ဆီချဆိပ်ကမ်းတစ်ခု တည်ဆောက်ရန်မှာ လတ်တလော အစီအစဉ်မရှိသေးကြောင်းနှင့် ကုမ္ပဏီအဖွဲ့အစည်းများမှ လျှောက်ထားလာပါက ပူးပေါင်းဆောင်ရွက်ပေးမည်ဟု ဆို
နေပြည်တော်၊ ဇူလိုင်-၁၇
စစ်ကိုင်းတိုင်းဒေသကြီး၊ ဟုမ္မလင်းမြို့တွင် စက်သုံးဆီတင်ရေယာဉ်များ ဆိုက်ကပ်နိုင်မည့် စံချိန်မီဆီချဆိပ်ကမ်းတစ်ခု အရေးတကြီးလိုအပ်နေသောကြောင့် နိုင်ငံတော်မှ အကောင်အထည်ဖော်တည်ဆောက်ပေးရန် အစီအစဉ်ရှိ/မရှိကို လွှတ်တော် အစည်းဝေးတွင် စစ်ကိုင်းတိုင်းဒေသကြီး အမျိုးသားလွှတ်တော်ကိုယ်စားလှယ် ဦးကျော်ဇင်ထွန်းက မေးမြန်းခဲ့ခြင်းလည်း ဖြစ်သည်။
တတိယအကြိမ် အမျိုးသားလွှတ်တော် ဒုတိယပုံမှန်အစည်းအဝေး၊ ၁၇ ရက်မြောက်နေ့ အစည်းဝေးတွင် မေးမြန်းခဲ့ခြင်းဖြစ်ပြီး လက်ရှိ အချိန်တွင် စက်သုံးဆီများကို ရေယာဉ်များဖြင့်သယ်ယူကြပြီး စက်သုံးဆီတင်မော်တော်ယာဉ်များ ဆိုက်ကပ်နိုင်မည့် စနစ်ကျသောဆိပ်ကမ်း၊ တစ်နည်းအားဖြင့် ဆီချဆိပ်ကမ်း (Oil Jetty)များ မရှိခြင်းကြောင့် ကိုယ်ထူကိုယ်ထစနစ်ဖြင့် ဖလှယ်ချယူနေခြင်းဖြစ်ကြောင်းလည်း မေးခွန်းမေးမြန်းချိန်တွင် ထည့်သွင်းပြောကြားခဲ့ခြင်း ဖြစ်သည်။
ထိုကဲ့သို့ လုပ်ဆောင်နေခြင်းများကြောင့် စက်သုံးဆီများ မြစ်ရေသို့ဖိတ်စင်ပြီး ရေထုညစ်ညမ်းခြင်း၊ မီးဘေးအန္တရာယ်စိုးရိမ်ရခြင်းနှင့် လေလွင့်ဆုံးရှုံးမှုများ ဖြစ်ရကြောင်းလည်း ဦးကျော်ဇင်ထွန်းက ထောက်ပြထားသည်။
ပြီးခဲ့သည့် မတ်လ ၃ ရက်နေ့တွင်လည်း စက်သုံးဆီတင်မော်တော်ယာဉ်များ မီးလေ-ာင်ကျွမ်းမှုဖြစ်ပွားခဲ့ပြီး ဘီလီယံပေါင်းများစွာ ဆုံးရှုံးနစ်နာမှုဖြစ်ခဲ့ပြီး ဧပြီလတွင်လည်း အလားတူ မီးလေ-ာင်ကျွမ်းမှုဖြစ်ခဲ့ပြီး ဘီလီယံပေါင်းများစွာ ဆုံးရှုံးခဲ့ရသည့်အပြင် မြို့ပြပြည်သူများမှာလည်း အထိတ်တလန့်ဖြစ်ခဲ့ကြောင်း သိရသည်။
အဆိုပါဖြစ်ရပ်များမှာ စနစ်ကျသော ဆိပ်ကမ်းမရှိခြင်းကြောင့် ကုန်တင်ကုန်ချမှု (Systematic unloading) အားနည်းခြင်း၊ အချိန်ကြန့်ကြာခြင်းနှင့် လုပ်အားခပိုမိုပေးဆောင်ရခြင်းအပြင် မလိုလားအပ်သော မီးဘေးအန္တရာယ်ကျရောက်မှုများ ဖြစ်ပွားခဲ့ရခြင်းဖြစ်ကြောင်း ဦးကျော်ဇင်ထွန်းက မေးခွန်းမေးမြန်းချိန်တွင် ထည့်သွင်းထောက်ပြထားသည်။
