင်းပြီး အပြုသဘောဆောင်သော ဆွေးနွေးမှုတွင် ပါဝင်ရန် အသင့်ရှိသည်ဟု ဝန်ကြီးများက ပြောကြားခဲ့သည်။

ပွင့်လင်းသော ဆက်သွယ်မှုနှင့် ပူးပေါင်းဆောင်ရွက်ခြင်းသည် ဟန်ချက်ညီ၍ ရေရှည်တည်တံ့သော ဆက်ဆံရေးအတွက် အရေးကြီးပါကြောင့် ထိုသဘောတရားအရ အမေရိက အခွန်စည်းကြပ်မှုများကို လက်တုန့်ပြန်သည့် အစီအမံများကို မချမှတ်ရန် အာဆီယံက ကတိပြုလိုက်ကြောင်း ၎င်းတို့က ပြောဆိုခဲ့သည်။

အာဆီယံအဖွဲ့ဝင်အားလုံးက “လက်တုန့်ပြန်ခြင်းသည် ရွေးချယ်စရာ မဟုတ်ဟု ညီညွတ်သော သဘောထားအမြင်ရှိခဲ့သည်” ဟု မလေးရှား ကုန်သွယ်ရေးဝန်ကြီးဌာန၏ သီးခြား သတင်း ထုတ်ပြန်ချက်တွင်လည်း ဖော်ပြခဲ့သည်။

အထူးအစည်းအဝေးကို မလေးရှားနိုင်ငံ ရင်းနှီးမြှုပ်နှံမှု၊ ကုန်သွယ်ရေးနှင့် စက်မှုဝန်ကြီး Datuk Seri Tengku Zafrul Abdul Aziz က သဘာပတိအဖြစ်ဆောင်ရွက်ခဲ့သည်။ မလေးရှားနိုင်ငံသည် အာဆီယံ၏ အလှည့်ကျ ဥက္ကဌအဖြစ် တာဝန်ယူထားသည်။

ဘဏ္ဍာရေးဝန်ကြီးများ၊ ဗဟိုဘဏ်အကြီးအကဲများပါဝင်သော သီးခြား လူချင်းတွေ့ဆုံ ဆွေးနွေးပွဲကို မလေးရှားနိုင်ငံ မြို့တော် ကွာလာလမ်ပူရ်၌ ယနေ့ ပြုလုပ်လျက်ရှိသည်ဟုလည်း သိရသည်။

Ref: မလေးမေးလ်