နေပြည်တော်၊ ဇူလိုင် ၂၃
ကရင်ပြည်နယ် သံတောင်၊ ဘောဂလိနှင့် လိပ်သိုဒေသများမှ ထွက်ရှိသည့် စိုက်ပျိုးရေးထွက်ကုန်များကို ပြည်ပဈေးကွက်သို့ တင်ပို့ရောင်းချလျက်ရှိရာ နိုင်ငံခြားဝင်ငွေများ တိုးတက်ရရှိလျက်ရှိကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရသည်။
(၂၀၂၅-၂၀၂၆) ဘဏ္ဍာရေးနှစ်အတွင်း သံတောင်၊ ဘောဂလိနှင့် လိပ်သိုဒေသများမှ ထွက်ရှိသည့် ချဉ်ပေါင်ဖာလာ ပိဿာချိန် (၂,၀၀၀,၀၀၀) ကို တစ်ပိဿာလျှင် ကျပ် ၂၀,၀၀၀ နှုန်းဖြင့် မန္တလေးမြို့မှတစ်ဆင့် ပြည်ပသို့ တင်ပို့နိုင်ခဲ့ကြောင်း သိရသည်။
ထို့ပြင် Robusta ကော်ဖီ ပိဿာချိန် (၂၀၀,၀၀၀) ကို တစ်ပိဿာ ကျပ် ၂၅,၀၀၀ နှုန်းဖြင့်လည်းကောင်း၊ နနွင်း ပိဿာချိန် (၂,၀၀၀,၀၀၀) ကို တစ်ပိဿာ ကျပ် ၁၈,၀၀၀ နှုန်းဖြင့်လည်းကောင်း မန္တလေးမြို့မှတစ်ဆင့် ပြည်ပဈေးကွက်သို့ တင်ပို့ခဲ့ကြောင်း သိရသည်။ နနွင်းကို ဒေသတွင်းစားသုံးရန်အတွက် ရှမ်းပြည်နယ်မှလည်း ဝယ်ယူမှုများရှိကြောင်း ဖော်ပြထားသည်။
ထို့အတူ သံတောင်၊ ဘောဂလိ၊ လိပ်သိုနှင့် မုန်းဒေသများမှ ထွက်ရှိသည့် ကွမ်းသီး(နု) ပိဿာချိန် (၃,၀၀၀,၀၀၀) နှင့် C-Grade ကွမ်းသီး(နု) ပိဿာချိန် (၂၀၀,၀၀၀) တို့ကို တစ်ပိဿာ ကျပ် ၆,၀၀၀ နှုန်းဖြင့် ရန်ကုန်မြို့မှတစ်ဆင့် ပြည်ပသို့ တင်ပို့နိုင်ခဲ့ကြောင်း သိရသည်။
အလားတူ ကြောင်လျှာစေ့ ပိဿာချိန် (၅၀,၀၀၀) ကို တစ်ပိဿာ ကျပ် ၂၀,၀၀၀၊ ဆေးပုလဲ ပိဿာချိန် (၅၀,၀၀၀) ကို တစ်ပိဿာ ကျပ် ၁၆,၀၀၀ နှုန်းဖြင့် မန္တလေးမြို့မှတစ်ဆင့် ပြည်ပသို့ တင်ပို့ခဲ့ကြောင်း သိရသည်။
ထို့ပြင် ဝဥ(အစို) ပိဿာချိန် (၅၀၀,၀၀၀) ကို တစ်ပိဿာ ကျပ် ၃,၀၀၀ နှုန်းဖြင့် မန္တလေး၊ နေပြည်တော်နှင့် ရန်ကုန်မြို့များမှတစ်ဆင့် တင်ပို့ခဲ့ပြီး မျှစ် ပိဿာချိန် (၅၀၀,၀၀၀) ကို တစ်ပိဿာ ကျပ် ၂,၅၀၀ နှုန်းဖြင့် ရန်ကုန်မြို့မှတစ်ဆင့် ပြည်ပဈေးကွက်သို့ တင်ပို့ခဲ့ကြောင်း သိရသည်။
စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ အဆိုအရ မြန်မာနိုင်ငံသည် စိုက်ပျိုးရေးအခြေခံနိုင်ငံဖြစ်သည့်အတွက် စပါး၊ ပဲမျိုးစုံ၊ ပြောင်း၊ နှမ်း၊ နေကြာ၊ မြေပဲ၊ နနွင်း၊ ကော်ဖီ၊ ဝဥ၊ မျှစ်စသည့် စိုက်ပျိုးရေးထွက်ကုန်များကို ပြည်တွင်းစားသုံးမှုအပြင် ပိုလျှံသည့်ပမာဏများကို ပြည်ပသို့ တင်ပို့ရောင်းချ၍ နိုင်ငံခြားဝင်ငွေ ရှာဖွေလျက်ရှိကြောင်း သိရသည်။
ထို့အပြင် ကွမ်းသီး(နု)၊ ဆေးပုလဲ နှင့် ကြောင်လျှာစေ့ တို့မှာလည်း ပြည်ပဈေးကွက်တွင် ဝယ်လိုအားကောင်းသည့် စိုက်ပျိုးရေးထွက်ကုန်များအဖြစ် ဆက်လက်တင်ပို့ရောင်းချလျက်ရှိကြောင်း သိရသည်။