၂၀၂၅-၂၀၂၆ ဘဏ္ဍာရေးနှစ်အတွင်း သီလဝါအထူးစီးပွားရေးဇုန်တွင် ရင်းနှီးမြှုပ်နှံလိုသူများအတွက် နှစ်ရှည်မြေယာငှားရမ်းမှု မြေဧရိယာ ၃.၉ ဟက်တာကို အတည်ပြုလက်မှတ်ရေးထိုးနိုင်ခဲ့ကြောင်း မြန်မာ-ဂျပန် သီလဝါ ဒက်ဗလော့မင့် လီမိတက် (Myanmar Japan Thilawa Development Limited-MJTD) မှ သိရသည်။
MJTD သည် သီလဝါအထူးစီးပွားရေးဇုန်အတွင်း စက်မှုလုပ်ငန်းဧရိယာ ဖွံ့ဖြိုးရေး၊ ဈေးကွက်တင်ရောင်းချရေး၊ နှစ်ရှည်ငှားရမ်းရေးနှင့် စက်မှုလုပ်ငန်းဧရိယာ လည်ပတ်ရေးလုပ်ငန်းများ ဆောင်ရွက်ရန် တည်ထောင်ထားသော ကုမ္ပဏီဖြစ်သည်။
ကုမ္ပဏီ၏ ၂၀၂၆ ခုနှစ် မတ်လ ၃၁ ရက်တွင် ကုန်ဆုံးသည့် ၂၀၂၅-၂၀၂၆ ဘဏ္ဍာရေးနှစ်အတွက် အသားတင်အမြတ်မှာ အမေရိကန်ဒေါ်လာ ၄.၇ သန်း ရရှိခဲ့ပြီး စုဆောင်းပြီးအမြတ်လက်ကျန် အမေရိကန်ဒေါ်လာ ၆၄.၆ သန်းနှင့် ငွေသားနှင့်ဘဏ်လက်ကျန်ငွေ စုစုပေါင်း အမေရိကန်ဒေါ်လာ ၅၅.၈ သန်း ရှိကြောင်း MJTD ၏ ဘဏ္ဍာရေးရှင်းတမ်းအရ သိရသည်။
ယခုဘဏ္ဍာရေးနှစ်အတွင်း MJTD သည် ရင်းနှီးမြှုပ်နှံလိုသူများထံမှ နှစ်ရှည်မြေယာငှားရမ်းမှုအတွက် မြေဧရိယာ ၃.၉ ဟက်တာ အတည်ပြုလက်မှတ်များ ရေးထိုးနိုင်ခဲ့ပြီး ပုံမှန်လည်ပတ်လုပ်ငန်းများ၊ ပြုပြင်ထိန်းသိမ်းရေးလုပ်ငန်းများနှင့် နေရောင်ခြည်စွမ်းအင်သုံး လျှပ်စစ်ထုတ်လုပ်ရေးစီမံကိန်းမှ ဝင်ငွေစီးဆင်းမှုများအပါအဝင် ကဏ္ဍအသီးသီးတွင် စဉ်ဆက်မပြတ် တိုးတက်မှုများ ရရှိလျက်ရှိကြောင်း ထုတ်ပြန်ထားသည်။
စီးပွားဖြစ် နေရောင်ခြည်စွမ်းအင်သုံး လျှပ်စစ်ထုတ်လုပ်ရေးကို အစီရင်ခံစာတင်ပြသည့် ကာလအကုန်တွင် စုစုပေါင်း ၅.၄ မဂ္ဂါဝပ်အထိ တိုးမြှင့်ဆောင်ရွက်နိုင်ခဲ့ပြီး လုပ်ငန်းစု၏ ပြန်လည်ပြည့်ဖြိုးမြဲစွမ်းအင်ဆိုင်ရာ မဟာဗျူဟာနှင့်အညီ ၂ မဂ္ဂါဝပ် ထပ်မံတိုးချဲ့မှုကို ၂၀၂၆ ခုနှစ် ဧပြီလတွင် အောင်မြင်စွာ အပြီးသတ်နိုင်ခဲ့ကြောင်း သိရသည်။
နေရောင်ခြည်စွမ်းအင်သုံး လျှပ်စစ်ထုတ်လုပ်ရေးစီမံကိန်းကို စုစုပေါင်း ၃၀ မဂ္ဂါဝပ်အထိ အဆင့်ဆင့်တိုးချဲ့ဆောင်ရွက်ရန် လျာထားကြောင်း သိရသည်။