ထိုကြောင့် စစ်ကိုင်းတိုင်းဒေသကြီး၊ ဟုမ္မလင်းမြို့တွင် စက်သုံးဆီတင်ရေယာဉ်များ ဆိုက်ကပ်နိုင်မည့် စံချိန်မီဆီချဆိပ်ကမ်းတစ်ခု အရေးတကြီးလိုအပ်နေသောကြောင့် နိုင်ငံတော်မှ အကောင်အထည်ဖော်တည်ဆောက်ပေးရန် အစီအစဉ်ရှိ/မရှိကို မေးမြန်းထားခြင်းလည်း ဖြစ်သည်။
ပို့ဆောင်ရေးဝန်ကြီးဌာန၊ ဒုတိယဝန်ကြီး ဦးထွန်းလူက အဆိုပါ မေးခွန်းနှင့် ပတ်သက်ပြီး ပြန်လည်ဖြေကြားပေးခဲ့ခြင်းလည်း ဖြစ်သည်။
ဟုမ္မလင်းမြို့တွင် ဆီတင်ချ အပါအဝင် စံချိန်မီဆိပ်ကမ်းအတွက် ဖြစ်နိုင်ခြေလေ့လာမှု (Feasibility Study) အသေးစိတ်ဆောင်ရွက်ရန် လိုအပ်ခြင်း၊ နည်းပညာပိုင်းဆိုင်ရာ(Technical)အရ ဖြစ်နိုင်ခြေ ရှိ၊ မရှိ၊ ကုန်ကျစရိတ်နှင့် ပြန်လည်ရရှိနိုင်မှု (Cost and Benefit) သုံးသပ်တွက်ချက်ရန် လိုအပ်ခြင်း၊ ဆိပ်ကမ်းတစ်ခု တည်ဆောက်နိုင်ရန်ကုန်ကျစရိတ်များပြားလွန်းသဖြင့် ရင်းနှီးမြှုပ်နှံမှုအပေါ်မူတည်၍ ဆောင်ရွက်ရခြင်းတို့ကြောင့် ဟုမ္မလင်းမြို့တွင် စက်သုံးဆီတင်ရေယာဉ်များဆိုက်ကပ်နိုင်မည့် စံချိန်မီဆီချဆိပ်ကမ်းတစ်ခု တည်ဆောက်ရန်မှာ လတ်တလော အခြေအနေအရ အစီအစဉ်မရှိသေးကြောင်း ပြန်လည်ဖြေကြားထားသည်။
သို့သော် “စစ်ကိုင်းတိုင်းဒေသကြီးအစိုးရအဖွဲ့က ဟုမ္မလင်းမြို့တွင် စက်သုံးဆီတင်ရေယာဉ်များ ဆိုက်ကပ်နိုင်ရန် ဆိပ်ကမ်းမြေနေရာ ငှားရမ်းအသုံးပြုခွင့်နှင့် ဆိပ်ခံတံတား တည်ဆောက်ခွင့်အတွက် လူပုဂ္ဂိုလ်/လုပ်ငန်းရှင် သို့မဟုတ် ကုမ္ပဏီအဖွဲ့အစည်းများမှ လျှောက်ထားလာပါက စိစစ်၍ဆောင်ရွက်ပေးသွားမည်” ဖြစ်ကြောင်းလည်း ဒုတိယဝန်ကြီး ဦးထွန်းလူက ဖြေကြားခဲ့သည်။
စစ်ကိုင်းတိုင်းဒေသကြီးအတွင်းတွင် ဆိပ်ကမ်းများအနေဖြင့် ဧရာဝတီမြစ်၌ မြင်းမူ၊ စစ်ကိုင်း၊ မင်းကွန်း၊ မောင်းကုန်း၊ ထီးချိုင့်၊ ကသာဆိပ်ကမ်း ၆ ခုနှင့် ချင်းတွင်းမြစ်၌ မုံရွာ၊ ကနီ၊ မင်းကင်း၊ ကလေးဝ၊ မော်လိုက်၊ ဖောင်းပြင်၊ ဟုမ္မလင်း၊ ခန္တီးဆိပ်ကမ်း ၈ ခုရှိပြီး စုစုပေါင်း ဆိပ်ကမ်း ၁၄ ခု ရှိကြောင်း သိရသည်။