ရန်ကုန်မြို့ ဒဂုံမြို့သစ်(တောင်ပိုင်း)မြို့နယ်ရှိ သုခဒဂုံပြည်သူ့အငှားအိမ်ရာစီမံကိန်းတွင် လက်ရှိ၌ အဆောက်အအုံ (၁၇၁)လုံး တည်ဆောက်ပြီးစီးပြီဖြစ်ကာ အိမ်ထောင်စု (၂၇၃၆) စုအထိ နေထိုင်လျက်ရှိကြောင်း သိရသည်။
(၁၈၁) ဧက ကျယ်ဝန်းသည့် ယင်း စီမံကိန်းတွင် လေးထပ် (၁၆) ခန်း နှစ်လုံးတွဲအဆောက်အအုံ (၂၇၂)လုံး တည်ဆောက်သွားမည်ဖြစ်ရာ လက်ရှိတွင် အဆောက်အအုံ စုစုပေါင်း (၁၇၁)လုံး ပြီးစီးနေပြီဖြစ်သည်။
စီမံကိန်းအတွက် ရန်ကုန်တိုင်းဒေသကြီးအစိုးရအဖွဲ့ ငွေလုံးငွေရင်းဘဏ္ဍာငွေဖြင့် မြို့ပြနှင့်အိမ်ရာဖွံ့ဖြိုးရေးဦးစီးဌာနက လမ်းကွန်ရက်နှင့် အဆောက်အအုံအားလုံးကို တာဝန်ယူတည်ဆောက်ပေးလျက်ရှိကာ ရေဆက်သွယ်ခြင်း၊ သန့်ရှင်းရေးလုပ်ငန်းနှင့် ဈေးများတည်ဆောက်ခြင်းကို မြို့တော်စည်ပင် (YCDC) က တာဝန်ယူတည်ဆောက်ဦ လျှပ်စစ်မီးရရှိဆက်သွယ်မှုများကို ရန်ကုန်လျှပ်စစ်ဓာတ်အားပေးရေးကော်ပိုရေးရှင်းတို့က သတ်မှတ်ကာလပြီးစီးနိုင်ရန် အချိန်နှင့်တစ်ပြေးညီ ဆောင်ရွက်ခဲ့ကြခြင်း ဖြစ်သည်။
သုခဒဂုံ ပြည်သူ့အငှားအိမ်ရာ စီမံကိန်းသည် ဒဂုံမြို့သစ် (တောင်ပိုင်း) မြို့နယ်တွင် တည်ရှိပြီး လမ်းပန်းဆက်သွယ်သွားလာလွယ်ကူစေရန် စီမံကိန်းဧရိယာအတွင်း အမှတ် (၂) လမ်းမှ ဖြတ်သန်းသွားလာနိုင်ပြီး ရန်ကုန်မြို့ပတ်လမ်းနှင့်လည်း ကပ်လျက်တည်ရှိသည်။
လက်ရှိတွင် မဲပေါက်နေထိုင်လျက်ရှိသော ပြည်သူများ အခက်အခဲမရှိ သွားလာနိုင်ရန် စီမံကိန်းအတွင်းအကျယ် (၅) ဧက Bus Terminal ၊ လူမှုဖူလုံရေးနေရာ၊ ရေပေးဝေစခန်း၊ အခြေခံပညာရေးကျောင်း၊ ခေတ်မီစည်ပင်သာယာဈေး၊ စီးပွားရေးလုပ်ကိုင်နိုင်သော နေရာများကိုလည်း ဆက်လက်တည်ဆောက်လျက်ရှိနေသည်။