ယမန်နေ့ ဖေဖော်ဝါရီ (၁၆)ရက် ညနေပိုင်းအချိန်၌ ကျင်းပပြုလုပ်ခဲ့သည့် မြန်မာဖူဆယ်လိဂ် – ၁ ပွဲစဉ်အတွင်း ဟက်ထရစ်ဂိုးအပါအဝင် သွင်းဂိုး (၉)ဂိုးသွင်းယူခဲ့သည့် YRG FC အသင်းမှာ အုပ်စုတွင်း အမှတ်ပေးဇယား အဆင့်ရပ်တည်မှု (၂)သို့ ရောက်ရှိခဲ့ပြီဖြစ်ကြောင်း သိရသည်။
ယမန်နေ့က MFF Vita Max Futsal League -1 ဒုတိယ အကျော့ပွဲစဉ်များပြန်လည်စတင်ခဲ့ပြီဖြစ်ရာ ၊ ပွဲစဉ်အတွင်း YRG FC နှင့် YCDC Marga အသင်းတို့ ယှဉ်ပြိုင်ကစားခဲ့ကြခြင်းလည်းဖြစ်သည်။
ပွဲစဉ်အတွင်း YRG FC အသင်းသို့အသစ် ထပ်မံရောက်ရှိလာသည့် ဘရာဇီး ကစားသမား Nathan Arnaldo က ဟက်ထရစ်ဂိုး ခြေစွမ်းပြခဲ့သည့် အပြင် ဆော်ဒီ နိုင်ငံသား ကစားသမား Samimi က သွင်းဂိုး (၂)ဂိုး ၊ ဘရာဇီးနိုင်ငံသား Tota က သွင်းဂိုး (၁)ဂိုး၊ ပြည်တွင်းကစားသမား မျိုးမြင့်စိုးက သွင်းဂိုး(၂)ဂိုး ၊ ဝေဇင်ဦးက သွင်းဂိုး (၁)ဂိုး စုစုပေါင်း (၉)ဂိုးသွင်းယူ အနိုင်ရခဲ့ခြင်းဖြစ်သည်။
ပြိုင်ဘက် YCDC Marga အသင်းအနေဖြင့် တစ်လုံးတည်းသော ချေပဂိုးကို သန့်ဇင်ထွန်းက ပြန်လည်သွင်းယူပေးခဲ့သဖြင့် ပွဲပြီးဆုံးချိန်တွင် (၉)ဂိုး(၁)ဂိုး ရလဒ်ထွက်ပေါ်ခဲ့ကြသည်။
YRG FC အသင်းအတွက် ဟက်ထရစ်ဂိုးသွင်းယူပေးခဲ့သည့် ဘရာဇီးနိုင်ငံသား Nathan Arnaldo မှာ ထိုင်းဖူဆယ် ကလပ် PORT ASM အသင်းပြောင်းရွှေ့လာသည့် ကစားသမားတစ်ဦးဖြစ်သည်။
လက်ရှိ MFF Vita Max Futsal League -1 ၏ ပွဲစဉ် (၁)မှ (၉)အထိ ရာသီဝက် ပြီးဆုံးချိန်တွင် YRG FC အနေဖြင့် ရမှတ် (၁၀)မှတ်ဖြင့် အုပ်စုတွင်း အဆင့်(၃) နေရာတွင် ရပ်တည်ရာမှ အဆင့်(၂)နေရာသို့ တက်လှမ်းနိုင်ခဲ့ခြင်းဖြစ်သ ည်။
VITA MAX Futsal League – 1 ပြိုင်ပွဲတွင် အသင်းပေါင်း (၁၀) သင်း ယှဉ်ပြိုင်ကစားနေကြခြင်းဖြစ်ပြီး ပြိုင်ပွဲ၏ ပထမ အကျော့ပွဲစဉ်များကို ပြီးခဲ့သည့်နှစ် ဒီဇင်ဘာ (၂၉) ရက်တွင် စတင်ကျင်းပခဲ့ခြင်းဖြစ်သည်။