နေပြည်တော်၊ ဩဂုတ် ၁
အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ (NSPNC) နှင့် နာဂအမျိုးသားဆိုရှယ်လစ်ကောင်စီ (NSCN-K)(AM) တို့၏ ငြိမ်းချမ်းရေးဆိုင်ရာ တွေ့ဆုံဆွေးနွေးပွဲကို ဇူလိုင် ၃၁ ရက်က ပြုလုပ်ခဲ့ပြီး လိုအပ်သည့် အခက်အခဲများကို တည်ဆဲဥပဒေများနှင့်အညီ ညှိနှိုင်းဆောင်ရွက်ပေးသွားမည်ဖြစ်ကြောင်း NSPNC ဥက္ကဋ္ဌ ဒုတိယဗိုလ်ချုပ်ကြီး ရာပြည့်က ပြောကြားခဲ့သည်။
ဆွေးနွေးပွဲတွင် ဒုတိယဗိုလ်ချုပ်ကြီး ရာပြည့်က နာဂဒေသသည် လမ်းပန်းဆက်သွယ်ရေး ခက်ခဲသည့်ဒေသဖြစ်သော်လည်း နိုင်ငံတော်အစိုးရအနေဖြင့် လမ်းပန်းဆက်သွယ်ရေး၊ ပညာရေး၊ ကျန်းမာရေးနှင့် စိုက်ပျိုးမွေးမြူရေးကဏ္ဍများ ဖွံ့ဖြိုးတိုးတက်စေရေးအတွက် နိုင်ငံ့ဘဏ္ဍာရန်ပုံငွေဖြင့် ထောက်ပံ့ဆောင်ရွက်ပေးခဲ့ကြောင်း ပြောကြားသည်။
ထို့ပြင် ဒေသဖွံ့ဖြိုးတိုးတက်ရေးအတွက် ပညာရေး၊ ကျန်းမာရေးနှင့် လူ့စွမ်းအားအရင်းအမြစ် ဖွံ့ဖြိုးတိုးတက်ရေးကို အရှိန်မြှင့်ဆောင်ရွက်ရန် လိုအပ်ကြောင်း၊ ဒေသတည်ငြိမ်အေးချမ်းမှသာ လူမှုစီးပွားဘဝများ ဖွံ့ဖြိုးတိုးတက်လာမည်ဖြစ်သဖြင့် NSCN-K (AM) အနေဖြင့် နာဂဒေသ ငြိမ်းချမ်းရေးနှင့် ဒေသတည်ငြိမ်ရေးကို ဦးစားပေးပူးပေါင်းဆောင်ရွက်စေလိုကြောင်း ပြောကြားခဲ့သည်။
၎င်းက နိုင်ငံရေးဆန္ဒများကို တည်ဆဲဥပဒေဘောင်အတွင်း ညှိနှိုင်းဆောင်ရွက်နိုင်ကြောင်းနှင့် လိုအပ်သည့် အခက်အခဲများကိုလည်း တည်ဆဲဥပဒေများနှင့်အညီ ညှိနှိုင်းဖြေရှင်းပေးသွားမည်ဖြစ်ကြောင်း ထပ်လောင်းပြောကြားခဲ့သည်။
NSCN-K (AM) ဗဟိုအလုပ်အမှုဆောင်ကော်မတီဝင်နှင့် ငြိမ်းချမ်းရေးဖော်ဆောင်ရေးကော်မတီဥက္ကဋ္ဌ ဦးချင်းမောင်က နိုင်ငံတော်အစိုးရသစ်လက်ထက်တွင် နိုင်ငံဖွံ့ဖြိုးတိုးတက်လာမည်ဟု မျှော်လင့်ကြောင်း၊ နာဂဒေသတွင် ယနေ့အချိန်အထိ မလိုလားအပ်သည့် ပဋိပက္ခများ မရှိဘဲ တည်ငြိမ်အေးချမ်းလျက်ရှိကြောင်းနှင့် ယင်းအခြေအနေကို ရေရှည်ထိန်းသိမ်းကာ ဒေသဖွံ့ဖြိုးတိုးတက်ရေးအတွက် အစိုးရနှင့်အတူ ဆက်လက်ပူးပေါင်းဆောင်ရွက်သွားလိုကြောင်း ပြောကြားခဲ့သည်။
ဆွေးနွေးပွဲတွင် နှစ်ဖက်တာဝန်ရှိသူများက ဒေသတည်ငြိမ်အေးချမ်းရေး၊ နာဂဒေသဖွံ့ဖြိုးတိုးတက်ရေး၊ နိုင်ငံရေး၊ လူမှုရေးနှင့် စီးပွားရေးလုပ်ငန်းများ အကောင်အထည်ဖော်နိုင်ရေး၊ ဆက်ဆံရေးရုံးများ ဖွင့်လှစ်နိုင်ရေး၊ နှစ်ဖက်ခေါင်းဆောင်များ ပုံမှန်တွေ့ဆုံညှိနှိုင်းနိုင်ရေး၊ တပ်မတော်နှင့် အစိုးရဌာနများနှင့် ပူးပေါင်း၍ ဒေသလုံခြုံရေးနှင့် ဖွံ့ဖြိုးရေးလုပ်ငန်းများ ဆောင်ရွက်ရေး၊ အပစ်အခတ်ရပ်စဲရေးနှင့် ဒေသဖွံ့ဖြိုးရေးဆိုင်ရာ ကိစ္စရပ်များကို အမြင်ချင်းဖလှယ် ဆွေးနွေးခဲ့ကြကြောင်း သိရသည်။